«بيىل ورازا ۇستامايمىن...»

abai.kz سايتىندا باس ٴمۇفتي ەرجان قاجى مالعاجى ۇلىنىڭ قاسيەتتى رامازان ايىمەن قۇتتىقتاۋى جاريالانعان. اۋىز بەكىتۋدىڭ ارتىقشىلىعى مەن ساۋابى جازىلىپ، ال ورازا ۇستاۋعا شاماسى كەلمەيتىن قاريالارىمىزدى، ناۋقاس جانداردى قايىرىمدىلىق جاساۋعا ۇندەگەن قۇتتىقتاۋ ماقالاعا وراي پىكىر (ٴماتىندى وزگەرىسسىز بەرىپ وتىرمىز – ا.ق.) بىلدىرگەن بەلگىسىز ٴبىر كىسى: «بيىل ورازا ۇستامايمىن. تاماق قىمبات. دۇرىس اۋقاتتانباعاسىن ۇستاعان. ارجەردە قۇلاپ اشبۇراتىلىپ جۇرەتىن جاعدايىم جوق»، – دەپتى (سۋرەتتى قاراڭىز).

راسىندا، ورازا – يماندى سىنايتىن ۇلى قۇلشىلىق ەكەن. بيىلعى شىلىڭگىر شىلدەنىڭ ىستىعى دا يماندى شايقالتقان سىڭايلى.

ٴبىزدىڭ ايتايىن دەگەنىمىز باسقا بولاتىن. سوماليدە تۇراتىن ٴبىر مۇسىلماننىڭ جازعان حاتى حاقىندا ەدى. ساۋد ارابياسىنىڭ شەيح-عالىمى ەفيردە كورەرمەندەر سۇراعىنا جاۋاپ بەرىپ جاتادى. باعدارلاما قوناعىنا ساۋال جولداعان سومالي مۇسىلمانى بىلاي دەيدى: «سارەسى مەن اۋىزاشاردا جەيتىن ەشتەڭە جوق. مۇنداي كەزدە ورازا ۇستاۋعا بولا ما؟» بۇعان جاۋاپ بەرە الماي، كوڭىلى بوساعان شەيح كوز جاسىنا ەرىك بەرىپتى (سۋرەتتى قاراڭىز).

كەيدە الدىمىزعا اس-سۋىمىز ۋاقىتىلى كەلمەي قالسا، سابىر، ٴتوزىم، شۇكىر دەگەن ادامي قاسيەتتەردى «شەتكە ىسىرىپ» قويامىز. ال افريكاداعى اشارشىلىقتى ويلاساق، قازىرگى جاعدايىمىزعا قاراپ، شۇكىر ايتپاۋعا «شارا» جوق.

ٴقازىر مەشىتتەردە جومارت جانداردىڭ دەمەۋشىلىگىمەن كۇن سايىن 500-600 ادامعا دەيىن اۋىزاشار بەرىلىپ كەلەدى. اۋىزاشار بەرۋشىلەر كوپ. ٴبىراق يفتار ۇيىمداستىراتىن بوس كۇن جوق. قانداي عانيبەت! قۇدايعا شۇكىر، مولشىلىق زامان عوي. تىم بولماعاندا كۇندەلىكتى تىسكە باسار بىردەڭە تابىلادى. وعان دا ٴتاۋبا دەيمىز.  

ال ەندى «تاماق قىمبات، اشپىن» دەپ قوڭىرقاي تىرشىلىگىمىز ٴۇشىن ارتىق اۋىز ٴسوز ايتىپ، «ورازا ۇستامايمىن» دەۋىمىز ۇيات-اۋ. ٴناپاقامىز بىرىنە جەتىپ، بىرىنە جەتپەي جاتسا، ول دا اللاعا شىنايى شۇكىرشىلىك ايتۋعا تۇراتىن تاعدىر ەمەس پە؟ دەنىمىز ساۋ، بالا-شاعا امان، اياق-قولىمىز ٴبۇتىن دەگەندەي... ىزگى ادامدار باسىنا سىناق كەلگەندە: «بۇدان دا جامانى بولار ەدى عوي»، – دەپ ٴوزىن جۇباتادى ەكەن. بۇعان دا ساۋاپ جازىلماق.

پايعامبارىمىز مۇحاممەد (اللانىڭ وعان سالاۋاتى مەن سالەمى بولسىن): «ٴمۇمىننىڭ ٴىسى قانداي عاجاپ! راسىندا ونىڭ بارلىق امالى قايىرلى. بۇل – مۇمىننەن باسقاعا بۇيىرماعان باقىت. ەگەر ونىڭ باسىندا قۋانىش بولسا، اللاعا شۇكىر ەتەدى. سول ٴۇشىن ساۋاپ-سىيعا كەنەلەدى. ەگەر وعان ٴبىر سىناق كەلسە، وعان سابىر ەتەدى. وعان دا ساۋاپ الادى. اللانىڭ مۇسىلمانعا جازعان ٴاربىر تاعدىرى قايىرلى»، – دەپتى.

رامازاننىڭ بىتۋىنە دە ساناۋلى كۇندەر قالدى. قاسيەتى مەن ٴقادىرى مول ايمەن قول بۇلعاپ، قوشتاسقالى تۇرمىز.

رامازان – يگى ىستەرىمىز بەن شالىس باسقان قادامدارىمىزعا، پەندەلىكپەن جاساعان قاتە-كەمشىلىكتەرىمىزگە ەسەپ بەرەتىن بەينە ٴبىر بەلەس ايى ەكەن. رامازان – ومىرلىك جوسپار قۇراتىن مەجەلى ماۋسىم. رامازان – رۋحاني جاڭارۋ كەزەڭى.

رامازان – پاتشا مەن پاقىردى، باي مەن مۇقتاج ادامدى تەڭەستىرەتىن تەڭدىك ايى. رامازان – اعايىن اراسىن جاقىنداستىرا تۇسەتىن بىرلىك ايى.  رامازان – مەدرەسە ايى. رامازان – پەندەنىڭ كەۋدەسىنە ٴتالىم مەن تاعىلىم، تاقۋالىق پەن يمان، مەيىرىم قۇيىلاتىن قۇلشىلىق ايى. رامازان – قوس دۇنيەنىڭ باقىت كىلتى – قۇران ايى. وسىلاي جالعاستىرا بەرۋگە بولادى.           

مورال وقىپ كەتتى دەمەڭىز. بىزدىكى – دىننەن ٴبىر ناسيحات ايتۋ عوي. قاشان دا قايىرلى، ىزگى ىستەرىمىز قابىل بولعاي! 

اعابەك قونارباي ۇلى
date11.07.2015readCount6069printباسىپ شىعارۋ