جاڭا مالىمەتتى ەسكە ساقتاۋدىڭ ۇزدىك ٴادىسى

ٴبىز سىزدەرگە بۇگىن ميىمىزدىڭ جۇمىس ىستەۋ ەرەكشەلىكتەرىنە سايكەس جاسالعان ينتەرۆال قايتالاۋ ٴادىسى، ياعني جاڭا مالىمەتتى كوپ كولەمدە ەسكە ساقتاۋ ٴادىسى تۋرالى ايتامىز.

ٴتۇن، ٴۇي جاتتىعۋىن ورىنداۋ جانە ەنەرگيا بەرەتىن سۋسىن – وسىنداي ساۋ ەمەس كورىنىس ٴبارىمىزدىڭ باسىمىزدان وتكەن شىعار. مەكتەپ قابىرعاسىندا، ۋنيۆەرسيتەت نەمەسە جۇمىسىمىزدا وسىنداي جاعدايلارعا تاپ بولعانبىز. قىسقا ۋاقىت ىشىندە كوپ كولەمدە مالىمەتتى ەسكە ساقتاۋىڭىز قاجەت بولعان كەزىڭىزدى ەسكە ٴتۇسىرىڭىز. مۇنداي جاعدايدا ٴارقايسىمىز ٴبىر وقۋلىقتى باسىمىزدا ەڭ بولماعاندا نەگىزگى مالىمەتى قالسىن دەپ قايتالاپ وقي بەرەتىن ەدىك. 

وقۋدىڭ مۇنداي ٴتۇرى تەز شارشاتىپ جىبەرەدى ٴارى جالىقتىرادى، ونىڭ ۇستىنە، ٴتيىمسىز. بۇل ٴادىس ميىمىزدىڭ جۇمىس ىستەۋ ەرەكشەلىگىنە ساي ەمەس. باقىتىمىزعا وراي، وسىنى دالەلدەي العان عالىمدار ميدىڭ ەرەكشەلىكتەرىن ەسەپكە الاتىن ٴادىستى ويلاپ تاۋىپ، بىزگە ۇسىنىپ وتىر. ولاردىڭ ٴبىرى – ينتەرۆال قايتالاۋ ٴادىسى – ادىستەردىڭ ۇزدىگى دەۋگە بولادى جانە سىزگە جاڭا ٴتىلدى مەڭگەرۋگە، ەمتيحانعا دايىندالۋعا كومەكتەسە الادى.  

ينتەرۆال قايتالاۋ ٴادىسى دەگەنىمىز نە؟

ينتەرۆال قايتالاۋ ٴادىسى ارقىلى مالىمەتتى ەستە ساقتاۋدى ۇيرەنگىمىز كەلسە، مىنا ٴبىر كەڭەستى وقىپ شىعىڭىز: مالىمەتتى تەڭ بولىكتەرگە ٴبولىڭىز، ٴاربىرىن ۇزىك(سۇراق جانە جاۋاپ تۇرىندە) رەتىندە قاعازعا جازىپ قويىڭىز، كەيىن ولاردى تاقىرىپ سەكسيالارىنا ٴبولىڭىز. ەگەر سۇراققا دۇرىس جاۋاپ بەرسەڭىز، وندا ٴسىز قاعازداعى مالىمەتتى جاتتاپ الدىڭىز دەگەن ٴسوز، ونى شەتكە قويىڭىز. مۇنداي قاعازداردى ٴسىز سيرەك قارايتىن بولاسىز. ەگەر قاعازداعى سۇراققا جاۋاپ بەرۋ قيىنداي باستاسا، ولاردى ٴجيى قارايتىن قاعازداردىڭ قاتارىنا قوساسىز. 

بۇل جۇيەنىڭ تيىمدىلىگى ٴوز تالاپتارىڭىزعا ساي ۇيىمداستىرا الاتىنىڭىزدا. بۇل ٴادىستىڭ پايداسىنىڭ سەبەبى ول ٴبىزدىڭ ميىمىزعا جانە ونىڭ فۋنكسياسىنىڭ مەحانيزمدەرىنە ساي بولۋىندا. 

مي قالاي جۇمىس ىستەيدى؟

باسىمىزداعى باستى مۇشەمىزدىڭ قالاي جۇمىس ىستەيتىنىن ٴبىر اۋىز سوزبەن ٴتۇسىندىرىپ بەرۋ مۇمكىن ەمەس. ەگەر وزىمىزدەن «مي قالاي جۇمىس ىستەيدى؟» دەپ سۇراساق – «كومپيۋتەر سياقتى جۇمىس ىستەيدى» دەگەن سياقتى جاۋاپ قايتارۋىمىز مۇمكىن. بۇعان تاڭعالۋدىڭ دا قاجەتى جوق، سەبەبى ٴبىز تەحنولوگياسى دامىعان داۋىردە ٴومىر ٴسۇرىپ جاتىرمىز جانە ميدى كومپيۋتەرمەن بايلانىستىرۋعا ابدەن بولادى. 

الايدا ٴبىز كومپيۋتەر مەن ميدىڭ مالىمەتتى قابىلداپ، ساقتاۋىنا قاتىستى جۇمىس ۇستانىمدارىنىڭ ىرگەلى ەرەكشەلىكتەرىن وڭاي ۇمىتامىز. كومپيۋتەر ەسكە ساقتاۋعا بۇيرىق بەرىلگەن مالىمەتتى عانا ساقتايدى. ال ميدىڭ نەنى ەسكە ساقتاپ، نەنى ەستەن شىعارۋ كەرەك ەكەنىن باسقارا المايمىز جانە ونىڭ ەسكە ساقتاۋ قابىلەتىنە بيلىك جۇرگىزە المايمىز. سوندىقتان دا ٴسىز دميتريي ماليكوۆتىڭ بىرنەشە جىل بۇرىن ەستىپ العان ٴانىنىڭ ٴماتىنىن ەسكە تۇسىرە الاسىز دا، ٴقازىر عانا جاتتاپ العان مالىمەتتى ۇمىتىپ قالاسىز. 

مي ەستەلىكتەردى قالاي جاسايدى؟

ميىمىز بەن كومپيۋتەردىڭ ەكىنشى ىرگەلى ەرەكشەلىگى مالىمەتتىڭ قالايشا قابىلدانىپ، قالايشا يگەرىلەتىنىندە. ٴوز باسىمىزدا كومپيۋتەردەگىدەي ەرەكشە تارتىپپەن، ٴوز ورىندارىندا ساقتالعان ارنايى مالىمەتى بار فايلداردى ەلەستەتۋ وڭاي. ٴبىراق ٴبىز ميداعى ٴبىر ٴارحيۆتى اشىپ، ونىڭ ىشىنەن قاجەتتى مالىمەتتى الىپ جاتىرمىز دەپ ويلاساق قاتتى قاتەلەسكەنىمىز.

عىلىمنىڭ ايتىپ وتىرعانى دا سول، جادى – بۇل ٴبىزدىڭ ميىمىزداعى ناقتى ٴبىر نۇكتە ەمەس. بۇل ٴتۇرلى ايماقتارىندا ساقتالاتىن بەلسەندى جۇمىستىڭ ناتيجەسى. ەگەر ٴبىز بەلگىلى ٴبىر جاعدايدان حاباردار بولساق، ول ميىمىزدىڭ ٴبىر نۇكتەسىندە عانا ساقتالمايدى، ميدىڭ ٴتۇرلى جەرلەرىنە تارالىپ، شاشىلىپ كەتەدى.  

سونىمەن قاتار، ميدىڭ مۇمكىندىگى شەكتەۋلى جانە وسى پروبلەمانى شەشۋ ازىرشە مۇمكىن بولماي وتىر. عالىمدار «ادام بالاسى ٴبىر دەگەندە مالىمەتتىڭ بەس-جەتى ۇزىگىن عانا ەسكە ساقتاي الادى» دەيدى.

ميدى قالاي بۇزۋ كەرەك؟

ميدىڭ ٴوزى ماڭىزدى دەپ تاپقان مالىمەتتى ەسكە ساقتاپ قالاتىنىن بىلەمىز. ول وتە ٴجيى كەزدەسەتىن وقيعالار مەن زاتتار جايلى مالىمەتتى قۋاتتى ەتە تۇسەدى. مالىمەتتى ٴجيى قاراپ وتىرۋدىڭ نەگىزىندەگى ينتەرۆال ٴادىسى ميدىڭ وسى جۇمىس ۇستانىمىن قولدانادى.

ينتەرۆال قايتالاۋلار – وتە قاراپايىم، ٴبىراق ٴتيىمدى اسەر ەتەتىن ٴادىس، بۇل ٴادىس ٴبىزدىڭ ميىمىزدىڭ جۇمىس ىستەۋ مەحانيزمدەرىن بۇزاتىنداي بولىپ كورىنەدى. ول ٴبىزدىڭ مالىمەتتى قايتا-قايتا قايتالاپ، جاتتاۋىمىزعا ٴماجبۇر ەتەدى، اقىلىمىزدى بەينە ٴبىر بۇلشىقەتتى شىنىقتىرعانداي جاتتىقتىرادى. مي وسى ستيمۋلداردىڭ اسەرىن الىپ، جۇيكە جاسۋشالارىنىڭ اراسىنداعى بايلانىستاردى كۇشەيتەدى. وسىلايشا ٴسىز ۇزاق مەرزىمدەگى ەستەلىكتەردى ەسكە تۇسىرەسىز، وقىتۋدىڭ وسى ٴادىسىن ٴبىر رەت تەكسەرىپ كورسەڭىز، بۇدان ەشقاشان باس تارتپايسىز. كومەكشى قۇرالداردى دا پايدالانىڭىز – پروسەسستى ۇيىمداستىرۋعا كومەكتەسەتىن ٴارى قاراپايىم ەتەتىن قوسىمشالار. 

مۇنداعى باستى ماسەلە - ميىمىزدىڭ شەكتەۋلەرى بار ەكەنىن بىلە وتىرىپ، ميدىڭ وسى السىزدىكتەرىن ٴوز قاجەتىمىزگە جاراتۋ.

date09.06.2018readCount974printباسىپ شىعارۋ