ۇرلانعان ۇيالى تەلەفوندى ساتىپ الۋ كۇنا بولا ما؟
اسسالامۋ الەيكۋم ۋا راحماتۋللاھۋ ٴۋا باراكاتۋھ! مەنىڭ  سىزدەردەن سۇرايىن دەگەنىم، ۇرلانعان ۇيالى تەلەفوندى (سوتكا) ساتىپ الۋ كۇنا بولا ما؟ شاريعاتتا ۇكىمى قانداي؟ دۋلات ازبەرگەنوۆ

ۋا الەيكۋم اسسالام ۋا راحماتۋللاھي ۋا باراكاتۋھ!

دۋلات باۋىرىم! اسىل ٴدىنىمىز قىلمىستىڭ كەز كەلگەن تۇرىمەن كۇرەسۋدە ونىڭ الدىن الۋ جانە بولدىرماۋ جولدارىن قاراستىرعان. سونىڭ ٴبىرى ۇرلىق. ۇرلىق جاساۋ – ۇلكەن كۇنا. حاديستە: «زينا جاساۋشى ويناستىق كەزىندە كامىل مۇسىلمان بولمايدى، ۇرلىق جاساۋشى ۇرلىق كەزىندە كامىل مۇسىلمان بولمايدى، اراق ٴىشۋشى شاراپ ٴىشىپ وتىرعاندا كامىل مۇسىلمان بولمايدى[1]»،-دەپ قاتاڭ ايتىلعان. وسى سەبەپتى دە، ۇرلىقتىڭ بارلىق ٴتۇرى مەن كورىنىسى حارام.

مۇسىلمان ادامعا ۇرلانعان جانە دە باسقا جولمەن مۇلىك يەسىنەن زاڭسىز الىنعان زاتتاردى ساتىپ الۋعا تيىم سالىنادى. بۇل قىلمىسكەردىڭ ۇرلىق-زومبىلىعىنا جاردەم ەتىپ، قىلمىسىنا ورتاق بولۋ. پايعامبارىمىز (س.ع.س.): «كىمدە-كىم ۇرلانعان زاتتى سالىپ السا، جانە ونىڭ ۇرلانعان ەكەنىن بىلسە، ۇرلىقتىڭ كۇناسى مەن ماسقارالىعىنا ورتاق بولعانى[2]»،-دەيدى.

ۇرلىق جاساعان ادام كۇناسىنەن ارىلۋ ٴۇشىن تەك تاۋبە ەتۋى جەتكىلىكتى ەمەس. تاۋبەسى دۇرىس بولۋ ٴۇشىن ۇرلانعان زاتتى يەسىنە قايتارۋى شارت. ال، قايتارۋعا شاماسى كەلمەيتىندەي جاعداي بولسا، يەسىنەن كەشىرىم سۇراۋى كەرەك. ال، يەسى تابىلماسا زاتتىڭ قۇنىن يەسىنىڭ اتىنان مۇقتاجدارعا ساداقا ەتىپ بەرۋى قاجەت. ال، ۋاقىت وتە كەلە يەسى تابىلسا، قايتارۋعا ٴتيىس.



[1]كاباير زۋنۋب، 333-بەت

[2] يسلامداعى حالال مەن حارام. يۋ.قاراداۋي، 229-بەت

date06.02.2014readCount6266categoryساۋدا-ساتتىقprintباسىپ شىعارۋ