قۇربان شالۋدىڭ سىرى نە؟
اسسالامۋ الەيكۋم! قۇربان شالۋدىڭ سىرى نە؟ جاقسىلىق مىرزاقاسىموۆ

ۋا الەيكۋم اسسالام!

قۇربان شالۋ ٴبىرقاتار حيكمەتتەر ٴۇشىن مىندەت ەتىلگەن، ولار:

1. نىعمەتكە شۇكىرشىلىك.

قۇران كارىمدە: «اللا تاعالانىڭ نىعمەتتەرىن ساناساڭدار، ونىڭ ەسەبىنە جەتە المايسىڭدار...[1]»، – دەپ ەسكەرتىلگەندەي، قۇربان شالۋ – اللا تاعالانىڭ پەندەگە بەرگەن سانسىز نىعمەتتەرىنە دەگەن شۇكىرشىلىك. ادام بالاسى عۇمىر بويى جاراتقان قۇدىرەت يەسىنىڭ قيساپسىز نىعمەتتەرىنە بولەنەدى. ماسەلەن، ٴبىر جىلدان كەلەسى جىلعا امان-ەسەن جەتۋ. يمان نىعمەتى. دەنە-مۇشەنىڭ ساۋلىعى نىعمەتى. مال-دۇنيە دە سول نىعمەتتەر قاتارىندا. مىنە، وسى نىعمەتتەردىڭ بارلىعى ٴۇشىن پەندە اللا تاعالاعا شۇكىرشىلىك ەتۋگە مىندەتتى. قۇرباندىق شالۋ – شۇكىرشىلىكتىڭ ٴبىر كورىنىسى. قان شىعارۋمەن قۇلشىلىق ورىندالادى، ياعني قۇران كارىمنىڭ: «(ەي، مۇحاممەد!) انىعىندا، ٴبىز ساعان كاۋساردى بەردىك. راببىڭ ٴۇشىن ناماز وقى جانە قۇرباندىق شال[2]»، – دەگەن ٴامىرىن ورىنداعان بولادى.

2. يبراھيم (ع.س.) سۇننەتىن جانداردىرۋ.

قۇران كارىمدە: «ول ( ۇلى) ونىڭ وزىمەن بىرگە ٴجۇرىپ، ارەكەت ەتۋگە جەتكەن كەزدە ول: بالام! مەن تۇسىمدە سەنى (قۇرباندىققا) شالىپ جاتقانىمدى كورەمىن. بايقاپ قاراشى، سەن نە ويلايسىڭ؟ – دەدى. ول: اكەشىم! وزىڭە بۇيىرىلعاندى ورىندا. اللا قالاسا، مەنى سابىرلىلاردان تاباسىڭ،– دەدى[3]»، –دەپ، ٴيبراھيمنىڭ ۇلى ٴيسمايلدىڭ (ع.س.) ٴيلاھي امىرگە بويۇسىنىپ قۇربان ەتۋ سىناعىنا ۇشىراعانى بايان ەتىلەدى. سونىمەن بىرگە، «انىعىندا، بۇل – اشىق سىناق. جانە ٴبىز ونىڭ ورنىنا ۇلكەن قۇرباندىق بەردىك[4]»، – دەپ، اكەلى-بالالى پايعامبارلاردىڭ ۇلكەن سىناقتان سۇرىنبەي وتكەندىگى ايتىلادى. سول وقيعانى ەسكە الا وتىرىپ، قۇرباندىق شالۋدىڭ مۇسىلمانعا سىناققا ٴتوزۋ جانە ٴاربىر ىستە سابىرلىق قاجەتتىگىن ۇيرەتەتىن عيبادات ەكەن تۇسىنەمىز.

3. ساداقا جاساۋ.

كىسى ٴوز شاڭىراعىمەن قوسا كورشى-قولاڭ جانە جورا-جولداستارىن ايتتىق داستارقانعا شاقىرىپ، مەرەكەلەيدى. قۇرباندىق ەتىن مۇقتاج جاندارعا ساداقا ەتۋمەن ولاردىڭ قيىنشىلىعىن از دا بولسا جەڭىلدەتىپ، شاڭىراقتارىنا شاتتىق سىيلاۋعا سەبەپكەر بولادى. بۇل يگى ٴداستۇر پايعامبارىمىز (س.ع.س.) زامانىنان كۇنى بۇگىنگە دەيىن جالعاسىپ كەلە جاتقان سۇننەت.    



[1] ناحل سۇرەسى، 18-ايات

[2] كاۋسار سۇرەسى، 1-2 اياتتار

[3] ساففات سۇرەسى، 102-ايات

[4] ساففات سۇرەسى، 106-107 اياتتار

date24.09.2014readCount7250categoryقۇربانprintباسىپ شىعارۋ