«ازىرەت سۇلتان» مەشىتىندەگى جازعى ساۋات اشۋ كۋرسى باستالدى (فوتو)

بۇگىن استانا قالاسىنداعى رەسپۋبليكالىق «ازىرەت سۇلتان» مەشىتىندە جازعى ساۋات اشۋ كۋرسى ٴوز جۇمىسىن باستادى. 7 مەن 15 جاس ارالىعىنداعى 300 وقۋشى ەندى ٴۇش اپتا بويى ەلىمىزدىڭ باس مەشىتىندە ٴدىني ساۋات جەتىلدىرىپ، جازعى دەمالىستارىن پايدالى وتكىزەتىن بولادى. وسى ورايدا مەشىت ۇستازدارىنىڭ ماجىلىسىندە بەكىتىلگەن وقۋ جوسپارىنا سايكەس وتكىزىلەتىن قۇران الىپپەسى مەن يماندىلىق الىپپەسى، ادەپ جانە دۇعا ساباقتارى بۇلدىرشىندەردىڭ ٴدىني ٴبىلىم الىپ قانا قويماي، تاربيە مەن ادەپتىلىكتى بويىنا ٴسىڭىرىپ شىعۋىنا سەپتىگىن تيگىزەتىن بولماق.

«يماني جاز» دەپ اتالاتىن بۇل يگى شارانىڭ باستالۋىنا وراي بۇگىن ارنايى اشىلۋ سالتاناتى بولىپ ٴوتتى. شارا اياسىندا «ازىرەت سۇلتان» مەشىتىنىڭ نايب يمامى باقىتجان وتكەلبايەۆ قۇتتىقتاۋ لەبىزىن ٴبىلدىرىپ، بۇلدىرشىندەرگە ساتتىلىك تىلەدى. ال، باس مەشىتتەگى وقۋ-اعارتۋ جۇمىستارىنا جاۋاپتى نايب يمام قانات قىدىرمين اتا-انالار مەن وقۋشىلارعا بيىلعى جازعى ساۋات اشۋ كۋرسىنىڭ ەرەكشەلىكتەرى جايلى ٴتۇسىندىرىپ ٴوتتى. قمدب ٴتوراعاسىنىڭ ٴبىرىنشى ورىنباسارى، نايب ٴمۇفتي، «ازىرەت سۇلتان» مەشىتىنىڭ باس يمام ناۋرىزباي قاجى تاعان ۇلىنىڭ باستاماسىمەن بيىلعى جىلى جازعى لاگەرگە قابىلداناتىن بالالار سانى كوبەيىپ، سونداي-اق ارنايى وقۋ ەرەجەسى مەن باعدارلاماسى بەكىتىلىپ وتىر. بۇعان قوسا، جاستار ٴۇشىن جادىناما جاسالىپ، ٴبىلىم بەرۋ جۇيەسىنىڭ جاڭا دەڭگەيىن قالىپتاستىرۋعا كۇش سالىنۋدا.

ٴۇش اپتاعا سوزىلاتىن «يماني جاز» اياسىندا وقۋشىلار اراسىندا ٴتۇرلى ٴبىلىم جارىستارى مەن سۋرەت سايىستارىن ۇيىمداستىرۋ دا جوسپارلانىپ وتىر. وقۋشىلاردىڭ بويىنا وتانسۇيگىشتىك قاسيەتتى ٴسىڭىرىپ، تانىم كوكجيەگىن كەڭەيتە ٴتۇسۋ ماقساتىندا ەلوردامىزداعى مادەني ورىندارعا ارنايى ساياحات جاساۋ دا جوسپارعا ەنگىزىلگەن. بالالاردى ىنتالاندىرۋ ٴۇشىن وقۋ باعدارلاماسى بويى ارنايى جۇلدىزشالار تاراتالىپ، سوڭىندا كوپ جۇلدىزشا جيناعان ۇزدىكتەرگە جۇلدەلى سىيلىقتار تابىستالاتىن بولماق. ٴبىر سوزبەن ايتقاندا، رەسپۋبليكالىق «ازىرەت سۇلتان» مەشىتىندە قاسيەتتى رامازان ايىنا ٴدوپ كەلگەن «يماني جاز» جازعى ساۋات اشۋ كۋرسىن بۇلدىرشىندەرىمىز ٴۇشىن بارىنشا پايدالى وتكىزۋگە جان-جاقتى جاعداي جاسالىپ وتىر.

سۋرەتتەردى «فوتوگالەرەيا» ايدارىنان كورە الاسىزدار!

date28.05.2018readCount1047printباسىپ شىعارۋsourceLinkmuslim.kz





comments powered by hypercomments