ۇلى زاڭ
Ұлы заң

اللا تاعالانىڭ بىزگە بەرگەن يگىلىكتەرى وسى دۇنيە ٴۇشىن جارالعان. ونى ساۋاپ جولىنا جۇمساساق، جانىمىز جايلانىپ، راحاتتانامىز. سول راحاتتانۋ – ٴجانناتتىڭ نىشانى. ساۋاپ جولى دەگەن – قاجەتتەن تىس قاجەتتىلىكتەردى مۇقتاجدارعا ارناۋ، حاق جولدى ناسيحاتتاۋشىلاردىڭ – مەدرەسەلەردىڭ، ٴدىن باسىلىمدارىنىڭ دەمەۋشىلىگىنە جۇمساۋ دەگەن ٴسوز.

بەرىلگەن يگىلىكتىڭ ٴبارىن تەك تۇرمىستىڭ ٴبىتىپ بولمايتىن سۇرانىستارىنا ارناي بەرسەك، دۇنيەشىلىكتىڭ ٴتۇپسىز تۇڭعيىعىنا كەتكەنىمىزدى ٴوزىمىز بىلمەي قالامىز. ەشكىم دە ٴبىلىپ تۇرىپ سۋ تۇبىنە كەتۋدى قالامايدى عوي. سوندا، دۇنيەشىلىك تۇڭعيىعىنان ٴبىزدى قۇتقاراتىن نە؟ يگىلىككە بەرىلگەن دۇنيەلەردى سونى بەرگەن يەسىنىڭ بۇيرىعىنا ساي جۇمساۋ – ٴبىزدى قۇردىمنان قۇتقاراتىن قايىققا ۇقسايدى. ياعني، دۇنيە تيەگەن قايىعىڭداعى تولعان مۇلىكتى تەڭىزگە تاستاساڭ امان قالاتىنىڭ سەكىلدى. ٴدال سول بەينەدە، بەرىلگەن يگىلىكتى مۇقتاجدارعا جۇمساساق، ساداقا بىزگە ساۋلىق اكەلەدى، قىزىل كوزدەردىڭ كەسىرىنەن قورعاپ، پالە-جالانى الىستاتادى. اللا رازىلىعى ٴۇشىن بەرگەن دۇنيە ورتايمايدى، اقىرەتتە ساۋاپ بولىپ ورالادى.

ٴبىراق بىرەۋگە جاساعان جاقسىلىعىمىزدى ايتا بەرسەك، ول – وزىمىزگە جاساعان جاماندىق بولىپ شىعادى. جاقسى اتانۋ ٴۇشىن جاسالعان جاقسىلىقتا ىزگىلىك بولمايدى، ساۋاپ تا جوق.

ەگەر بىرەۋدىڭ وزىمىزگە جاساعان جاماندىعىن جاسىرساق، ول وزىمىزگە جاقسىلىق بولىپ قايتادى. كەك ساقتاماۋدا ىزگىلىك بار.

قايعىعا دا، قاسىرەتكە دە سابىر ساقتاپ، ارتىنىڭ قايىرىن كۇتۋ – وسى دۇنيەنىڭ وتپەلى سىناق ەكەندىگىنە يلانۋدىڭ دالەلى.

ٴار نارسەنىڭ بايىبىنا بارماي ايتا بەرۋ – عايبات بولادى، سەبەبى، نەنىڭ دە ناقتىلىعىن بىلەتىن ٴبىر قۇداي عانا. سوندىقتان ۇندەمەۋ – يمانىڭىزدىڭ قورعانى. بولماسا، تەك جاقسى ٴسوز سويلەڭىز، جاعىمدى مىنەز تۋسىن. جاقسى مىنەز – يماننىڭ جارتىسى بولسا، جاقسى ٴسوز – جاقسى مىنەزدىڭ جارتىسى بولعانى.

وسىنداي مىنەز دە – قۇدايدان قورقۋدىڭ ٴبىر دالەلى. جاراتۋشىدان جاسىرىن قالاتىن ەشتەڭە جوق. ول جۇرەك تۇبىندەگى تىلسىم سىردى دا بىلەتىن ٴىلىم سيپاتىنا يە. وسىعان يلانعان شىن مۇسىلمان تىلىنە دە، قۇلاعىنا دا ساق بولماق. (كەرەكتى-كەرەكسىز اقپاراتتار سەلىنىڭ ىشىندە ٴوزىمىزدى وسىنداي الاپاتتان قورعاي ٴبىلۋ دە كامىلدىككە جەتكىزبەي تۇرمايدى).

وسى ادەپتىڭ ٴبارى ادامنىڭ رۋحاني دامۋىنا جول اشادى.

رۋحاني جەتىلگەن كەزدە اقيقات تانىلادى. اقيقات تانىلعاندا ونىڭ زاڭدارى مويىندالادى. ونى مويىنداعان ادام اقيقات زاڭىنا ٴشۇباسىز باعىنادى. ونىڭ زاڭىنا باعىنۋ – حاق جولمەن قاۋىشۋ دەگەن ٴسوز.

وسىناۋ اتالعان از عانا مىسالداردىڭ ٴوزى ۇلى ٴبىر زاڭنىڭ تارماقتارى عانا.

سەبەپتەردىڭ ٴتۇپ سەبەبى – ۇلى جاراتۋشى. جارالعانداردىڭ بارلىعى جالعىز جاراتۋشىنىڭ ۇلى زاڭىنا باعىنادى. ول – جۇيە زاڭى. وسى جۇيەدەن تىس بولىمسىز توزاڭنىڭ دا بولا المايتىنى انىق. جۇيەنىڭ ىشىندە بولعان سوڭ توزاڭ دا جۇيەدەگى جالپى زاڭعا باعىنادى. ول زاڭعا باعىنسا، ونىڭ دا ٴاربىر ارەكەتى زاڭدى بولعانى. وزىنە تاعايىندالعان ارەكەت زاڭىن ورىنداۋشى بولعانى. ولاي بولسا، الەمدە ەشقانداي كەزدەيسوقتىق دەگەن بولا المايدى. بۇكىل ىس-ارەكەتتىڭ ٴبارى دە ٴوزارا كەلىسىممەن بولاتىنى وسىدان.

قۇدايسىز عالىمداردىڭ «تىرشىلىك – كەزدەيسوق ساتتىلىكتىڭ تۋىندىسى» دەۋى – اقيقاتتى تاني الماعان ناداندىقتىڭ كورىنىسى. وسى بىلىمسىزدىكتىڭ باستى سەبەبى – بارلىق سەبەپتەردىڭ ٴتۇپ سەبەبى بار ەكەندىگىن بىلە الماعاندىقتان. ۇلى زاڭنىڭ بار ەكەندىگىن مويىنداماي سودان شىعاتىن كىشى زاڭداردىڭ شىرماۋىندا قالعاندىقتان.

تىرشىلىكتىڭ كىلتى ىسپەتتى بولعان دنك-نى (تىرشىلىك يەلەرىنىڭ تۇقىمى ساقتالاتىن اسا كۇردەلى بەلوك) بۇكىل الەممەن سالىستىرساق، راسىندا توزاڭداي. ٴبىراق، سول توزاڭداي زاتتىڭ اسا نازىك قۇرىلىسى وزىنەن-وزى قۇراستىرىلدى دەۋ – قانداي اقىماقتىق.

ٴتىپتى، توزاڭداي زاتتى قويىپ، تىرشىلىكتىڭ ەڭ كەمەلى، ميىنىڭ وزىندە ون ميلليارد نەيرون مۇلتىكسىز قىزمەت اتقاراتىن ادامدى وزىنەن-وزى پايدا بولدى دەيتىندەردى، وعان سەنەتىندەردى – اقىماق دەۋ از، ولاردى ۇلى زاڭنان باس تارتىپ اداسقاندىعى ٴۇشىن، بۇل دۇنيەدە-اق «جازا زاڭىمەن» جازالانىپ، اقىلىنان الجاسقاندار دەسە ورىندى بولاتىنداي...

اباي حامزا
date18.09.2012readCount3671printباسىپ شىعارۋ