دوڭىز تەرىسىنەن جاسالعان اياق كيىم
اسسالامۋ الەيكۋم!
دوڭىز ەتى حارام ەكەنى بەلگىلى، ال دوڭىز تەرىسىنەن اياق كيىم نەمەسە باسقا دا بىلعارى بۇيىمدار جاساۋعا بولادى ما؟ ويتكەنى، ەتى جەلىنبەيتىن باسقا جانۋارلاردىڭ تەرىسىن يلەۋ ارقىلى پاكتەۋ (ادال) ەتۋ دەگەن بار ەمەس پە؟ جاقسىلىق (it)

ۋا الەيكۋم اسسالام!
قۇران كارىمدە حارام ەتىلگەن ەت جايلى: «شىنايى تۇردە سەندەرگە ولەكسەنى، (ارام ولگەن مالدى)، قاندى، دوڭىز ەتىن جانە اللادان باسقانىڭ اتىمەن باۋىزدالعاندى ارام قىلدى...[1]»،-دەپ ايتىلعان. وسىنىڭ ىشىندە، دوڭىز تۇتاستاي حارام. ونىڭ ەتىن جەۋگە بولمايتىندىعى سەكىلدى تەرىسىن دە پايدالانۋ جانە ساتۋ حارام.

جابير بين ابدۋللا (ر.ا.) ريۋايات ەتكەن حاديستە: «اللا تاعالا جانە ونىڭ ەلشىسى اراقتى، ولەكسەنى، دوڭىزدى جانە پۇتتى ساتۋدى حارام ەتتى. سوندا: ۋا، اللا ەلشىسى! ولەسكەنىڭ مايى شە، ونىمەن كەمەلەر مايلانادى، تەرى-بىلعارىلارعا جاعىلادى جانە مايشام ەتىپ جاعىلادى،-دەپ سۇرادى. پايعامبار (س.ع.س.): جوق، ول حارام،-دەدى دە، ٴسوزىن جالعاستىرىپ: اللا تاعالا ياھۋديلەردى قۇرتسىن، اللا ولەكسەنىڭ مايىن حارام ەتكەندە ولار ادەمىلەپ ساتىپ، قۇنىن جەگەن،-دەدى[2]»،-دەپ ايتىلعان.

بارلىق فيقھ عالىمدارى دوڭىز تەرىسىن كەز كەلگەن جولمەن پايدالانۋعا جانە ساتۋعا تىيىم ەتىلۋىنىڭ سەبەبى دوڭىز ٴتىرى جانە ولگەن كۇيدە دە حارام بولعاندىقتان دەگەن. سوندىقتان، دوڭىز تەرىسىنەن تىگىلگەن تون، اياق كيىم جانە تاعى باسقا زاتتاردى كييۋگە بولمايدى.



[1] باقارا سۇرەسى، 173-ايات
[2] بۇحاري، مۋسليم

date17.04.2014readCount7773categoryساۋدا-ساتتىقprintباسىپ شىعارۋ