«ازىرەت سۇلتان» مەشىتى ناۋقاس سابيلەرگە «رامازان سىيلىعىن» تارتۋ ەتتى (فوتو+ۆيدەو)

بۇگىن استانا قالاسىنداعى رەسپۋبليكالىق «ازىرەت سۇلتان» مەشىتى «انا مەن بالا» ۇلتتىق عىلىمي ورتالىعىندا ەم قابىلداپ جاتقان ناۋقاس سابيلەرگە ارناپ قايىرىمدىلىق شاراسىن وتكىزدى. «زەكەت» قورىنىڭ استانا قالاسىنداعى وكىلدىگىمەن بىرلەسە ۇيىمداستىرىلعان «ٴسابي ساۋلىعى – ۇلت بولاشاعى» شاراسى اياسىندا وسى ورتالىقتا ەمدەلىپ جاتقان ىسىك اۋرۋىنا شالدىققان سابيلەرگە «رامازان سىيلىعى» جاسالدى.

قمدب ٴتوراعاسىنىڭ ٴبىرىنشى ورىنباسارى، نايب ٴمۇفتي، «ازىرەت سۇلتان» مەشىتىنىڭ باس يمامى ناۋرىزباي قاجى تاعان ۇلى باستاعان مەشىت قىزمەتكەرلەرى بۇگىن ارنايى «انا مەن بالا» ورتالىعىن زيارات ەتىپ، «رامازان سىيلىعىن» تابىستاپ قايتتى. قاسيەتتى ايدىڭ قۇرمەتىنە وراي ۇيىمداستىرىلعان شارا اياسىندا ورتالىقتاعى بىلىكتى مامانداردىڭ ەمىنەن شيپا ىزدەگەن 20 وتباسىعا قارجىلاي كومەك كورسەتىلدى. سونداي-اق، جالپى سوماسى 300 000 تەڭگەگە ناۋقاس سابيلەرگە قاجەتتى جايالىق-جابدىقتار، ارنايى ەزبەلەر مەن تاعام تۇرلەرى جانە بۇلدىرشىندەرگە رامازان مەيىرىمىن سەزىندىرۋ ماقساتىندا ٴتۇرلى ويىنشىقتار تارتۋ ەتىلدى. بۇعان قوسا، مەرەكەلىك كوڭىل-كۇي سىيلاۋ ٴۇشىن كاسىبي كلوۋن شاقىرىلىپ، سىرقاتىنان مەزى بولعان سابيلەردى شات كۇلكىسىن قايتا جاڭعىرتىپ، جۇزدەرىنە كۇلكى ٴۇيىردى.

ايتا كەتەيىك، رەسپۋبليكالىق «ازىرەت سۇلتان» «انا مەن بالا» ورتالىعىنا ۇنەمى جاردەم قولىن، قايىرىمدىلىق شارالارىن ۇيىمداستىرىپ كەلەدى. ٴار توقسان سايىن «ازىرەت سۇلتان» مەشىتىنىڭ ايەل جاماعاتى ۇيىمداستىراتىن «قايىرىمدىلىق جارمەڭكەسىنەن» جيىلعان قاراجاتتىڭ تۇگەلدەي وسى ورتالىققا باعىتتالىپ، ناۋقاس سابيلەردىڭ ەم-دومىنا جۇمسالىپ كەلە جاتقانىنا دا ٴبىراز جىلدىڭ ٴجۇزى بولدى. قايىرىمدىلىق شاراسىندا وسى جايىندا ەرەكشە اتاپ وتكەن ورتالىق قىزمەتكەرلەرى «ازىرەت سۇلتان» مەشىتىنە ٴوز العىستارىن ٴبىلدىرىپ، ناۋرىزباي قاجى تاعان ۇلىنا ارنايى «العىس حات» تا تابىستادى.

شاراعا قاتىسقان اتا-انالار قاۋىمى دا «ازىرەت سۇلتان» مەشىتىنىڭ بۇگىنگى شاراسىنا ٴوز ريزاشىلىقتارىن ٴبىلدىرىپ، العىستارىن جاۋدىرىپ جاتتى. ٴتىپتى، ارنايى ورتاعا شىعىپ، اتا-انالار تاراپىنان راحمەت ايتىپ جاتقاندار دا بولدى. شارا سوڭىندا ناۋرىزباي قاجى تاعان ۇلى سىرقات سابيلەر ٴۇشىن ارنايى دۇعا جاساپ، سابيلەردىڭ تەزىرەك ساۋىعىپ، امان-ەسەن وتباسىلارىنا ورالۋىن تىلەدى.

سۋرەتتەردى «فوتوگالەرەيا» ايدارىنان كورە الاسىزدار!

date07.06.2018readCount881printباسىپ شىعارۋsourceLinkmuslim.kz





comments powered by hypercomments