قاجىلىقتا – قازاقتار
Қажылықта – қазақтар

مەككە... پايعامبارلار جۇرگەن مۇباراك مەكەن. مويىنسۇنعان مۇسىلماندى ٴفاني مەن باقي دۇنيەنىڭ باقىتىنا بولەيتىن قاسيەتتى قۇراننىڭ اياتى ايان بولعان بەرەكەلى دە بەيبىت قالا. قاسيەتتى قاعبا... كۇللى مۇسىلمان ٴجۇزىن بۇرىپ، ساجدەگە باس قوياتىن اللانىڭ ٴۇيى. تىنىمسىز تاۋاپ ەتىلەتىن، پايعامبارلاردىڭ اتاسى – ٴيبراھيمنىڭ (ع.س.) ٴىزى قالعان ىزگىلىك باستاۋى. قاعباعا قاراپ تا ساۋاپ جياسىڭ. ٴبارى ىزگى نيەتكە بايلانىستى. قاجىلىق... ادامعا ۇل، قۇدايعا قۇل بولعان بارشا مۇسىلماننىڭ ارمانىنا اينالعان قۇلشىلىق. مۇمكىندىگى بولعان پەندەگە پارىز امال. كىرىسپەگە كوپ كىدىرمەيىك. كوزبەن كورىپ، جۇرەكپەن سەزبەي، كوپ سوزبەن جەتكىزۋ استە مۇمكىن ەمەس.

ٴجۇزى باسقا جۇرەگى ٴبىر، ٴتۇرى باسقا تىلەگى ٴبىر الەم مۇسىلماندارى ۇلىق ساپارمەن مەككەگە جينالدى. باي مەن باعلاننىڭ، پاتشا مەن پاقىردىڭ، مينيستر مەن ٴمۇساپىردىڭ باسىن قوسقان قاجىلىق باستالدى. ٴبارى ٴتاڭىردىڭ الدىندا تەڭ. ەكى قۇلاش ماتاعا ورانعان وتانداستارىمىز دا وسىندا. بەيرەسمي دەرەكتەرگە قاراعاندا، بيىل پارىزىن وتەۋشىلەر سانى 5 ميلليوننان اسادى. سول 5 ميلليوننان استام ادامنىڭ ٴ5500-ى ەلىمىزدەن بارعاندار. ولارعا وتاندىق 20 تۋريستىك كومپانيا قىزمەت ەتۋدە. جىل سايىنعى داستۇرگە ساي، قازاقستان مۇسىلماندارى ٴدىني باسقارماسىنىڭ ٴتوراعاسى، باس ٴمۇفتي، شەيح ٴابساتتار قاجى دەربىسالى حازرەتتىڭ تاپسىرماسىمەن قاجىلىق ميسسياسىنىڭ قۇرامى جاساقتالىپ، بيىل دا ۇلكەن جاۋاپكەرشىلىكپەن يگى ىسكە كىرىستى. قاجىلارعا قىزمەت كورسەتۋ جۇمىسىن جەتىلدىرۋ ٴارى وڭتايلاندىرۋ ماقساتىندا قاجىلىق كومپانيا باسشىلارى دا وسى جىلى ميسسياعا مۇشەلىككە ەندى. ەلىمىزدىڭ سىرتقى ىستەر مينيسترلىگى دە ٴدىنباسىنىڭ ۇسىنىسىن قابىل الىپ، بىلىكتى ٴتورت دارىگەر ٴبولدى. اق حالاتتى ابزال جاندار قاجىلارىمىزدىڭ دەنساۋلىعىنا ٴجىتى كوڭىل ٴبولىپ، قاجەتتى دارى-دارمەكتەرمەن قامتاماسىز ەتۋدە.

قازاقستان مۇسىلماندارى ٴدىني باسقارماسىنىڭ اپپارات باسشىسى بالعابەك مىرزايەۆ ميسسيا مۇشەلەرىنىڭ كەڭەيتىلگەن ٴماجىلىسىن وتكىزدى. ارنايى جۇمىس توبىنىڭ كەزەكتى جيىنىنا قمدب قاجىلىق ٴبولىمىنىڭ مەڭگەرۋشىسى، تاجىريبەلى مامان قانات بەكجانوۆ، ۋاعىز-ناسيحات توبىنىڭ يمامدارى، وسى توپتىڭ جەتەكشىسى، ٴدىني باسقارمانىڭ ۋاعىز-ناسيحات ٴبولىمىنىڭ باس مامانى التىنبەك ۇتىسحان، بىلىكتى دارىگەرلەر، قاجىلىق كومپانيا ديرەكتورلارى، جۋرناليستەر قاتىستى. باسقوسۋدا ٴار سالا بويىنشا جۇكتەلگەن مىندەتتەردىڭ ورىندالۋىن قاداعالاۋ، ناسيحات توبىنىڭ جۇمىسىن جەتىلدىرۋ، ۋاعىز تاقىرىبىن پىسىقتاۋ، قاجىلارعا دەر كەزىندە ەم-دوم كورسەتۋ، ولاردىڭ ساۋلىعىن ٴجىتى قاداعالاۋ، قاجىلىق ەرەجەلەرىمەن تانىستىرۋ، كۇندەلىكتى اس-اۋقاتپەن قامتاماسىز ەتۋ، ت.ب. ماسەلەلەر تالقىلانىپ، ٴتيىستى تاپسىرمالار بەرىلدى.

«دىنگە، حالىققا قىزمەت ەتۋ – اللا الدىنداعى ابىرويلى ٴىس. ودان اسقان باقىت جوق. ساۋاپ سابىرلىقپەن، ىجداھاتتىلىقپەن، ىقىلاسپەن كەلەدى. سوندىقتان كەيبىر ۇلكەندى-كىشىلى قيىنشىلىقتار كەزدەسىپ جاتسا، وعان توزىمدىلىك تانىتۋمىز ٴتيىس. قۇرمەتتى ارىپتەستەر! قاجىلاردىڭ قاجەتىندە بولۋ – بارىمىزگە ورتاق ٴىس. اللا الدىنداعى پەندەلىك پارىزىمىزدى ابىرويمەن اتقارىپ، ٴدىنباسى تاپسىرماسىن تىڭعىلىقتى، جاۋاپكەرشىلىكپەن ورىنداپ، ورتاق ٴىستى جۇمىلا جۇزەگە اسىرۋعا اتسالىسايىق»، – دەدى بالعابەك مىرزايەۆ.

قازاقستان مۇسىلماندارى ٴدىني باسقارماسى بيىل دا ٴار قاجىلىق كومپانياعا ۋاعىز-ناسيحات جۇمىستارىن جۇيەلى جۇرگىزۋ ماقساتىندا يمامدار ٴبولدى. قاجىلىق ميسسياسى قاراماعىنداعى 100-گە جۋىق يمام-مولدالار جەرلەستەرىمىزدىڭ وزگە ٴدىني اعىم وكىلدەرىنىڭ جەتەگىندە كەتپەۋىن قاداعالاپ، ناسيحات جۇمىستارىن جۇرگىزۋدە. ميسسيا مۇشەلەرى يمامداردىڭ ۋاعىزىنا قاتىسىپ، جۇمىسىن قاداعالاپ، ولارعا ٴتيىستى نۇسقاۋلار بەرۋدە.    

قمدب اپپارات باسشىسى ب.ٴابدىقايىم ۇلى، قاجىلىق ٴبولىمىنىڭ مەڭگەرۋشىسى قانات بەكجانوۆ، ۋاعىز-ناسيحات توبىنىڭ جەتەكشىسى التىنبەك ۇتىسحاندار ميسسيا مۇشەلەرىن تولعاندىرعان ساۋالدارعا جاۋاپ قاتتى. قاجىلىق كومپانيالارىنىڭ جەتەكشىلەرى، تاجىريبەلى دارىگەرلەر ميسسيا جۇمىسىن ودان سايىن جەتىلدىرە تۇسۋگە قاتىستى ۇسىنىس-پىكىرلەرىمەن ٴبولىستى. سونداي-اق قاجىلارعا قىزمەت كورسەتۋ ساپاسىن ارتتىرۋ ماقساتىندا باس ٴمۇفتي تاراپىنان جاسالىپ جاتقان قولداۋعا، ٴدىني باسقارما قىزمەتكەرلەرىنە العىس-تىلەكتەرىن، ٴىلتيپاتتارىن ٴبىلدىردى.

قاسيەتتى جەرگە بارىپ، قاجىلىق پارىزىن وتەۋشى وتانداستارىمىز ەلىمىزدىڭ بىرلىگى مەن ىنتىماعىن تىلەپ، ەكى دۇنيەنىڭ باقىتىن جالبارىنا سۇراۋدا. ٴبىز دە ٴوز تاراپىمىزدان ساۋابى مول وسىناۋ عيباداتتارىڭىزدىڭ قابىل بولۋىنا تىلەكتەسپىز. پايعامبارىمىز (س.ع.س.): «ۋمرا ۋمراعا دەيىنگى ارالىقتاعى (كىشى) كۇنالاردى شايادى، ال حاج مابرۋردىڭ (شىنايى قاجىلىقتىڭ) سىيلىعى – تەك ٴجاننات»، – دەگەن. اللا تاعالا بارشامىزدى قۇلشىلىعى، قاجىلىعى قايىرىمەن قابىل بولعان قۇلدارىنان ەتىپ، قوس دۇنيەدە قۋانىشىمىزدى ارتتىرىپ، جۇزدەرىمىزدى جارىق ەتكەي.    

ايتا كەتەرلىك جايت، ەلىمىزدەن جىل سايىن قاجىلىققا بارۋشى جەرلەستەر سانى ارتىپ كەلەدى. مىسالى، بىلتىر پارىزىن وتەۋشىلەر قاتارى 4 مىڭ بولسا، بيىلعى كورسەتكىش – 5500. ولاردىڭ دەنى – قازاقتار. «قاجىلىقتا – قازاقتار». تاقىرىپتى تاڭداۋدىڭ ٴمانى وسى ەدى.

اعابەك قونارباي ۇلى،
قازاقستان مۇسىلماندارى ٴدىني باسقارماسىنىڭ ٴباسپاسوز حاتشىسى،
مەككە

اعابەك قونارباي ۇلى
date20.10.2012readCount4440printباسىپ شىعارۋ