تاتۋلىق – تابىلماس باقىت

Татулық – табылмас бақыт

اسا قامقور ەرەكشە مەيىرىمدى اللانىڭ اتىمەن باستايمىن!

جۇرتىمىز مامىراجاي مامىردىڭ العاشقى كۇنىندە قازاقستان حالىقتارىنىڭ بىرلىگى مەرەكەسىن ايرىقشا اتاپ وتەدى. بۇل – كوپۇلتتى، كوپكونفەسسيالى ەلىمىزدىڭ بىرلىگى مەن بەرەكەسىن ارتتىرا تۇسەتىن اسا ماڭىزدى مەيرام.

ادام ومىرىنە ٴقاۋىپ توندىرگەن سىندارلى كەزەڭنىڭ سىن-قاتەرىمەن بەتپە-بەت كەلگەن بۇگىنگى الەمدىك قاۋىمداستىق، ونىڭ ىشىندە قازاق ەلى ٴۇشىن بىرلىك پەن بەيبىتشىلىك – باستى بايلىق، باعا جەتپەس قۇندىلىق.

«توزعان قازدى توپتانعان قارعا الا­دى»، – دەيدى حالقىمىز. ادامزات تا­ري­حى­نان قاي ەلدە بىرلىك جوعالسا، سول جەردە جەڭىلىس بولعانىن بىلەمىز. دوستىق پەن تاتۋلىق ىنتىماققا ۇيىسقان ەلدە عانا باياندى بولادى.

جاراتۋشى جاببار يەمىز قاسيەتتى قۇراندا بارشا ادامزات بالاسىنا: 

«اللانىڭ جىبىنەن مىقتاپ ۇستاڭدار، اجىراپ بولىنبەڭدەر» («ٴالي-يمران» سۇرەسى، 103-ايات)، – دەپ بۇيىرعان. ال، پايعامبارىمىز مۇحاممەد (وعان اللانىڭ سالاۋاتى مەن سالەمى بول) مۇسىلمان ۇمبەتىنە جولداعان قوشتاسۋ سوزىندە: «مەن ورتالارىڭنان كەتكەننەن كەيىن باياعى بىتپەيتىن ۇرىس-كەرىسكە، داۋ-دامايعا قايتا بوي الدىرماڭدار»، – دەپ وسيەت قالدىرعان.

ٴبىزدىڭ جاس تاۋەلسىز ەلىمىز ەلباسىمىز نۇرسۇلتان نازاربايەۆتىڭ يگى دە تاريحي باستاماسىمەن الىس-جاقىننىڭ اراسىن جاراستىرىپ، ٴدىنى بولەك ٴدىني كوشباسشىلاردى ٴبىر دوڭگەلەك ۇستەل باسىنا بىرىكتىرگەن بىتىمگەر مەملەكەتكە اينالدى. قازىرگى قوعامدا قالىپتاسقان ٴوزارا قۇرمەت پەن سىيلاستىقتى نىعايتا ٴتۇسۋ ٴۇشىن بارشا ازاماتقا ۇلكەن جاۋاپ­كەرشىلىك ارتىلادى.

ادامدار اراسىنداعى تاتۋلىقتىڭ نەگىزگى تىرەگى – ٴوزارا سۇيىسپەنشىلىك پەن باۋىرمالدىقتا. ارداقتى پايعامبارىمىز (وعان اللانىڭ سالاۋاتى مەن سالەمى بولسىن) ٴبىر حاديسىندە: 

«يمان ەتپەيىنشە جۇماققا كىرە المايسىڭدار، بىر-بىرلەرىڭدى جاقسى كورمەيىنشە، يمان ەتكەن بولمايسىڭدار»، – دەگەن. اباي قۇنانباي ۇلىنىڭ وسيەت ولەڭى دە وسىعان سايادى: «ادام­زاتتىڭ ٴبارىن ٴسۇي باۋىرىم دەپ...».

جاھاندانۋ زامانىندا سان ٴتۇرلى ۇلتتىڭ بەرەكەلى تىر­لىكتە، ىنتىماق-بىرلىكتە ٴومىر ٴسۇرۋىنىڭ باستى جولى – ىزگىلىك پەن مەيىرىمدە.

ۇلى باقىتقا يمانىمەن تالپىنعان رۋداكيدىڭ:

«ٴومىر – تەڭىز، وندا جۇزەم دەمەڭىز،
ىزگىلىكتەن جاسالماسا كەمەڭىز»، – دەگەن ٴسوزى قاي قوعامعا بولسىن قۋات بەرەتىنى حاق.

اللا تاعالا حالقىمىزدىڭ ىنتىماعىن نىعايتىپ، بىرلىگىن بەكەم ەتكەي! ٴامين!

سەرىكباي قاجى وراز، 
قازاقستان مۇسىلماندارى ٴدىني باسقارماسىنىڭ ٴتوراعاسى، باس ٴمۇفتي

date30.04.2018readCount764printباسىپ شىعارۋsourceLinkmuftyat.kz





comments powered by hypercomments