باس مەشىتتىڭ بالا شاكىرتتەرىنە سەرتيفيكات تابىستالدى (فوتو)

بۇگىن استانا قالاسىنداعى رەسپۋبليكالىق «ازىرەت سۇلتان» مەشىتىنىڭ جازعى ساۋات اشۋ كۋرسىنىڭ شاكىرتتەرى وقۋ باعدارلاماسىن اياقتاپ، ارنايى سەرتيفيكات تابىستاۋ ٴراسىمى بولىپ ٴوتتى. قمدب ٴتوراعاسىنىڭ ٴبىرىنشى ورىنباسارى، «ازىرەت سۇلتان» مەشىتىنىڭ باس يمامى ناۋرىزباي قاجى تاعان ۇلىنىڭ باستاماسىمەن بيىلعى جىلى بۇل كونسەرتتىك شاراعا استاسىپ، بۇلدىرشىندەرگە مەرەكە ۇيىمداستىرىلدى.

مەشىت مەيرامحاناسىندا وتكىزىلگەن شارا اياسىندا بۇلدىرشىندەرگە داستارحان جايىلىپ، جەمىس-جيدەك پەن ٴتاتتى تاعامدار بەرىلدى. ال، اتا-انالار ٴۇشىن ارنايى كورەرمەن زالى جاسالىپ، پەرزەنتتەرىنىڭ قىزىعىن تاماشالاۋعا جايلى جاعداي ۇسىنىلدى. «ازىرەت سۇلتان» مەشىتىنىڭ جازعى ساۋات اشۋ كۋرسىندا ٴبىلىم جەتىلدىرگەن بالا شاكىرتتىڭ قۇران اياتىن ٴتيلاۋات ەتۋىمەن اشىلعان شارا اياسىندا وزگە دە شاكىرتتەر ٴوز ونەرلەرىن كورسەتىپ، اتا-انالار قاۋىمىنا كۇمبىرلەتىپ كۇي شەرتىپ، ساڭقىلداتىپ جىر وقىپ بەردى. بۇدان بولەك، ٴار توپ شاكىرتتەرى وزدەرى دايىنداعان ونەرلەرىن پاش ەتىپ، «يماني جاز» لاگەرىندە ۇيرەنگەندەرىن كوپشىلىكپەن ٴبولىستى.

ايتا كەتەيىك، بيىلعى جىلى رەسپۋبليكالىق «ازىرەت سۇلتان» مەشىتىنىڭ جازعى ساۋات اشۋ كۋرسىن 350-دەن استام بالا شاكىرتتەر ٴتامامداپ وتىر. شاكىرتتەردىڭ بارلىعىنا مەشىت سەرتيفيكاتى تابىستالىپ، باس يمام ناۋرىزباي قاجى تاعان ۇلى اتىنان ارنايى سىيلىقتار ۇلەستىرىلدى. سونداي-اق، ٴار توپ اراسىنان ۇزدىك وقۋشى تاڭدالىپ، قوسىمشا سىيلىقپەن ماراپاتتالىپ وتىر.

بيىلعى جىلى بالا شاكىرتتەر اراسىندا تۇڭعىش رەت «مەنىڭ سۇيىكتى مەشىتىم» اتتى سۋرەت سايىسى ۇيىمداستىرىلعان بولاتىن. بالا سۋرەتشىلەردىڭ قيالى مەن قالامىنان تۋىنداعان سۋرەتتەر قورىتىندىسى دا بۇگىنگى كەشتە جاريا ەتىلىپ، جەڭىمپاز شاكىرتتەرگە باعالى سىيلىقتار تابىستالدى. سونداي-اق، سۋرەت سايىسىنا قاتىسقان 17 شاكىرت تە ىنتالاندىرۋ سىيلىعىنا يە بولىپ، كوڭىلدەرى كوتەرىڭكى قايتتى.

سۋرەتتەردى «فوتوگالەرەيا» ايدارىنان كورە الاسىزدار!

date18.06.2018readCount660printباسىپ شىعارۋsourceLinkmuslim.kz





comments powered by hypercomments