بالانىڭ وقۋعا دەگەن جالقاۋلىعىن قالاي جويامىز؟

بالالار اتا-انالارىنىڭ جانە مەكتەپتە بەرىلگەن تاپسىرمالاردى ۇنەمى تياناقتى ەتىپ ورىنداي بەرمەيدى. كەيدە بوس وتىرعان بالاڭىزعا ٴبىر ٴىستى بىرنەشە رەت ەسكەرتۋ ارقىلى ارەڭ ىستەتەسىز. مۇنداي ەنجارلىققا تۇسىنىستىكپەن قاراۋ كەرەك.

جالقاۋلىقتىڭ سەبەپتەرى

ماڭىزدى تاپسىرمانى ورىنداعىسى كەلمەگەن بالاعا ۇرسا جونەلمەي، ونىڭ نە ٴۇشىن بۇلاي ىستەپ تۇرعانىن انىقتاپ العان ٴجون.

• جەكە باسىنىڭ جانە مىنەزىنىڭ ەرەكشەلىگى. كەيبىر بالالار وسى ەرەكشەلىكتەرىنە بايلانىستى ۇنەمى باياۋ ٴارى ارمانشىل بولىپ كەلەدى. ولارعا ويلارىن تەز جيناقتاپ، شۇعىل نارسەلەر ىستەۋ قيىنعا سوعادى.

• قىزىعۋشىلىقتىڭ جوعالۋى. مۇمكىن بالا دەنساۋلىڭىنا بايلانىستى ٴبىر تاقىرىپتى وتكىزىپ العان بولار نەمەسە جىل اياعىنا تامان شارشاپ، وقۋعا دەگەن ىنتاسى جوعالىپ كەتكەن شىعار.

• مۇعالىمىنە رەنجۋ. ٴمۇعالىمنىڭ بۇكىل سىنىپتىڭ الدىندا بالاعا ساباعىنا نەمەسە تارتىبىنە قاتىستى ەسكەرتۋ ايتۋىنىڭ ٴوزى بالانىڭ ەشنارسە ىستەمەي قويۋىنا جەتكىلىكتى.

• اتا-اناسى تاراپىنان قاتتى قىسىم كورۋ. ۇيدەگىلەر وقۋشىدان تەك ۇزدىك باعالاردى كۇتەدى. ٴبىراق ول قاتتى شارشاپ، ونداي بيىكتەن كورىنە الماي قالۋى مۇمكىن. بالكىم سول سەبەپتى يممۋنيتەتتىڭ السىرەۋ بەلگىلەرى پايدا بولعان شىعار.

• جوسپارلاي الماۋ. بالا كوڭىلدى نارسەلەرگە (ويىندار نەمەسە تەلەديدار) كوبىرەك كوڭىل بولەدى. ال، ساباققا كۇشى دە، ۋاقىتى دا قالمايدى.

جالقاۋلىقتان قالاي قۇتىلۋعا بولادى؟

تەك تاجىريبەسى بار اتا-انا عانا بۇل ماسەلەنى شەشە الادى. ويتكەنى ولار دا مەكتەپكە، ٴتىپتى باسقا وقۋ ورىندارىنا دا بارىپ، ٴبىلىم العان. ولار دا تالاي رەت بارىنە قول سىلتەي سالعىسى كەلگەن.

1)ەگەر بالانىڭ مىنەزى سونداي بولسا، ەنجار بالاعا اسەر ەتۋدىڭ ادىستەرى تۋرالى پسيحولوگتان كەڭەس العان ٴجون. زەيىندى شوعىرلاندىرۋدى جانە توزىمدىلىكتى ارتتىراتىن ٴارتۇرلى ادىستەمەلەر بولادى.

2)وقۋشىنىڭ ٴپان بويىنشا قيىندىقتارىنا كومەكتەسۋ. باعانى تۇزەۋ ٴۇشىن مۇعالىممەن سويلەسىپ، قوسىمشا تاپسىرمالار الۋعا تۋرا كەلۋى مۇمكىن. باسقا بالالاردى قۋىپ جەتۋ ٴۇشىن بىرنەشە جەكە ساباقتار الۋعا دا بولادى.

3)ٴۇي جاعدايىندا مۇعالىممەن جانجالداسۋعا الىپ كەلگەن جاعدايدى تالقىلاۋ كەرەك. ماسەلەنى شەشۋدىڭ امالىن تاۋىپ، مۇعالىممەن نەمەسە سىنىپ جەتەكشىسىمەن سويلەسۋ قاجەت. ەكى تاراپتى دا رەنجىتپەيتىندەي مامىلەگە كەلۋ كەرەك.

4)بالانىڭ دەنساۋلىعىنا نازار اۋدارعان ٴجون. قاتتى شارشاۋ اۋىر سىرقاتقا الىپ كەلۋى مۇمكىن. «تورتتىك» پەن «ۇشتىك» ٴۇشىن بالانى ۇرسۋدىڭ قاجەتى جوق. بۇل سونشالىقتى ناشار باعالار ەمەس. ايتپەسە اتا-انالارى بالانىڭ بويىندا «ۇزدىك وقۋشى سيندرومىن» قالىپتاستىرۋى مۇمكىن. وندا بالا ۇنەمى ەڭبەگىنىڭ جوعارى باعالانعانىن كۇتىپ، ەگەر قالاعانىنا قول جەتكىزە الماسا كۇيزەلىسكە ٴتۇسىپ كەتەدى.

5)بالاڭىزدىڭ كۇنىن قالاي وتكىزگەنى، قانداي قىزىقتى نارسە بىلگەنى تۋرالى قىزىعۋشىلىق تانىتىڭىز. ەگەر بالاڭىزدىڭ كۇندەلىگىن اپتاسىنا ٴبىر رەت نەمەسە ودان دا از تەكسەرەتىن بولساڭىز، بالاڭىزدىڭ جاقسى وقۋعا دەگەن تالپىنىسى دا بولمايدى.

6)بالاڭىزعا ٴبىرىنشى سىنىپتان باستاپ بوس ۋاقىتىن جوسپارلاۋدى ۇيرەتىڭىز. اۋەلى كەستەنى بىرگە جاساڭىز. كەيىن ول سوعان داعدىلانىپ، ٴبارىن ٴوزى اتقارا الاتىن بولادى. ەسەيە كەلە ەشقانداي جوسپارلاۋسىز-اق بوس ۋاقىتىن قالاي پايدالانۋعا بولاتىنىن كورسەتەتىن جاۋاپكەرشىلىك سەزىمى ارتادى.

بالاڭىز قينالعان ساتتە ەڭسەسىن تۇسىرمەۋ ٴۇشىن وعان ۇنەمى قولداۋ كورسەتىڭىز. ول مەكتەپتەگى ٴبىلىمىنىڭ اتا-اناسى ٴۇشىن دە قىزىقتى ەكەنىن ٴبىلۋى كەرەك. بۇل تەك باعاعا عانا قاتىستى ەمەس. اكە مەن انا بارلىق قيىن ماسەلەنى شەشە الادى، ولاردان قاشان دا كەڭەس سۇراۋعا بولادى.

 

date30.03.2018readCount745printباسىپ شىعارۋ