باس مەشىت شاكىرتتەرىنە سەرتيفيكات تابىستالدى (فوتو)

بۇگىن استانا قالاسىنداعى رەسپۋبليكالىق «ازىرەت سۇلتان» مەشىتىندە وقۋ جىلىنىڭ اياقتالۋىنا وراي «ٴدىني ساۋات اشۋ كۋرسىنىڭ» شاكىرتتەرىنە سەرتيفيكات تابىستاۋ ٴراسىمى بولىپ ٴوتتى. شارا شىمىلدىعىن اشقان قمدب ٴتوراعاسىنىڭ ٴبىرىنشى ورىنباسارى، «ازىرەت سۇلتان» مەشىتىنىڭ باس يمامى ناۋرىزباي قاجى تاعان ۇلى جيىلعان جاماعاتتى قاسيەتتى جۇما كۇنىمەن قۇتتىقتاپ ٴوتىپ، ٴبىلىم ۇيرەنۋدىڭ ماڭىزدىلىعىنا توقتالدى. «تال بەسىكتەن جەر بەسىككە دەيىن ٴىلىم ىزدە» دەگەن پايعامبار (س.ع.س.) وسيەتىنە ساي اسىل ۋاقىتتارىن بوسقا جۇمساماي، ٴاربىر ٴارپى ساۋاپقا تۇنعان قاسيەتتى قۇران جاتتاۋعا ارناعان شاكىرتتەر قاۋىمىنا ٴوز العىسىن ٴبىلدىرىپ، جىلى لەبىزىن جەتكىزدى.

ەلباسىمىز ن.ٴا.نازاربايەۆتىڭ «بۇل مەشىت قۇلشىلىق ورنى عانا ەمەس، ٴبىلىم-عىلىمنىڭ، مادەنيەتتىڭ ورداسى بولۋى ٴتيىس» دەگەن سوزىنە بۇگىنگى تاڭدا تولىعىمەن ساي كەلىپ تۇرعان «ازىرەت سۇلتان» مەشىتىندەگى ٴبىلىم بەرۋ جۇيەسى جايلى تانىستىرىپ، جالپى ماعلۇمات بەرىپ وتكەن ناۋرىزباي قاجى تاعان ۇلى ۇستازدار قاۋىمىنا دا شىنايى ريزاشىلىعىن ٴبىلدىرىپ، ارنايى «العىس حاتپەن» ماراپاتتادى.

سونداي-اق، بيىلعى جىلى ناۋرىزباي قاجى تاعان ۇلىنىڭ باستاماسىمەن العاش رەت ۇستازدار قاۋىمى اراسىندا ۇزدىك ناتيجە كورسەتىپ، ەڭ كوپ شاكىرت تاربيەلەگەن مەشىت قىزمەتكەرىنە «ۇزدىك ۇستاز» اتاعىن بەرىلىپ، ىنتالاندىرۋ ماقساتىندا ارنايى «ديپلوم» تابىس ەتىلدى. تۇڭعىش رەت بەرىلىپ وتىرعان «ۇزدىك ۇستاز» اتاعى نايب يمام عازيز احمەتكە بۇيىردى.

بيىلعى جىلى ٴدىني ساۋات اشۋ كۋرسىنىڭ وقۋ باعدارلاماسىن ٴتامامداعان 361 شاكىرتكە بۇگىن ارنايى مەشىت سەرتيفيكاتى تاپسىرىلدى. ولاردىڭ ٴ218-ى ەر شاكىرتتەر بولسا، اقجاۋلىقتىلار 143 جان ٴدىني ساۋاتىن اشقان. شاكىرتتەر وقۋ جىلى اياسىندا «قۇران الىپپەسىن» ٴتامامداپ، سونداي-اق، «عيبادات» جانە «اقيدا» ساباقتارى بويىنشا دا ٴبىلىم الىپ شىققان.

بۇدان بولەك، مەشىت باسشىلىعىنىڭ ۇيىمداستىرۋىمەن شاكىرتتەر اراسىندا ٴتۇرلى ٴبىلىم جارىستارى، سپورتتىق ويىندار مەن ۇجىمدىق سەرۋەندەر ۇيىمداستىرىلىپ، ىنتىماق پەن بىرلىككە ۇيىسقان جاماعات قالىپتاستىرۋ جولىندا ىرگەلى ىستەر اتقارىلىپ كەلەدى. سونىڭ ٴبىرى رەتىندە مەشىت شاكىرتتەرى اراسىندا تۇراقتى تۇردە وتكىزىلىپ كەلە جاتقان «قۇران جارىسىن» ەرەكشە ايتساق بولادى. مەشىت شاكىرتتەرىنەن قۇرالعان «سۇلتان» كومانداسىنىڭ بيىلعى جىلى «سالاۋاتتى جاماعات» v قالالىق سپورتتىق ويىندار جارىسىندا جەڭىمپاز اتانىپ، توپ جارعانى دا – ٴبىر ٴۇيدىڭ بالاسىنا اينالدىرعان بىرلىك پەن ىنتىماقتىڭ ناتيجەسى ەكەنى ٴسوزسىز.

سۋرەتتەردى «فوتوگالەرەيا» ايدارىنان كورە الاسىزدار!

date11.05.2018readCount1309printباسىپ شىعارۋsourceLinkmuslim.kz





comments powered by hypercomments