باس ٴمۇفتي ارداگەرلەر ۇيىندە اۋىزاشار بەردى (فوتو)

كەشە قازاقستان مۇسىلماندارى ٴدىني باسقارماسىنىڭ ٴتوراعاسى، باس ٴمۇفتي سەرىكباي قاجى وراز ارداگەرلەر ۇيىنە ارنايى زيارات جاساپ، اۋىزاشار داستارحانىن جايدى. باس ٴمۇفتي حازرەتتى ارداگەرلەر ٴۇيىنىڭ ديرەكتورى رايسا مۇسابەكقىزى كۇتىپ الىپ، قارتتارعا جاسالىپ وتىرعان بارلىق جۇمىستارىمەن تانىستىردى. ەڭ الدىمەن ارداگەرلەرىنىڭ ٴۇيىنىڭ ورتاڭعى ۇلكەن زالىندا ورنالاسقان قولدان ەگىلگەن كىشى ساياباقتى ارالاپ، عيمارات ىشىندەگى عاجاپ كورىنىستى جاساعان باسشىلىعىنا العىس ايتتى. ودان كەيىن، قارتتارعا قولايلى ەتىپ جاسالعان سپورتتىق ساۋىقتىرۋ زالىن ارالاپ باس ٴمۇفتي:

«مىناۋ سپورتتىق ساۋىقتىرۋ زالى ارداگەرلەر ۇيىندە جاتقان دەنساۋلىقتارى سىر بەرگەن ٴاربىر قارياعا وتە قولايلى جاسالعان ەكەن»، - دەپ ساۋىقتىرۋ زالىنداعى قۇرال-جابدىقتارمەن تانىستى.

سونىمەن قاتار، قاريالاردىڭ اراسىنداعى قولىنىڭ شەبەرلىگى بار كىسىلەرگە ارنالعان قولونەر جاساۋ بولمەسىن جانە قارتتاردىڭ جۇيكە جۇيەسىن تىنىشتاندىرۋعا ارنالعان ساۋىقتىرۋ بولمەلەرىن ارالاپ شىقتى. جانە جاسى 76-عا كەلگەن ارداگەرلەر ٴۇيىنىڭ تۇرعىنى قۇلماعامبەتوۆا تولەبيكە سايمقىزىنىڭ بولمەسىنە باس سۇعىپ، قارت انامەن سۇحباتتاستى. ودان كەيىن باس ٴمۇفتي حازرەت ارداگەرلەر ٴۇيىنىڭ تاريحىنان سىر شەرتەر مۋزەيدى ارالادى. جانە №45 كىتاپحاناعا دا زيارات جاساپ، كىتاپحانا ىشىندەگى جۇمىستارمەن تانىسىپ، ٴوز اتىنان قازاقتىڭ تاريحى قامتىلعان « ۇلى دالا توسىندەگى يسلام» اتتى ەڭبەگىن قولتاڭباسىمەن سىيعا تارتتى.

ارداگەرلەر ٴۇيىنىڭ جۇمىستارىمەن تانىسىپ بولعاننان كەيىن ارنايى جايىلعان اۋىزاشار داستارحانىندا قاريالارمەن سۇحباتتاسىپ، قام كوڭىل قارتتاردىڭ كوڭىلىنە مەدەت سىيلار اق تىلەگىن جەتكىزىپ:

«ەڭ الدىمەن قاسيەتتى رامازان ايى بارشاڭىزعا قۇتتى، مۇباراك بولسىن. اللانىڭ رازىلىعى ٴۇشىن ۇستاعان ورازالارىڭىز قابىل بولسىن.
بۇگىنگى قوعامدا كۇللى ادامزاتقا جەتىسپەي تۇرعان مىنەز ول – مەيىرىمدىلىك. ٴبىز سول مەيىرىمدىلىكتىڭ ٴبىر ۇزىگىن بولسا دا وزدەرىڭىزبەن بولىسۋگە كەلىپ وتىرمىز. سىزدەردەي قازىنالى قاريالارىمىز امان بولسىن»، – دەپ،

ارداگەرلەرىنىڭ ٴۇيىنىڭ تۇرعىنى تولەبيكە سايمقىزىنا جانە رايسا قالدىبايقىزىنا بارشا مۇسىلماننىڭ اتىنان جانە ٴوز اتىنان ۇلكەن قاجىلىققا جولداما تابىستادى. قانشاما مۇسىلماننىڭ ارمانى بولعان قاسيەتتى مەكەنگە قاجىلىق ساپارىنىڭ جولداماسىنا يە بولعان تولەبيكە سايمقىزى انالىق العىسىن ايتتى.

شارا بارىسىندا ارداگەرلەر ٴۇيىنىڭ ديرەكتورى رايسا مۇسابەكقىزى ٴسوز الىپ، باس مۇفتيگە شەكسىز العىسىن جەتكىزدى. سونىمەن قاتار، كەشەگى وتكەن مايلىقوجانىڭ شوبەرەسى جاكەن وماروۆ قازاقى ٴماندى تەرمە ورىنداپ، قاريالاردىڭ كوڭىلىن كوتەردى.

ارداگەرلەر ۇيىندەگى اق تىلەكپەن باستالعان جۇزدەسۋ، اقساقالداردىڭ اق باتاسىنا ۇلاسىپ، كارىمعالي ەسىمجان ۇلى اقساقال ارنايى باتا بەرىپ، ەل مەن ٴدىننىڭ قىرۋار جۇمىسى بولسا دا قارتتارىن ۇمىتپاي داستارحان جايىپ وتىرعان باس ٴمۇفتي حازرەتكە زور العىسىن جەتكىزدى.

 

date09.06.2018readCount552printباسىپ شىعارۋsourceLinkقمدب ٴباسپاسوز قىزمەتى





comments powered by hypercomments