جاسىل كۇمبەزسىز ٴومىر سۇرە المايمىن...

«پايعامبار» دەگەن ٴسوزدى ايتقاندا، ەستىگەندە  ٴار ادامنىڭ جۇرەگىندە ەرەكشە ٴبىر اسەر ٴوز ٴىزىن قالدىرىپ جاتادى. ول پايعامبارىمىز مۇحاممەدكە (س.ع.س.) دەگەن ماحاببات پەن ساعىنىش سەزىمى. مۇنىمەن سىزدەر تولىق كەلىسەدى دەگەن سەنىمدەمىن. ويتكەنى، اللا تاعالانىڭ ٴوزى قۇلدارىنىڭ جۇرەگىنە پايعامبارىنا (س.ع.س.)  دەگەن «ماحاببات» سەزىمىن سالىپ قويعان.  

پايعامبارىمىزعا (س.ع.س.) دەگەن سونداي ٴبىر سۇيىسپەنشىلىكتى سۋرەتتەيتىن ٴبىر عالىم كىسى مەن كىشكەنتاي بالا اراسىندا بولعان مىنا وقيعا تۋرالى ەستىگەن بە ەدىڭىز؟

پاكىستاندىق ٴبىر عالىم قاسيەتتى مادينا قالاسىندا ورنالاسقان پايعامبارىمىزدىڭ (س.ع.س) مەشىتىن زيارات ەتۋ ٴۇشىن جولعا شىعادى. سول قالادا ٴبىر قوناق  ۇيگە تۇراقتايدى. تاڭەرتەڭ بولمە تەرەزەسىن اشىپ، تەرەزەنىڭ تۇبىنە قوناقتاعان قۇستارعا نان قيقىمدارىن بەرىپ تۇرعان ساتتە قۇستاردىڭ اۋزىنان تۇسكەن ناننىڭ قيقىمدارىن تەرىپ جەپ وتىرعان تەرەزەنىڭ تۇبىندەگى   كىشكەنتاي ٴبىر بالاعا كوزى ٴتۇستى.

سول بالاعا دەگەن ايانىش سەزىمى ويانىپ، بالانى وزىنە شاقىرىپ، بولمەگە الىپ كەلەدى.  تاماقتاندىرىپ، ابدەن قارنىن تويعىزىپ بولعاننان كەيىن عالىم  الگى بالادان تاعدىرى، اتا-اناسى، باۋىرلارى تۋرالى سۇراي باستادى.

- مەن اكەمدى ەس بىلگەلى بەرى كورگەن ەمەسپىن. ۇيدە جەتى اعايىندىمىز. ٴبارىمىزدى اسىراۋعا انامنىڭ قاۋقارى دا، اقشاسى دا جوق. سول سەبەپتى، وتباسىمىزدا ٴارقايسىمىز شامامىز جەتكەنشە وزىمىزگە بۇيىرعان ٴناپاقامىزدى تاۋىپ كۇنەلتىپ  كەلەمىز، - دەدى كىشكەتاي بالا مولدىرەگەن كوزدەرى كۇلىمدەپ.

عالىم كىسى ول بالاعا جانى اشىپ،  كۇندە بولمەسىنە كەلىپ تۇرۋىن ٴوتىندى جانە ونى قارنى تويعانشا تاماقتاندىرعىسى كەلەتىنى تۋرالى ۇسىنىسىن ايتتى. بۇل ۇسىنىستى بالا دا قابىل الدى. كۇن وتكەن سايىن ەكەۋى بىر-بىرىنە باۋىر باسىپ، جاقىن بولىپ كەتتى.

ٴبىراز كۇن وتكەننەن كەيىن عالىم كىسى بالاعا:

- مەنىمەن پاكىستانعا ٴجۇر. ەشتەڭەگە مۇقتاج بولماي، مولشىلىقتا ٴومىر سۇرەسىڭ. سونىمەن قاتار، يسلام عىلىمدارى تۋرالى وقىپ-بىلەسىڭ. ۇلكەن عالىم بولاسىڭ، - دەدى. بالا بۇل سوزدەرگە قاتتى قۋانىپ:

- الدىمەن انامنان رۇقسات سۇراپ كورەيىن، - دەيدى.

ەكەۋى بالانىڭ تۇراتىن ۇيىنە كەلەدى. عالىم بالانىڭ اناسىمەن سۇحباتتاستى. تۇرمىس تاۋقىمەتىنەن ابدەن شارشاعان انانىڭ جانارى مۇڭدى، كوزدەرى ۇمىتسىزدىك مەن قايعىعا  تولى ەدى. ونىمەن قوسا، سىرقاتى دا سىر بەرىپ، ولمەستىڭ كۇنىن كەشىپ ٴجۇر ەكەن. عالىم كىسىنىڭ ۇسىنىسى تۋرالى ەستىگەندە بالاسىنىڭ جوقشىلىقتان قۇتىلىپ، وقىپ ٴبىلىم الۋعا، يسلامدى زەرتتەپ عالىم بولۋعا مۇمكىندىگى بار ەكەنىنە قاتتى قۋاندى.

ۋاقىت وتە كەلە، عالىم كىسى مەن الگى بالانىڭ پاكىستانعا جول جۇرەتىن كۇنى دە جاقىندايدى. بالا عالىم كىسىگە كەلىپ:

- مەن سىزگە پاكىستان تۋرالى بىرەر سۇراق قويسام دەپ ەدىم، - دەدى.
- ارينە، سۇراي عوي.
- ول جاقتا مەن وينايتىن ويىنشىقتار بولادى ما؟
- ٴيا، ول جاقتا سەن وينايتىن كوپ ويىنشىقتارىڭ بولادى.
- ول جاقتا بالالارعا ارنالعان ويىن الاڭى بولادى ما؟
- ارينە، بولادى. ول جاقتا بالالارعا ارنالعان ويىن الاڭدارى وتە كوپ. 
- ول جاقتا مەنىڭ جاڭا كيىمدەرىم بولادى ما؟
- اللا قالاسا، ساعان ەڭ جاقسى، جاڭا كيىمدەر ساتىپ الىپ بەرۋگە تىرىسامىن.

كوكەيىندەگى سۇراقتارعا قاناعاتتانارلىق جاۋاپ العان بالا قاتتى قۋانىپ اناسىنا كەتتى. ارادا ٴبىراز ساعات وتكەننەن كەيىن بالا عالىم كىسىنىڭ جانىنا كەلىپ تاعى دا:

- ٴسىز تۇراتىن پاكىستاندا پايعامبارىمىزدىڭ (س.ع.س.) مەشىتىندەگىدەي جاسىل كۇمبەزدەر بار ما؟  -دەپ سۇرادى. عالىم وعان:
- جوق، مۇنداي جاسىل كۇمبەز بىزدە جوق. جوق بولعاندىعى سەبەپتى، ونى (س.ع.س.) ساعىنىپ، ٴبىر كورۋگە اسىق بولىپ وسى مەكەنگە كەلدىم ەمەس پە؟! - دەدى. بالا ٴبىراز ۋاقىت ٴۇنسىز قالدى. تەرەڭ ويعا شومدى دا:
- مەن جاڭا كيىمدەرسىز ٴومىر سۇرە الامىن. ويىنشىقتارسىز ٴومىر سۇرە الامىن. ماعان ويىن الاڭدارى دا كەرەك ەمەس. مەن جاڭا ٴۇيسىز دە ٴومىر سۇرە الامىن. ٴبىراق، مەن پايعامبارىمىزدىڭ (س.ع.س.) مەشىتىنىڭ جاسىل كۇمبەزىنسىز ٴومىر سۇرە المايمىن. جۇرەگىم شاقىرعان ساتتە، قالاعان ۋاقىتىمدا كەلىپ، قالاعان ۋاقىتىمدا جىلاپ، مۇڭىمدى شاعا الاتىن بۇل مەشىتسىز ٴومىر سۇرە المايمىن. ٴسىز مەنى كەشىرىڭىز، مەن سىزبەن بىرگە ول ەلگە بارا المايمىن، - دەدى دە ۇيىنە قاراي بەت الادى.

عالىم كىسى ەشتەڭە دەمەستەن ٴبىراز ۋاقىت ٴۇنسىز تۇرىپ قالدى. كوزىنە ەرىكسىز كەلگەن جاستى تىيا الماستان:

- مەن ساعان بۇدان اسقان قانداي باقىتتى سىيلاي الامىن؟ ۋا، جاراتۋشى يەم، ماعان ساعان دەگەن مىقتى يمان جانە مىنا بالانىڭ جۇرەگىندەگىدەي پايعامبارىمىزعا (س.ع.س.) دەگەن سۇيىسپەنشىلىك پەن ماحابباتتى ٴناسىپ ەت! - دەپ قولىن جايىپ دۇعا جاسادى.

ادامزاتتىڭ ارداقتىسى، سۇيىكتى پايعامبارىمىز مۇحاممەدكە اللانىڭ يگىلىگى مەن سالەمى بولسىن!  

لاۋرا الماحانوۆا
date26.02.2018readCount909printباسىپ شىعارۋ