ٴقابىردى كورگەندە بەت سيپاۋ دۇرىس پا؟
اسسالاۋماعالەيكۋم! بىزدە كولىكپەن زيرات جانىنان ٴوتىپ بارا جاتقاندا بەت سيپاپ جاتادى. مۇنداي شاريعاتتا بار ما؟ ياعني، ٴقابىردىڭ جانىنان ٴوتىپ بارا جاتقاندا بەت سيپاۋ دۇرىس پا؟ ەرنات.

ۋاعالەيكۋمۋسسالام! ەرنات، پايعامبارىمىزدىڭ (س.ع.س.) سۇننەتى بويىنشا قابىرگە كەلگەن ادام سول جەردە جاتقان ٴارۋاقتارعا اللادان كەشىرىم تىلەپ، دۇعا ەتەدى. بۇل – ساۋاپتى ٴىس. ساحيح مۋسليمدە ريۋايات ەتىلگەن حاديستە ٴجابرايىل پەرىشتە مۇحاممەد پايعامبارعا: «باقيع قابىرىنە[1] بارىپ ول جەردەگى جاتقاندارعا «يستيعفار» (كەشىرىم تىلە) ەت!» دەگەن قۇدايدىڭ بۇيرىعىن جەتكىزەدى. پايعامبارىمىز (س.ع.س.) جابىرەيىل ايتقان قابىرگە كەلىپ، قولىن كوتەرىپ دۇعا ەتەدى. ۇيگە ورالىسىمەن ايشا انامىز: «(قابىردەگىلەرگە)نە دەيىن؟»، – دەپ سۇرايدى. سوندا پايعامبارىمىز: «(قابىرگە بارعاندا) بىلاي دە: «ۋا ٴمۇمين، مۇسىلمان ٴقابىر يەلەرى! اللا تاعالا ٴبىزدىڭ ولىلەرىمىزگە دە، تىرىلەرىمىزگە دە راقىم ەتسىن. اللا قالاعان كۇنى ٴبىز دە سەندەردىڭ قاتارلارىڭا قوسىلامىز»[2]، – دەپ جاۋاپ بەردى.

قازاقتاردىڭ ٴقابىر قاسىنان ٴوتىپ بارا جاتىپ بەت سيپاۋى پايعامبارىمىزدىڭ (س.ع.س.) وسى سۇننەتىنەن شىققان دۇنيە. الايدا، تەك بەت سيپاپ قانا قويماي سول جەردە جاتقاندارعا ىشتەي اللادان راحىم تىلەگەن دۇرىس. سوندا ٴسىزدىڭ ارەكەتىڭىز قۇر بەت سيپاعاندىق ەمەس، پايعامبارىمىزدىڭ سۇننەتىن ورىنداعاندىق بولماق.

[1] مادينە قالاسىنىڭ وڭتۇستىك شىعىسىندا ورنالاسقان ساحابالاردىڭ ٴمايىتى جەرلەنگەن قابىر. بۇنى «ٴجانناتۋل باقيع» دەپ تە اتايدى.
[2] مۋسليم، كيتابۋل جانايز، (974) – 103 حاديس.
ابدۋسامات قاسىم
date28.05.2013readCount22857categoryجانازاprintباسىپ شىعارۋ