اۋرۋشاڭ بالالاردى ساۋىقتىرۋ امالدارى

ٴجيى جانە ۇزاك اۋىراتىن بالالار – پەدياتريا سالاسىنىڭ ماڭىزدى مەديسينالىق-الەۋمەتتىك ماسەلەلەرىنىڭ ٴبىرى.

ٴجيى ٴارى ۇزاق اۋىراتىن بالالار توبىنا ٴومىرىنىڭ العاشقى جىلىندا 4 جانە ودان دا كوپ، 2 جانە 3 جاسىندا – 6 رەت جانە ودان دا كوپ، 4 جاسىندا – 5 رەت جانە ودان دا كوپ، 5 جانە 6 جاسىندا – 4 رەت جانە ودان كوپ، 7 جاسىندا 3 رەت جانە ودان كوپ رەت ٴجىتى اۋرۋلارمەن اۋىرعان جانە سوزىلمالى سىرقاتتارى اسقىنعان سابيلەر جاتادى.

بالا اۋرۋلارىنىڭ قۇرىلىمىندا تىنىس الۋ اعزالارىنىڭ سىرقاتتارى باسىم. جانە ٴجيى ٴارى ۇزاق اۋىراتىن بالالار اراسىندا بۇلار 80-85%. سوندىقتان اتالعان توپتاعى بالالاردى ساۋىقتىرۋ كەزىندە مۇرىن-جۇتكىنشاقتاعى جۇقپا وشاقتارىن تازالاۋعا، رەسپيراتورلىك جۇقپالاردىڭ الدىن الۋعا كوپ كوڭىل بولىنەدى. ٴبىز ٴجيى جانە ۇزاق اۋىراتىن بالالاردى قالپىنا كەلتىرۋگە ارنالعان 3 كەزەڭنەن تۇراتىن تومەندەگىدەي شارالاردى ۇسىنامىز:

ٴبىرىنشى كەزەڭ – سىرقاتتىڭ ٴجىتى كورىنىستەرى جويىلعانعا دەيىن ۋچاسكەلىك دارىگەردىڭ 3-5 كۇن ىشىندە ەم جۇرگىزۋى;

ەكىنشى كەزەڭ – قالپىنا كەلتىرۋ بولىمىندە 14-21 كۇن بويى ەمدەۋ;

ٴۇشىنشى كەزەڭ – 1،5-3 اي بويى ەمدەۋ.

ەڭ ٴتيىمدى ەم مەكتەپكە دەيىنگى بالالار مەكەمەسىندە جەكە ساۋىقتىرۋ جانە جۇيەلى تۇردە وتباسىندا ساۋىقتىرۋدى ۇيلەستىرۋ بولىپ تابىلادى.

ساۋىقتىرۋ جولدارى:

ەڭ الدىمەن بالانىڭ كۇن ٴتارتىبىن جانە تاماقتانۋ ٴمازىرىن رەتتەۋ كەرەك. قالپىنا كەلتىرۋ توبىنداعى سابيلەردىڭ كۇندىزگى ۇيقى ۋاقىتى ۇزارتىلىپ، بالاباقشادا بولۋ ۋاقىتى قىسقارتىلادى. تاعامعا قوسىمشا شىرىندار مەن ٴسۇت ونىمدەرى (ايران، كىلەگەي، سۇزبە) ەنگىزىلەدى. سونداي-اق تاعام س دارۋمەنىمەن بايىتىلادى. بالالار بولمەسىنىڭ تەمپەراتۋراسى 18°س-دەن اسپاۋى ٴتيىس.

سىلاپ-سيپاۋ جانە ەمدىك جاتتىعۋلارمەن بىرگە شىنىقتىرۋعا كوپ كوڭىل بولىنەدى. شىنىقتىرۋ كەزىندە كونتراستىلى اياق بۇلاۋلارى، قۇرعاق جانە ىلعال ورامالمەن ىسۋ، سۋ قۇيىنۋ، تاماقتى سۋىق سۋمەن شايۋ ٴجيى قولدانىلادى. شىنىقتىرۋ شارالارىنىڭ نەگىزگى ٴپرينسيپى – ونى بالانىڭ ساۋ كەزىندە باستاۋ، شىنىقتىرۋ اسەرىن بىرتىندەپ ۇلعايتۋ، ولاردى جۇيەلى تۇردە جانە بىرىنەن كەيىن ٴبىرىن جاساۋ. ارينە، بالانىڭ جاسى، جەكە ەرەكشەلىكتەرى، ونىڭ اسەرى دە ەسكەرىلەدى.

قاراپايىم جانە ٴتيىمدى شىنىقتىرۋ شاراسى -  تەمپەراتۋرا ٴتارتىبىن وزگەرتىپ وتىرۋ. ياعني بالا ۇيىقتاعان كەزدە تەرەزەنى اشىپ، ونىڭ بولمەسىندەگى تەمپەراتۋرانى 15-16 گرادۋسقا تومەندەتەدى. ال ويىن بولمەسىندەگى تەمپەراتۋرانى جىلىتقىشتىڭ كومەگىمەن 23-24 گرادۋسقا دەيىن جىلىتادى. وسىدان سوڭ ەكى بولمەدە كەزەك-كەزەك جاتتىعۋ جاساتقىزادى. ەمشارانىڭ ۇزاكتىعى – 10-12 مينۋت.

ساۋىقتىرۋدىڭ فيزيوتەراپيالىق ادىستەرى: جالپى ۋلتراكۇلگىن ساۋلەلەندىرۋ، تاماقتىڭ تۋبۋس-كۆارسى، بادامشا بەزگە ۋدز. كوپتەگەن اۆتورلار قالپىنا كەلتىرۋ كۋرسىنا تاماقتى دارىلىك وسىمدىك تۇنبالارىمەن شايۋ، وتتەگى ٴشوپ كوكتەيلدەرىن قوسادى. بۇل شارالار كەشەندى دارىلىك ەممەن تولىقتىرىلسا، تيىمدىلىگى ارتا تۇسەدى.

گ.ك.يزگۋتتينوۆا،
پەدياتريا جانە بالا حيرۋرگياسى

date18.04.2018readCount682printباسىپ شىعارۋ