باس ٴمۇفتي قاسيەتتى اي قارساڭىندا جاس قاريلارمەن كەزدەستى (فوتو)

بۇگىن قازاقستان مۇسىلماندارى ٴدىني باسقارماسىنىڭ ٴتوراعاسى سەرىكباي قاجى وراز ٴمۇفتيات جانىنداعى «قاۋام ٴاد-دين ال-يتقاني ٴال-فارابي ات-تۇركىستاني» رەسپۋبليكالىق قاريلار دايىنداۋ ورتالىعىندا جۋىردا قاسيەتتى قۇراندى تولىق جاتتاپ شىققان جاس قاريلارمەن كەزدەستى. اقمولا وبلىسى، قورعالجىن اۋدانى، سابىندى اۋىلى، ٴلاززات اتىنداعى مەدرەسەدە وتكەن كەزدەسۋگە قمدب استانا قالاسىنىڭ وكىل يمامى اسقار مۇقانوۆ، وسى ورتالىقتىڭ ديرەكتورى ٴسادۋاقاس قاري ولجاباي، ەلورداداعى «ٴالجان انا» مەشىتىنىڭ باس يمامى قاليجان قاجى زاڭقوەۆ قاتىستى.

«اللا تاعالا كەز كەلگەن پەندەسىنە قۇراندى تولىق جاتتاپ شىعۋ نىعمەتىن ٴناسىپ ەتە بەرمەيدى. بۇل – ۇلكەن باقىت. قاري ادامنىڭ مىنەز-قۇلقى دا قۇرانعا ۇقساۋى ٴتيىس. قاري بولۋ – ۇلكەن جاۋاپكەرشىلىك ٴارى كوپ ادامعا بۇيىرا بەرمەيتىن نىعمەت. ال سىزدەر وسىناۋ باقىتقا كەنەلىپ وتىرسىزدار. اللا تاعالا زەيىندەرىڭىزدى ارتتىرسىن. ٴقازىر ٴبىز ەلىمىزدە قاريلار سانىن ارتتىرۋ ماقساتىندا ۇلكەن يگى جوبالاردى جۇزەگە اسىرىپ كەلەمىز. جۋىردا الماتىدا vii رەسپۋبليكالىق قاريلار جارىسىن ۇيىمداستىردىق. ماقساتىمىز – قۇران جاتتاعان جانداردى جىگەرلەندىرىپ، ولاردىڭ قاتارىن ارتتىرۋ»، – دەدى سەرىكباي قاجى ساتىبالدى ۇلى.

كەزدەسۋ سوڭىندا باس ٴمۇفتي قاريلار مەن ولاردىڭ ۇستازدارىنا، ٴدىن جاناشىرلارىنا ٴوزىنىڭ العىس حاتىن تابىستاپ، جىلى لەبىزىن جەتكىزدى.


 
date10.05.2018readCount737printباسىپ شىعارۋsourceLinkقمدب ٴباسپاسوز قىزمەتى





comments powered by hypercomments