سالاۋات – ساراڭدىقتان ساقتايدى

بىردە اللا ەلشىسى (س.ع.س.) قىزى فاتيماعا (ر.ا.) : «ادامدار ىشىندە ەڭ ساراڭى كىم دەپ ويلايسىڭ؟» – دەپ سۇراعان ەكەن. فاتيما (ر.ا) انامىز: «اللا تاعالا ٴناسىپ ەتكەن داۋلەتتەن ساداقا بەرمەيتىن ادامدى ەڭ ساراڭ دەۋگە بولار»، – دەيدى. سوندا پايعامبارىمىز (س.ع.س.): «جوق، مەنىڭ اتىم اتالعان جەردە ماعان سالاۋات ايتپاعاندار. مىنە، سولار – ناعىز ساراڭدار!» – دەگەن ەكەن.

جالپى، ەكى دۇنيە سۇلتانى بولعان مۇحامەد (س.ع.س.) پايعامبارىمىزدىڭ ەسىمىن ەستىگەندە  سالاۋات ايتىپ، سالەم جولداۋ – بارشا مۇسىلمانعا مىندەت بولىپ سانالاتىن ىستەردىڭ ٴبىرى. ۇمبەتىنە ۇلگى بولىپ، سۇننەتىمەن سارا جول قالدىرعان سۇيىكتى ەلشىگە (س.ع.س.) سالاۋات ايتقان ادامنىڭ ساۋاپقا كەنەلەتىنى تاعى بار. بۇل جايىندا اللا ەلشىسىنىڭ ٴوزى بىلاي دەيدى: «ماعان ٴبىر رەت سالاۋات ايتقان كىسىگە اللا تاعالا ون ساۋاپ جازادى». دەمەك، ٴبىر ٴسات ۋاقىتىمىزدى قيىپ، ٴبىر اۋىز سالاۋات جولداساق، جاراتۋشى قۇزىرىندا ساۋاپ جينايدى ەكەنبىز. قاسيەتتى قۇران كارىمنىڭ «احزاب» سۇرەسىندە اللا تاعالا: «راسىندا اللا، پايعامبارعا راحىم ەتەدى. جانە پەرىشتەلەر سالاۋات ايتادى. ٴاي، مۇمىندەر! وعان سالاۋات جانە ىقىلاسپەن سالەم كەلتىرىڭدەر»، – دەپ ٴامىر ەتەدى.  

يسلام عۇلامالارى ٴاربىر مۇسىلمان بالاسىنا ومىرىندە ٴبىر سالاۋات ايتۋ – پارىز دەپ بەكىتكەن. ال، ونىڭ (س.ع.س.) اتىن ەستىگەندە، جازعاندا، وقىعاندا  سالاۋات ايتۋ – ٴۋاجىپ، كەيىننەن قايتالاۋ – سۇننەت امال بولىپ تابىلادى.

اقيقاتىندا، كوركەم مىنەزدى كەمەلىنە كەلتىرىپ، پايعامبارلار پاديشاسى اتانعان مۇحامەد مۇستافا (س.ع.س.) وزىنە ايتىلعان سالاۋاتقا مۇقتاجدىعى جوق. كەرىسىنشە، ٴبىز وعان سالاۋات ايتىپ، سالەم جولداۋ ارقىلى اللا تاعالا قۇزىرىندا مارتەبەمىز جوعارىلاپ، كەشىرىمگە يە بولامىز. ويتكەنى، اللا ەلشىسىنە (س.ع.س.) سالاۋات جولداپ، وعان جانە ونىڭ وتباسىنا بەرەكە مەن تىنىشتىق تىلەۋ – جۇرەگىمىزدى نۇرعا بولەپ، سۇيىسپەنشىلىك سەزىمىن وياتادى. ال، اللا ەلشىسىن سۇيگەن ادامنىڭ جۇرەگى كىردەن تازارىپ، نۇرلانا تۇسەتىنى ٴسوزسىز.

ٴابۋ ٴداردادان جەتكەن ٴبىر حاديستە پايعامبارىمىز (س.ع.س.) بىلاي دەيدى: «كىمدە-كىم تاڭعى جانە كەشكى ۋاقىتتاردا ماعان ارناپ ون رەت سالاۋات ايتىپ، سالەم جولدايتىن بولسا، قيامەت كۇنى مەنىڭ شاپاعاتىما بولەنەدى».  ال، الەمنىڭ راقىم نۇرى، ەكى دۇنيە ساردارىنىڭ اتىن ەستي تۇرا، سالاۋاتقا ساراڭدىق تانىتقان جاننىڭ تاۋلار جۇندەي ٴتۇتىلىپ، كولدەر قۇمعا جۇتىلىپ، اناسى بالاسىنان بەزەتىن اقىرەت كۇنى ورناعاندا، وكىنىشتەن وپىق جەپ، سان سوعىپ قالارى اقيقات. سوندىقتان دا سىناق ٴومىردىڭ ٴار ٴساتىن ساۋاپقا ارناپ، سۇيىكتى ەلشىمىز (س.ع.س.) ايتقانداي ساراڭدىقتان ساقتانايىق!

سالاۋات ايتۋ ۇنامدى بولاتىن ورىندار مەن ۋاقىتتار 

ازان ايتىلعان كەزدە ازانشىنىڭ سوزدەرىن قايتالاپ بولعان سوڭ ارتىنشا سالاۋات ايتۋ. پايعامبارىمىز (س.ع.س.) ٴبىر سوزىندە: «ەگەر ازان ەستىگەن بولساڭدار، دەرەۋ ازانشىنىڭ ٴسوزىن قايتالاپ وتىرىڭدار دا، ارتىنشا ماعان «ٴاللاھۋمما ساللي ٴالا مۇحاممادين ٴۋا ٴالا الي مۇحامماد، كاما ٴساللايتا ٴالا ٴيبراھيما ۋا ٴالا الي يبراھيم، ينناكا حامييدۋن ٴماجييد» دەپ سالاۋات ايتىڭدار...»، – دەپ وسيەت ەتكەن.

دۇعانىڭ الدىندا جانە سوڭىندا سالاۋات ايتۋ. نەگىزىندە، ٴاربىر دۇعا ەتۋشى ادام اۋەلى اللا تاعالاعا ماداق ايتىپ، ەكىنشى ونىڭ پايعامبارىنا (س.ع.س.) سالاۋات ايتىپ، سونان سوڭ بارىپ ٴوز قالاعانىن سۇراپ، ارتىنان تاعى دا پايعامبارىمىزعا (س.ع.س.) سالاۋات ايتۋى كەرەك. پايعامبارىمىز بۇل جونىندە بىلاي دەگەن: «ەكى سالاۋات اراسىندا ايتىلعان دۇعا مىندەتتى تۇردە قابىل بولادى».

جۇمانىڭ كۇنى مەن تۇنىندە سالاۋاتتى كوبىرەك ايتۋ.

ونىڭ اتى اتالعاندا، جازىلعاندا جانە اتىن ەستىگەندە سالاۋات ايتۋ. بۇعان پايعامبارىمىزدىڭ (س.ع.س.) تيرميزيدەن جەتكەن مىنا ٴبىر ٴحاديسى دالەل: «مەنىڭ اتىم اتالعان جەردە ماعان سالاۋات ايتپاعان ادام وڭباي كەتسىن».

تاڭعى جانە كەشكى ۋاقىتتاردا سالاۋاتتى كوبىرەك ايتۋ. بۇل جونىندە ارداقتى ساحابا ٴابۋ ٴداردا (ر.ا) اقيىق ەلشىنىڭ (س.ع.س.) مىنا ٴبىر ٴحاديسىن جەتكىزەدى: «كىمدە-كىم تاڭعى جانە كەشكى ۋاقىتتاردا ماعان ارناپ ون رەت سالاۋات ايتىپ، سالەم جولدايتىن بولسا، قيامەت كۇنى مەنىڭ شاپاعاتىما بولەنەدى».

مەشىتكە كىرگەندە جانە شىعىپ كەلە جاتقاندا. پايعامبارىمىز (س.ع.س.): «مەشىتكە كىرەردە «بيسميللاھ، ٴالحامدۋليللاھ، ٴۋاس ٴسالاتۋ ٴۋاس ٴسالامۋ ٴالا راسۋليللاھ، ٴاللاھۋمماعفيرلي ٴزانبي ٴۋافتاح لي ٴابۋابي راحماتيك» دەپ جانە شىعاردا «بيسميللاھ، ٴالحامدۋليللاھ، ٴۋاس ٴسالاتۋ ٴۋاس ٴسالامۋ ٴالا راسۋليللاھ، ٴاللاھۋمماعفيرلي ٴزانبي ٴۋافتاح لي ٴابۋابي فادليك» دەپ ايتىڭدار»، –دەگەن.

قۋات ەرعالي ۇلى
date20.01.2015readCount7118printباسىپ شىعارۋ