باس يمام ارداگەر اقساقالدى جەڭىس مەرەكەسىمەن قۇتتىقتادى (فوتو)

Бас имам ардагер ақсақалды Жеңіс мерекесімен құттықтады (ФОТО)

بۇگىن رەسپۋبليكالىق «ازىرەت سۇلتان» مەشىتى استانا قالاسىنداعى ارداگەر اقساقالداردى زيارات ەتىپ، جەڭىس مەرەكەسىمەن قۇتتىقتاپ قايتتى. قمدب ٴتوراعاسىنىڭ ٴبىرىنشى ورىنباسارى، «ازىرەت سۇلتان» مەشىتىنىڭ باس يمامى ناۋرىزباي قاجى تاعان ۇلى ٴوزى باس بولىپ، مەشىت قىزمەتكەرلەرى اسىلدىڭ سىنىعىنداي از قالعان ارداگەر قاريالاردى قۇتتىقتاپ، ٴىزى دۇعالارى مەن ٴىلتيپات-سىيلىقتارىن تارتۋ ەتىپ قايتتى.

كەشەگى قانقۇيلى كۇندەردىڭ كەلمەسكە كەتكەنىن ايگىلەپ، بەيبىت زاماندا ٴومىر ٴسۇرىپ جاتقانىمىزعا تاعى ٴبىر جىل قوسىلعانىن پاش ەتەتىن جەڭىس مەرەكەسىنىڭ ٴمان-ماڭىزى، قادىر-قاسيەتى بۇگىنگى ۇرپاق – بىزدەرگە بەيمالىمدەۋ بولعانىمەن، قاريالار ٴۇشىن بۇل وتتى كۇننىڭ ورنى ايرىقشا. ويتكەنى، بۇل كۇن ٴۇشىن ولار قانشاما ازاپتى باستان كەشىرىپ، ٴومىر مەن ٴولىمنىڭ اراسىندا، وت پەن وقتىڭ ورتاسىندا ٴجۇرىپ كۇرەستى. بۇل كۇن ٴۇشىن باتىر اتالارىمىز مايدان دالاسىندا نامىستىڭ وتىن لاۋلاتسا، بۇل كۇن ٴۇشىن تىلداعى كۇللى قازاق دالاسى ەڭبەكتىڭ كورىگىن قىزدىردى. سۇم سوعىستىڭ سالماعى باسىپ-جانىشتاعاندا، ەڭبەك مايدانىنداعى ەرلىكتەردىڭ دە ەرەسەن ۇلگىسى بوي كوتەردى ەمەس پە؟!

نايب ٴمۇفتي ناۋرىزباي قاجى تاعان ۇلى باستاعان توپتىڭ بۇگىنگى مەرەيلى مەرەكەمەن قۇتتىقتاپ، زيارات ەتىپ شىققان ورمان ۇلى مالىك اقساقال دا وتتى جىلداردىڭ سالماعىن ەڭبەك مايدانىندا سەزىنىپ، قابىرعاسى قاتپاي جاتىپ قارا جۇمىسپەن تانىسقانىن ەسكە الادى. يا، ول زامان ەشكىمنىڭ باسىنان سيپامادى. الايدا، جاستايىنان كورگەن قيىنشىلىقتىڭ اسەرىنەن اقساقالدىڭ اياعى دا باسقىزباي، اقىر سوڭىندا ەكىنشى توپتاعى مۇگەدەكتىككە جەتكىزىپ تىنعان ەكەن. كوزىن ەڭبەكپەن تىرناپ اشىپ، ٴبىر ٴتۇيىر نان قوقىمىن قادىرلەپ وسكەن قاريا بۇگىنگى تاڭدا ارنايى ۇكىمەت شەشىمىمەن ۇلى وتان سوعىسى ارداگەرى دارەجەسىنە تەڭەستىرىلگەن ەكەن.

كورگەنى مەن تۇيگەنى مول اقساقال كەشەگى قيىن-قىستاۋ زاماننان ەستەلىك ايتىپ، ەلدىڭ سول كەزدەگى ىنتىماق-بىرلىگى مەن قايرات-قاجىرى جايىندا سىر شەرتتى. قاريانىڭ اق باتاسى دا بەيبىت كۇنىمىزدىڭ بۇزىلماۋىنان باستالىپ، ەلىمىز بەن جەرىمىزدىڭ، ٴدىنىمىزدىڭ تىنىشتىعى بۇلىنبەۋىن سۇراۋمەن اياقتالىپ جاتتى. نايب ٴمۇفتي ناۋرىزباي قاجى تاعان ۇلى دا اقساقالعا ىزگى تىلەگىن ٴبىلدىرىپ، عيبراتقا تولى عۇمىرىن ۇزاق بولۋىنا دۇعا جاسادى.

سۋرەتتەردى «فوتوگالەرەيا» ايدارىنان كورە الاسىزدار!

date09.05.2018readCount809printباسىپ شىعارۋsourceLinkmuslim.kz





comments powered by hypercomments