ستۋدەنت جاستار «ازىرەت سۇلتان» مەشىتىندە اۋىز اشتى (فوتو)

بۇگىن استانا قالاسىنداعى جوو ستۋدەنتتەرى رەسپۋبليكالىق «ازىرەت سۇلتان» مەشىتىندەگى اۋىزاشار داستارحانىنا ارنايى شاقىرىلىپ، قۇرمەتتى قوناق بولدى. اللا رازىلىعى ٴۇشىن اۋىز بەكىتىپ، ورازا ۇستاعان ستۋدەنتتەر قاۋىمى «بەرەكەلى رامازان» داستارحانى اياسىندا ۋاعىز-ناسيحات تىڭداپ، رۋحاني تۇرعىدان دا نارلەنىپ قايتتى. ەلوردامىزداعى بەدەلدى ۋنيۆەرسيتەتتەر قابىرعاسىندا ٴبىلىم الىپ جاتقان جاستارمەن «ازىرەت سۇلتان» مەشىتى باس يمامىنىڭ كومەكشىسى جاندوس ٴتاجىمۇرات ۇلى كەزدەسىپ، جاستىق شاقتىڭ ٴقادىرى جايىندا تۇشىمدى وي تولعادى.

ارداقتى اللا ەلشىسى مۇحاممەد پايعامبارىمىزدىڭ (س.ع.س.) «كارىلىك كەلمەي تۇرىپ، جاستىق شاقتىڭ ٴقادىرىن ٴبىل!» دەگەن وسيەتىنەن  باستالعان تاعىلىمدى ۋاعىز ستۋدەنتتەر قاۋىمىنا ەرەكشە اسەرىن بەرىپ، بەرەكەلى كەشتىڭ تاعىلىمعا وتۋىنە سەپتىگىن تيگىزدى. جالىندى جاستىق شاقتى وقۋ-بىلىمگە ارناپ، دۇنيەلىك ٴارى اقىرەتتىك پايداسى بار يگى ىستەرگە جۇمساۋعا ۇندەگەن بۇگىنگى ۋاعىزدىڭ ەلوردامىزدىڭ بەلسەندى جاستارىنا تىڭ سەەرپىلىس بەرىپ، جاقسىلىققا جەتەلەي تۇسەرى دە انىق.

وسىلايشا، بەرەكەلى داستارحان ۇستىندە باس قوسىپ، شات-شادىمان كۇي كەشكەن جاستارعا كەش سوڭىنان «ازىرەت سۇلتان» مەشىتىنىڭ اتىنان رامازان ايىنىڭ قۇرمەتىنە وراي كىتاپتار ۇلەستىرىلىپ، قۇرما مەن تاتتىلەر تولتىرىلعان سىيلىق سومكەلەرى تارتۋ ەتىلدى.

سۋرەتتەردى «فوتوگالەرەيا» ايدارىنان كورە الاسىزدار!

date26.05.2018readCount817printباسىپ شىعارۋsourceLinkmuslim.kz





comments powered by hypercomments