ٴ ٴسوزدىڭ سالماعى - muslim.kz
ٴسوزدىڭ سالماعى

جالپى، ٴسوز جانە سويلەي ٴبىلۋ – جاراتۋشىنىڭ قۇلعا بەرگەن ۇلكەن نىعىمەتتەرىنىڭ ٴبىرى. قۇران كارىمدە اللا تاعالا : «(ول سونداي) ار-راحمان، وعان (ادامعا) ٴسويلۋدى ۇيرەتتى»، – دەيدى. وسى ايات جاراتىلىستىڭ ىشىندە باسقالارىنان كوپتەگەن  نارسەدە ارتىق بولۋىنىڭ ۇلكەن كورىنىستەرىنىڭ ٴبىرى – ٴسويلۋ ەكەنىن اڭعارتادى. اباي اتامىزدىڭ «قيسىنىمەن قىزىقتى بولماسا ٴسوز، نەگە ايتسىن پايعامبار مەن ونى اللاسى» دەگەن ولەڭ جولدارىنا ٴمان بەرسەك، جوعارىداعى اياتتىڭ ماعىناسى اشىلا تۇسەتىندەي كورىنەدى. دەمەك، ٴسوز بەن سويلەۋدىڭ ٴقادىرى شۇكىرلىككە مۇقتاج بولماق.

الايدا، ٴار نارسەنىڭ ەكى ۇشى بولاتىنداي، ٴسودىڭ دە پايداسى مەن زيانى جەتەرلىك. ارداقتى پايعامبارىمىز (س.ع.س)  ساحابالارىنا ايتقان ٴبىر وسيەتىندە: «كىمدە-كىم اللاعا جانە اقىرەت كۇنىنە يمان كەلتىرگەن بولسا، جاقسى ٴسوز سويلەسىن، ايتپەسە ۇندەمەسىن»، – دەگەن ەكەن. بۇل جەردە ٴسوز بەن يماننىڭ بايلانىسى بايقالىپ تۇر. جاقسى ٴسوز يماندى ادامنىڭ اۋزىنان شىعاتىنى وسى حاديستەن باستاۋ الىپ تۇرعانداي. قازاقتا «ٴتىل تاس جارادى، تاس جارماسا باس جارادى» دەيدى.  راسىندا، كوپتەگەن كەلەڭسىزدىكتىڭ باسى ورىنسىز ايتىلعان سوزدەن ەكەنىن ومىردە دە كورىپ ٴجۇرمىز. تالاي ادام كەزىندە كوركەم قارىم-قاتىناستا بولا تۇرا ٴبىر ٴسوزدىڭ سەبەبىنەن جىلدار بويى بەت كورسەتپەستەي ارازداسىپ جاۋلاسۋدا. بۇل قارىم-قاتىناس بارىسىندا ابايلىقتى تالاپ ەتەرى ٴسوزسىز. ٴبىر دانالىقتا: «ٴسوز –  ىشتەن  شىقپاي سەنىڭ تۇتقىنىڭ، شىققاننان كەيىن سەن ونىڭ تۇتقىنى بولاسىڭ»، – دەيدى. بۇگىندە قانشالاعان ادامدار كەزىندە ايقتان ٴسوزىنىڭ سالدارىنان باز كەشۋدە. ال، اقىلمەن ايتىلعان كوركەم ٴسوز تالايدىڭ تاعىدىرىنا وزگەرىس اكەلۋىنە سەبەپ بولعان.

بىردە ٴبىر قارت ۇستاز بايبىشەسىمەن كوشەدە كەلە جاتسا، وزدەرىنە قادالا قاراعان جىگىتكە كوزدەرى تۇسەدى. تانىماعاننان قوبالجي باستاپ ەدى، ەنتەلەي جۇگىرگەن جىگىت اقساقالدى قۇشاقتاي الادى. ارەكەتىنە تاڭ قالعان قاريا: «سەن كىمسىڭ؟» – دەيدى. جىگىت: «اتا، وسىدان بىرنەشە جىل بۇرىن مەن وقىعان مەكتەپتىڭ سىنىبىنا كىرىپ، ماعان جىميا قاراپ: «اللا جازسا سەن دارىگەر بولاسىڭ»، – دەپ، باسىمنان سيپاعان ەدىڭىز. مەن ول كەزدە ٴۇشىنشى سىنىپتىڭ وقۋشىسى ەدىم. سول ساتتەن باستاپ وزىمە دارىگەر بولۋدى ماقسات قىلدىم. ٴسويتىپ، مەكتەپ قابىرعاسىن ٴتامامداعان سوڭ مەداكادەمياعا ٴتۇسىپ، ونى ٴبىتىرىپ، ٴقازىر قالالىق اۋرۋحانادا ناۋقاستاردى ەمدەپ، ادامداردىڭ العىسىن الىپ جاتىرمىن»، – دەگەن ەكەن.

ارينە، بۇنداي وقيعالار ومىردە جەتەرلىك. دەمەك، جاقسى ٴسوز ايتۋدىڭ ماڭىزدىلىعى قاشاندا زور. ال، ٴسوز بىتكەننىڭ ەڭ سالماقتىسى – اللانىڭ ٴسوزى قۇران   بولماق. قۇراندا «مۋززامميل» سۇرەسىندە:  «اقيقاتىندا  ساعان سالماقتى ٴسوزدى تۇسىرەمىز»، – دەلىنگەن. ٴمانى مەن ماڭىزى تەرەڭدە جاتقان ادامزاتتى ەكى دۇنيەدە دە باقىتقا اپاراتىن سول سالماقتى ٴسوزدىڭ قادىرىنە جەتىپ، ومىرىمىزگە جولباسشى ەتۋدى  بارشامىزعا ٴناسىپ ەتسىن!

قانات قىدىرمين
date19.03.2018readCount1192printباسىپ شىعارۋ