تاۋەلسىزدىك كۇنى - ۇلى كۇن!
Тәуелсіздік күні - Ұлы күн!

تاۋەلسىزدىك كۇنى - ٴوز بولاشاعىمىزدى ٴوزىمىز ايقىنداۋعا قولىمىز جەتكەن ۇلى كۇن. بۇگىن استانادا تاۋەلسىزدىك كۇنىنە ارنالعان سالتاناتتى جيىندا پرەزيدەنتى نۇرسۇلتان نازاربايەۆ وسىلاي مالىمدەدى.

ەڭ الدىمەن ەلباسى بارشا قازاقستاندىقتاردى ايتۋلى مەرەكەمەن قۇتتىقتاپ: "ەلىمىزدىڭ تۇمارى، ەلدىگىمىزدىڭ شىنارى بولعان -تاۋەلسىزدىك كۇنى قۇتتى بولسىن!"، - دەپ اتاپ ٴوتتى.

"وسىدان 23 جىل بۇرىن ادامزات كوگىندە جارىق جۇلدىز پايدا بولدى. ول - كوك بايراعىن شالقىتىپ، الەم تاريحىنا ٴمورىن باسقان تاۋەلسىز قازاقستان ەدى. عاسىرلار بويعى حالقىمىزدىڭ ارمانى 1991 جىلى 16 جەلتوقساندا، بۇگىنگى بۋىننىڭ تاريحي تاڭداۋىنا اينالدى. بۇل كۇن ٴوز تاعدىرىمىزعا ٴوزىمىز قوجالىق ەتىپ، ٴوز بولاشاعىمىزدى ٴوزىمىز ايقىنداۋعا قولىمىز جەتكەن ۇلى كۇن بولدى"، - دەدى نۇرسۇلتان نازاربايەۆ سالتاناتتى جيىندى اشا وتىرىپ.

بۇدان بولەك، ەلباسى تاۋەلسىزدىك كۇنى تاريحي ادىلەت سالتانات قۇرىپ، ازاتتىق ٴۇشىن توگىلگەن ولشەۋسىز قاننىڭ وتەۋى قايتقان ۇمىتىلماس كۇن، سان ٴداۋىر وتسە دە ۇرپاقتارىمىز ۇلىقتاپ وتىراتىن كۇن ەكەنىن ەسكە سالدى.

"التاي مەن اتىراۋدىڭ، سىرداريا مەن ەسىلدىڭ اراسىنداعى ەلىمىزدىڭ جىلناماسى التىن ارىپپەن جازىلعان ارداقتى كۇن. جەر بەتىندە مىڭداعان ۇلىستار مەن ۇلتتار بار، ٴبىز دەربەس مەملەكەت قۇرۋ باقىتىنا يە بولعان 193 ۇلتتىڭ ٴبىرىمىز. ادام باسىنا باقىتتىڭ قونۋى ٴبىر بولەك، سول باقىتتى باعالاي ٴبىلۋدىڭ ٴجونى - ٴبىر بولەك"، - دەدى مەملەكەت باسشىسى.

ول تاۋەلسىزدىك العان ەلدەردىڭ بارلىعى بىردەي تۇراقتىلىق پەن تاتۋلىققا ۇيىپ، دامۋدىڭ داڭعىلىنا تۇسە قويماعانىن ايتتى.

"تاۋەلسىزدىك تاريحتىڭ سىيى نەمەسە بۇگىنگىنىڭ مەنشىگى ەمەس، ول وتكەن بابالاردىڭ الدىنداعى قاسيەتتى بورىش، كەلەشەك ۇرپاقتىڭ الدىنداعى زور جاۋاپكەرشىلىگىمىز بولىپ تابىلادى. ٴبىز تاۋەلسىزدىگىمىزدى ٴتاۋ ەتىپ، ٴتاۋبا ەتىپ تاۋەكەلمەن بولاشاققا بەت تۇزەپ كەلە جاتقان حالىقپىز"، - دەدى نۇرسۇلتان نازاربايەۆ.

سونداي-اق، پرەزيدەنت داعدارىستاردىڭ ٴوتىپ كەتەتىنىن، ال ەل تاۋەلسىزدىگى، ۇلت مۇراتى، ۇرپاق بولاشاعى سەكىلدى ۇلى قۇندىلىقتار عانا عۇمىرلىق ەكەنىن اتاپ ٴوتتى.

date16.12.2014readCount3985printباسىپ شىعارۋ