اۋىزاشاردىڭ (ادامداردى اۋىز اشۋعا شاقىرۋدى ايتامىن) دا وزىندىك شارتتارى بولادى ما؟
اۋىزاشاردىڭ (ادامداردى اۋىز اشۋعا شاقىرۋدى ايتامىن) دا وزىندىك شارتتارى بولادى ما؟ مۇمكىن بولسا، سول جايلى جازا كەتسەڭىزدەر ەكەن

ٴزايد يبن حاليد ٴال-جۋھاينيدىڭ (ر.ا.) ريۋاياتى بويىنشا پايعامبارىمىز (س.ع.س.): «اۋزى بەرىك جاندى اۋىزاشارعا شاقىرىپ تاماق بەرگەن كىسى – ورازا ۇستاعان ادامنىڭ الاتىنىنداي ساۋاپ الادى. اۋزى بەرىك ادامنىڭ ساۋابىنان دا ەش نارسە كەمىمەيدى»، دەگەن. (تيرميزي، ساۋم، 82; يبن ٴماجا، سيام، 40). رامازان ايىنىڭ كەلۋىمەن قاتار اۋىزاشار بەرۋ دە كوبەيە تۇسەدى. جورا جولداستارىمىزبەن جاقىن تۋىستارىمىزدى اۋىزاشارعا شاقىرعان سياقتى، ٴبىز دە ولاردىڭ قوناعى بولامىز. وسىلايشا ادامداردىڭ بىر-بىرىنە دەگەن باۋىرمالدىق، جومارتتىق سەزىمدەرى ارتا تۇسەدى. ٴبىراق ادامداردى اۋىزاشارعا شاقىرامىن دەپ قاتتى شىعىندالماۋ دا كەرەك. ارينە داستارحاننىڭ ٴساندى ٴارى مول بولعانى جاقسى اۋ، ٴبىراق ٴسىزدىڭ الەۋمەتتىك جاعدايىڭىزدى ويسىراتا تۇسپەۋى كەرەك. پايعامبارىمىزدىڭ حاديستەرىنە ۇڭىلەر بولساق ٴبىر جۇتىم سۋ، ٴسۇت نەمەسە قۇرمامەن دە اۋىزاشار بەرۋگە بولاتىندىعىن مەڭزەگەن. ەگەر دە ٴسىزدىڭ جاعدايىڭىز مول داستارحان جاساۋعا كەلىپ جاتسا وندا وعان دا رۇحسات. ياعني پايعامبارىمىز (س.ع.س.) ەڭ از مۇلشەردە اۋىزاشار بەرسە دە ساۋاپقا كەنەلەتىنىن ايتقىسى كەلگەن ەدى. رامازاندا اۋىزاش بەرىپ ساۋاپقا كەنەلۋمەن قاتار، پايعامبارىمىزدىڭ (س.ع.س.) سۇننەتىن دە ورىنداعان بولىپ سانالادى. ال اۋىزاشارعا كەلگەن ادامنىڭ دا دۇعا جاساۋى سۇننەت. ابدۋللا يبن زۇبەيردىڭ (ر.ا.) ايتۋىنا قاراعاندا پايعامبارىمىز (س.ع.س.) ساعد يبن مۋازدىڭ (ر.ا.) ۇيىندە اۋىزاشارعا بارادى. سول جەردە داستارحان باسىندا پايعامبارىمىز (س.ع.س.): «داستارحانىڭىزدان ورازا ۇستاعاندار ٴدام تاتسىن. استارىڭىزدى ىزگى كىسىلەر جەپ، پەرىشتەلەر سىزدەرگە دۇعا ەتسىن» (ٴمۇسناد، 3/138) دەپ دۇعا جاساعان ەدى. ٴابۋ شەيح يبن حيبباننىڭ ريۋاياتى بويىنشا پايعامبارىمىز (س.ع.س.): «ەگەر دە كىمدە-كىم رامازان ايىندا ادال تابىسىمەن اۋىزاشار بەرسە، پەرىشتەلەر رامازان ايىنىڭ سوڭىنا دەيىن وعان دۇعا جاسايدى…» دەگەن. سوندا ريۋايات ەتۋشى: ۋا، راسۋل اللاھ! اۋىزاشارعا ەشتەڭە تاپپاسا نە ىستەيدى؟ دەدى. – «ٴبىر ٴتىلىم نان بەرسىن» دەدى. – «ول دا بولماسا شە؟» – «وندا قارا سۋ بەرسىن» دەدى. (ٴات-تارعيب ٴۋات تارحيب، 2/431) ولاي بولسا اۋىزاشار بەرۋدىڭ قاتىپ قالعان شارتى جوق ەكەن. شاماڭىزعا قاراي اۋزى بەرىك جاندارمەن بىرگە اۋىز اشۋ جانە جوق-جىتىكتەرگە قاراسىپ، كەدەيلەرگە قول ۇشىن بەرۋ – مۇستاحاپ.

date19.07.2012readCount9814categoryورازاprintباسىپ شىعارۋ