«ۋاقىپ» قورى قازاقستان مۇسىلماندارى ٴدىني باسقارماسىنا اۆتوكولىك سىيلادى (فوتو-ۆيدەو)

بۇگىن «ۋاقىپ» كورپوراتيۆتىك قايىرىمدىلىق قورى قازاقستان مۇسىلماندارى ٴدىني باسقارماسى قىزمەتكەرلەرىنىڭ يگىلىگى ٴۇشىن  تەمىر تۇلپار تارتۋ ەتتى. قور پرەزيدەنتى قايرات ورىنباي ۇلى باستاعان توپ رەسپۋبليكالىق «ازىرەت سۇلتان» مەشىتىنە ارنايى كەلىپ، اۆتوكولىك كىلتىن سالتاناتتى تۇردە قمدب ٴتوراعاسىنىڭ ٴبىرىنشى ورىنباسارى، نايب ٴمۇفتي، «ازىرەت سۇلتان» مەشىتىنىڭ باس يمامى ناۋرىزباي قاجى تاعان ۇلىنا تابىستادى. قور اتىنان جاسالعان قايىرىمدىلىق شاراسىنا وراي ناۋرىزباي قاجى تاعان ۇلى ريزاشىلىعىن جەتكىزىپ، قمدب اتىنان العىس ٴبىلدىردى.

ايتا كەتەيىك، «jaس» ماركالى تەمىر تۇلپار قوستاناي ماشينا قۇراستىرۋ زاۋىتىنان شىققان وتاندىق ٴونىم بولىپ ەسەپتەلەدى. قاسيەتتى رامازان ايىندا جاسالىپ وتىرعان  بۇل يگى جاقسىلىق دەمەۋشى كاسىپكەرلەردىڭ قولداۋىمەن جۇزەگە اسىپ وتىر.

قايرات ورىنباي ۇلى، «ۋاقىپ» كورپوراتيۆتىك قايىرىمدىلىق قورىنىڭ پرەزيدەنتى:

«اۆتو» مەكەمەسىنىڭ وكىلدەرى رامازان ايىندا ٴبىزدىڭ «ۋاقىپ» قايىرىمدىلىق قورىنا كولىك سىيلاپ، ونى وسى يمان جولىندا جۇرگەن يمامدارعا، ٴدىني باسقارماعا قايىرىمدىلىق رەتىندە بەرىپ وتىر.

ٴبىزدىڭ قوردىڭ جۇمىس ىستەپ جاتقانىنا ٴقازىر 1 جىلدىڭ كولەمى بولدى. وتە كوپ كاسىپكەرلەر بىزگە وزىدىگىنەن كەلىپ، قول ۇشىن بەرۋگە نيەتتەنىپ وتىر. ودان ٴتۇسىپ جاتقان قاراجاتتاردىڭ كولەمى قوماقتى بولعاندىقتان سونىڭ ارقاسىندا بۇگىنگى كۇنى 355 يمامعا ماتەريالدىق كومەك كورسەتىپ وتىرمىز. ەكىنشى جاعىنان 170-تەي يمامدى بىلىكتىلىگىن كوتەرۋ ينستيتۋتىنا جىبەرىپ وتىرمىز. مۇنىڭ ٴبارى ەلباسىنىڭ رۋحاني جاڭعىرۋ جولداۋى اياسىندا ٴجۇرىپ جاتقان شارالار».

 

date23.05.2018readCount1403printباسىپ شىعارۋsourceLinkmuslim.kz





comments powered by hypercomments