«ٴفالاق» سۇرەسى

«ٴفالاق» – مەككەلىك سۇرە. بۇل سۇرە پەندەلەرگە راحمان اللانىڭ قورعاۋىنا عانا پانالاۋدى ۇيرەتۋدە. ادام بالاسى جاراتۋشىنىڭ ۇلىلىعى مەن پاتشالىعىنان پانا ىزدەيدى. اللا تاعالانىڭ جاراتقان ماقلۇقاتتارىنىڭ زيانكەستىگىنەن، قاراڭعى تۇسكەن ٴتۇننىڭ جاماندىعىنان. تۇندە جاماندىق پەن بۇزىقتىق جايىلاتىندىقتان قاراڭعىدا ادام بويىن ۇرەي بيلەيدى. جانە ٴاربىر كورەالماۋشى مەن سيقىرشىنىڭ جاماندىعىنان تەك قۇدىرەت يەسى اللادان پانا سۇراۋدى ۇيرەتەدى. «ٴفالاق» – پايعامبارىمىز (س.ع.س.) دەم سالعان ەكى مۋعاۋۋيز[1] سۇرەنىڭ ٴبىرى.

بسم الله الرحمن الرحيم

قُلْ أَعُوذُ بِرَبِّ الْفَلَقِ

1.(ەي، مۇحاممەد) ايت: «تاڭنىڭ يەسىنەن قورعاۋ تىلەيمىن».

تاپسىرشىلەر: «پانا سۇراپ، دۇعا ەتۋدە تاڭ ۋاقىتىن ارنايى ايتۋىنىڭ سەبەبى، قاپ-قاراڭعى تۇننەن كەيىن تاڭ نۇرى جارىپ شىعۋى قيىندىقتان كەيىنگى قۋانىشتى سۋرەتتەيدى. سونداي-اق، ادام تاڭنىڭ اتۋىن اسىعا كۇتكەنى سياقتى قورقۋداعى ادام دا قۇتىلۋدى تاعاتسىز كۇتەدى»، – دەيدى.

مِنْ شَرِّ مَا خَلَقَ

2.جاراتقان نارسەلەرىنىڭ جاماندىعىنان.

بارلىق ماقلۇقاتتىڭ: ادام، جىن، جانۋارلار جانە جاندىكتەر جاماندىعىنان. ٴوزىڭ جاراتقان ٴاربىر زيانكەستەن قورعا.

وَمِنْ شَرِّ غَاسِقٍ إِذَا وَقَبَ

3.قاراڭعىلىق باسقان ساتتە ٴتۇننىڭ جاماندىعىنان.

ٴتۇن كەلىپ، قاراڭعى تۇسكەن ساتتەگى جاماندىقتان قورعا. ٴتۇننىڭ قاراڭعىلىعىندا ادام جانە جىننىڭ جاماندارى جەر بەتىنە تارالا باستايدى. سوندىقتان دا ارابتا «ٴتۇن جاماندىقتى جاسىرادى» دەگەن ماتەل بار. رازي: «ادام ٴتۇننىڭ جاماندىعىنان پانا سۇراۋعا ٴامىر ەتىلۋى تۇندە جىرتقىش اپانىنان، جاندىك ۇياسىنان شىعادى، ۇرى-قارى ۇيگە تۇسەدى، ٴورت تە تۇندە بولادى جانە تۇندە كومەككە كەلۋشى دە از مەزگىل»، – دەگەن.

وَمِنْ شَرِّ النَّفَّاثَاتِ فِي الْعُقَدِ

4.جانە تۇيىندەرگە ۇرلەۋشىلەردىڭ (دەم سالۋشى) جاماندىعىنان.

جىپكە ٴتۇيىن سالىپ، دۇعا وقيتىن سيقىرشىلاردىڭ جاماندىعىنان ساقتا. سيقىرشىلار بۇل ارەكەتىمەن جۇرتقا زيان جاساپ، كۇيەۋى مەن ايەلىن اجىراتادى.

ٴال-باحر: «پانا سۇراۋ «مۇعاۋۋيزاتاين» ەكى سۇرەنىڭ تۇسۋىنە ٴلابيد يبن اسام اتتى سيقىرشى قيسساسى سەبەپ بولدى. سيقىرشى اللا ەلشىسىنىڭ (س.ع.س.)تاراعىنا دۋا جاسايدى. تاراققا ون ٴبىر ٴتۇيىن ٴتۇيىپ، ونى ينەمەن تۇيرەپ قويادى. سوندا وسى ەكى سۇرە ۋاحي ەتىلدى. پايعامبارىمىز (س.ع.س.) بۇل سۇرەلەردىڭ ٴاربىر اياتىن وقىعان سايىن ٴبىر ٴتۇيىن شەشىلىپ، بويىن جەڭىل سەزىنە باستايدى. ەڭ سوڭعى ٴتۇيىن شەشىلگەندە، بۇعاۋدان بوساعان سياقتى بويى سەرگىپ قالعان ەكەن»، – دەيدى.

 وَمِنْ شَرِّ حَاسِدٍ إِذَا حَسَدَ

5.جانە كۇنشىلدەردىڭ كورە الماعان كەزدەگى جاماندىعىنان (پانا ىزدەيمىن)»، – دە.        

كىسىدەن جاقسىلىقتىڭ كەتكەنىن قالايتىن كورە الماۋشىنىڭ جاماندىعىنان ساقتا. ول – اللانىڭ بەرگەن نىعمەتىنە رازىلىق تانىتپايدى ٴىشى تار بەيباق.



[1]    ٴمۋعاۋۋيز-ناس جانە فالاق سۇرەلەرى. مۇعاۋۋيز - اللا تاعالادان پانا سۇراۋ دەگەندى بىلدىرەدى.

 

سەرىكباي قاجى وراز
date14.03.2018readCount2117printباسىپ شىعارۋ