«ازىرەت سۇلتان» مەشىتى رامازان ايىندا 23 000 جانعا اۋىزاشار بەردى (فوتو)

استانا قالاسىنداعى رەسپۋبليكالىق «ازىرەت سۇلتان» مەشىتى قاسيەتتى رامازان ايى بويى 23 200 جانعا داستارحان جايىپ، تەگىن اۋىزاشار ۇيىمداستىردى. قمدب ٴتوراعاسىنىڭ ٴبىرىنشى ورىنباسارى، نايب ٴمۇفتي، «ازىرەت سۇلتان» مەشىتىنىڭ باس يمامى ناۋرىزباي قاجى تاعان ۇلىنىڭ باستاماسىمەن بيىلعى جىلى قۇلشىلىق ورداسىنىڭ وڭ جاق قاناتىنداعى كىرەبەرىس ٴدالىز بەن كونفەرەنسيا زالى دا قولدانىسقا بەرىلىپ، ٴبىر كۇنگى اۋىزاشار داستارحانىنا شاقىرىلاتىن قوناقتار سانى 800-گە جەتكەن بولاتىن.

كۇن سايىن مەشىت جاماعاتىنا ەكىنتى نامازىنان سوڭ ارنايى تالون تاراتىلىپ، اۋىزاشار داستارحانى بەلگىلى ٴبىر رەتتىلىكپەن جۇرگىزىلىپ وتىردى. بۇعان قوسا، كونفەرەنس-زالىنداعى 65 جانعا ارنالعان «بەرەكەلى رامازان» داستارحانىنا ەلوردامىزداعى ٴتۇرلى قوعامدىق ۇيىم مۇشەلەرى (زاعيپتار، مۇگەدەك جاندار، قۇلاعى ەستىمەيتىندەر، ت.ب.)، ۇستازدار مەن دارىگەرلەر قاۋىمى، باق وكىلدەرى، سپورتشىلار مەن ٴتارتىپ ساقشىلارى، جوو ستۋدەنتتەرى مەن ەرىكتى جاستار قوزعالىسىنىڭ مۇشەلەرى شاقىرىلىپ وتىرعان بولاتىن.

سونداي-اق، بيىلعى جىلى تۇڭعىش رەت «ازىرەت سۇلتان» مەشىتىندە 4 500 جانعا تەگىن سارەسى تاماعى دا تاراتىلدى. باس يمام ناۋرىزباي قاجى تاعان ۇلىنىڭ باستاماسىمەن قاسيەتتى ٴقادىر تۇنىندە جۇزەگە اسقان يگى شارا قۇلشىلىققا دەن قويعان جاماعات ٴۇشىن ەرەكشە وقيعا بولدى. بەرەكەلى تۇندە مەشىت اۋلاسىندا تاراتىلعان سارەسى تاعامى جاماعاتتىڭ اۋىز بەكىتەر اس ىزدەپ، ۋاقىتتى ٴتيىمدى وتكىزۋىنە سەپتىگىن تيگىزدى.

قاسيەتتى ايدا ۇستاعان ورازالارىمىز بەن جاساعان عيبادات-قۇلشىلىقتارىمىزدى اللا تاعالا ساۋاپتان جازىپ، قابىل ەتكەي!

date18.06.2018readCount446printباسىپ شىعارۋsourceLinkmuslim.kz





comments powered by hypercomments