يسرا جانە ميعراج مۇعجيزاسى

يسرا ٴسوزى «تۇنگى ساپار» دەگەندى بىلدىرسە، ميعراج «جوعارى كوتەرىلۋ» دەگەن ماعىنا بىلدىرەدى. ٴمادينا قالاسىنا قونىس اۋدارۋدان ٴبىر جارىم جىلداي ۋاقىت بۇرىن ٴبىر ٴتۇنى پايعامبارعا (س.ع.س.) جەبىرەيىل پەرىشتە (ع.س.) كەلەدى. ونىڭ قاسىندا تەك پايعامبارلار عانا مىنەتىن بۋراق (قازاقتىڭ «پىراق» ٴسوزى وسىدان شىققان) اتتى جۇيرىك جانۋار بار ەكەن. پايعامبار (س.ع.س.) جەبىرەيىلدىڭ (ع.س.) ايتۋىمەن وسى جانۋارعا ٴمىنىپ بايتۋل-ماقديسكە (يەرۋساليم شاھارىنا) ٴبىر مەزەتتە جەتىپ بارادى.

مۇندا ٴال-اقسا مەشىتىندە ونى پايعامبارلار (ع.س.) كۇتىپ وتىر ەكەن. پايعامبار (س.ع.س) ولارعا يمامدىق ەتىپ، بىرگە ناماز وقيدى. بۇل –ونىڭ (س.ع.س.) جالپى پايعامبارلاردان ارتىقشىلىعىنا دالەل.

سوسىن جەبىرەيىل (ع.س.) پەرىشتەمەن بىرگە كوككە كوتەرىلەدى. ٴبىرىنشى اسپانعا شىققاندا ادام پايعامبارمەن (ع.س.) كەزدەسەدى. ەكىنشى اسپاندا يسا جانە جاقيا پايعامبارلارمەن (ع.س.) جولىعادى. ٴۇشىنشى اسپاندا ٴجۇسىپ پايعامباردى (ع.س.) كورەدى. ٴتورتىنشى اسپاندا ىدىرىس پايعامبارعا (ع.س.) كەزىگەدى. بەسىنشى اسپاندا ھارۋن پايعامباردى (ع.س.) كورەدى. التىنشى اسپاندا مۇسا پايعامبارعا (ع.س.) جولىعادى. جەتىنشى اسپانعا كوتەرىلگەندە مەككەدەگى ٴبايتۋللا – قاعبانىڭ ٴدال ۇستىندە ورنالاسقان ٴبايتۋل-ماعمۋردى، وعان قاجىلىق جاساپ جاتقان سان مىڭداعان پەرىشتەلەردى كورەدى. وسى جەردە ارقاسىن ٴبايتۋل-ماعمۋرعا سۇيەپ وتىرعان يبراھيم (ع.س.) پايعامباردى كورەدى. سوسىن الەمدەردىڭ شەگى – سيدراتۋل-مۋنتاھاعا («شەكتىڭ لوتوسى») بارادى.

وسى جەردە جەبىرەيىل پەرىشتە (ع.س.) توقتاپ، پايعامبارعا (س.ع.س.): «ەندى سەن العا جۇرسەڭ وتەسىڭ، ال مەن جۇرسەم كۇيىپ كەتەمىن»، – دەپ وسى جەردە قالاتىندىعىن ايتادى. پايعامبار (س.ع.س.) ودان ٴارى ەشبىر جاراتىلىس يەسى باسىپ كورمەگەن ورىنعا جالعىز ٴوزى بارىپ، راببىسىمەن سويلەسەدى. اللا تاعالا وسىندا نامازدى پارىز قىلادى.

پايعامبار (س.ا.س.) وسى يسرا جانە ميعراج وقيعاسىن باسىنان ٴبىر-اق تۇندە كەشىرەدى. ول تاڭەرتەڭ جينالعان قاۋىمعا تۇندە بولعان كەرەمەت مۇعجيزانى اڭگىمەلەپ بەرگەندە كەيبىرەۋلەر سەنىپ، ال دۇشپاندار مەن كەيبىر يمان كەلتىرگەندەردىڭ ٴوزى بۇلاي بولۋى مۇمكىن ەمەس دەپ مۇعجيزانى تەرىستەپ، سەنىمدەرىنەن شىعىپ كەتەدى.

fatua.kz
date12.04.2018readCount912printباسىپ شىعارۋ