ناۋرىزباي قاجى تاعان ۇلى: رامازان مۇباراك بولسىن! (ۆيدەو)

اسا قامقور، ەرەكشە مەيىرىمدى اللانىڭ اتىمەن باستايمىن!

ادامزات بالاسىن تۋرا جولعا باستاۋشى قۇران كارىمنىڭ العاشقى قۇتتى اياتتارى تۇسە باستاعان قاسيەتتى رامازان ايى دا كەلىپ جەتتى. بارشامىز اسىعا كۇتكەن رامازان – يگىلىك پەن بەرەكە، كەشىرىم جانە مەيىرىم ٴھام قايىرىمدىلىق ايى. ول جايىندا «باقارا» سۇرەسىنىڭ 185-اياتىندا: «رامازان – ادامدارعا تۋرا جول نۇسقاۋشى، اق پەن قارانى ايىرۋشى، بەكەم تۇتىناتىن جولباسشى رەتىندە قۇران تۇسىرىلە باستاعان اي. رامازان ايى تۋعانىن كورگەن ادام بىردەن ورازا ۇستاسىن. ەگەر بىرەۋلەر اۋرۋ بولىپ، ايتپەسە جول ساپاردا جۇرسە، وندا باسقا كۇندەردە وتەسىن»، – دەپ جازىلعان.

رامازان ايىندا ورازا ۇستاعان باۋىرلارىمىزدىڭ ۇلىق عيباداتتارى ارقىلى ٴوز پەندەشىلىگىن سەزىنىپ، مۇسىلمانعا ٴتان سابىر مەن توزىمدىلىكتىڭ شىنايى ۇلگىسىن كورسەتەدى. ٴوزارا سۇحباتتار، تاراۋيح نامازدارى، كۇندىزگى قۇلشىلىقتار مۇسىلمان قاۋىمىن بىرىكتىرىپ، جاڭا رۋحاني جەتىستىكتەرگە باستايدى. اسىرەسە، اۋىزاشار داستارحاندارى ەرەكشە الەۋمەتتىك جانە رۋحاني بايىتا تۇسەتىن زور مانگە يە. رامازان ايىندا مۇمكىندىگى بار مۇسىلماندار مۇقتاج جاندارعا قارايلاسىپ، كومەك بەرۋدىڭ، قايىرىمدىلىق پەن باۋىرمالدىقتىڭ ۇزدىك ۇلگىسىن كورسەتەدى.

سۇيىكتى پايعامبارىمىزدىڭ (س.ع.س.) حاديس-شارىپىندە: «رامازان ايى ٴجانناتتىڭ ەسىكتەرى ايقارا اشىلعان، ٴجاھاننام ەسىكتەرى تارس جابىلعان، ازعىن شايتاندار شىنجىرمەن كىسەندەلگەن مۇباراك اي»، – دەپ پاش ەتىلگەن. 

قۇرمەتتى، مۇسىلمان باۋىرلار! اللا تاعالا بارشامىزدىڭ وسى ايدا جاسايتىن عيبادات-قۇلشىلىقتارىمىزدى قابىل ەتكەي! مۇباراك رامازان بارشاڭىزعا قۇتتى، كۇللى يسلام الەمىنە قايىرلى دا بەرەكەلى بولعاي!

ايلاردىڭ سۇلتانى قاسيەتتى رامازان ايى مۇباراك بولسىن! ونى وزىنە لايىقتى قۇلشىلىقپەن تيىسىنشە جوعارى دەڭگەيدە وتكىزۋ ارقىلى اللا تاعالانىڭ راحىمى مەن مەيىرىمىنە بولەنىپ، مول ساۋاپ الۋدى بارشامىزعا ٴناسىپ ەتكەي! ٴاۋمين!

date16.05.2018readCount1023printباسىپ شىعارۋsourceLinkmuslim.kz





comments powered by hypercomments