«يسلام جانە ۇلى دالا وركەنيەتى» كونفەرەنسياسىنىڭ ۇندەۋى

ٴبىز، «يسلام جانە ۇلى دالا وركەنيەتى» اتتى كونفەرەنسياعا قاتىسۋشىلار، تاريحشى عالىمدار قازاقستان مۇسىلماندارى ٴدىني باسقارماسىنىڭ رۋحاني سالاداعى يگى باستامالارىنا، اتاپ ايتقاندا، حالقىمىزدىڭ ٴدىني ساناسىنىڭ قالىپتاسۋىندا يسلام ٴدىنىنىڭ، ونىڭ ىشىندە سۋنيتتىك حانافي ٴمازھابىنىڭ ٴرولىن ارتتىرۋ، يسلامنىڭ قازاقستاندىق ٴداستۇرلى ۇلگىسىن دامىتۋ، رۋحاني ٴبىرتۇتاس قوعام قۇرۋ يدەياسىنا ٴبىراۋىزدان قولداۋ بىلدىرەمىز.

قازاق توپىراعىنان شىققان تانىمال ٴدىني تۇلعالاردىڭ ەڭبەگىن ناسيحاتتاۋ، جاستاردىڭ ٴدىني كوزقاراسىنىڭ راديكالدانۋىنا جول بەرمەۋ، تۇركى-مۇسىلمان جۇرتشىلىعىنىڭ يسلام ٴدىنىن قابىلداۋىنا ەرەكشە ىقپال ەتكەن ق.ا.ٴياسساۋيدىڭ شىعارمالارىن وسكەلەڭ ۇرپاققا ونەگە ەتۋ، ٴدىن مەن ٴداستۇردى جاڭعىرتۋ – بۇگىنگى كۇننىڭ كەزەك كۇتتىرمەيتىن ماسەلەلەرىنىڭ ٴبىر پاراسى دەپ سانايمىز.

قازاق حالقى عاسىرلار بويى ۇرپاقتان-ۇرپاققا جالعاسىپ كەلە جاتقان اتا ٴدىنى – يسلامدى سانالى تۇردە جۇرەك قالاۋىمەن قابىلدادى.

بايتاق دالانىڭ تۇرعىندارى رۋحاني نەگىزدەرىن يسلامنان تاۋىپ، ٴدىننىڭ ادامگەرشىلىك قۇندىلىقتارىن بويىنا ٴسىڭىرىپ، وزدەرىنىڭ ٴسالت-داستۇرىن، ادەت-عۇرىپتارىن بايىتا ٴتۇستى.

ەجەلگى ماۋرەنناحر – يسلامنىڭ تارالۋ ايماعى عانا بولىپ قالعان جوق. سونىمەن قاتار، اسىل ٴدىنىمىزدىڭ دامۋ، وركەندەۋ ورتالىعىنا اينالدى. مۇحاممەد ٴال-بۇحاري، ٴابۋ حانيفا، ٴابۋ مانسۇر ٴال-ماتۋريدي، ٴابۋ ناسىر ٴال-فارابي، ٴابۋ ٴالي يبن سينا، ٴابۋ رايحان ٴال-بيرۋني، ٴجۇسىپ بالاساعۇني سىندى عۇلاما-عالىمدار، ويشىلدار الەمدىك يسلام وركەنيەتىنە ولشەۋسىز ۇلەس قوستى. وسىلايشا، قازاق توپىراعىندا يسلامدىق ٴداستۇرلى اعارتۋ مەكتەبى قالىپتاستى.

ٴبىز يسلام جانە بەيبىتشىلىكتىڭ – ەگىز ۇعىم ەكەنىن ايتۋدان جانە وسىناۋ ۇلى ۇعىمداردى ۇرپاق ساناسىنا سىڭىرۋدەن ەشقاشان جالىقپاۋىمىز قاجەت. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ «رۋحاني جاڭعىرۋ» باستاماسى دەر كەزىندە جۇزەگە اسقان كەشەندى باعدارلاما دەپ باعالايمىز.   

بۇگىنگى كونفەرەنسيانىڭ نەگىزگى يدەياسىنا اينالعان ٴدىني تانىم مەن سال-داستۇرىمىزبەن ۇيلەسكەن ورتاازيالىق ٴدىني مەكتەبىمىزدى جاڭعىرتىپ، ٴبىرتۇتاس مۇسىلمان ۇمبەتىن قالىپتاستىرۋ باستاماسىن قۇپتايمىز. وسى رەتتە بارشا مۇسىلمان قاۋىمدى ٴدىن اتىن جامىلىپ، سوقىر سەنىمگە جەتەلەيتىن، ٴدىندى وزبىرلىق ارەكەتتەر مەن ساياسي جانە جەكە مۇددەلەر ٴۇشىن پايدالانۋدى كوزدەيتىندەرگە ىلەسپەۋگە شاقىرامىز.

ٴبىز كونفەرەنسياعا قاتىسۋشىلار، قازاقستان ازاماتتارىن قوعامدا جالپىعا ورتاق ادامگەرشىلىك قۇندىلىقتاردىڭ ناسيحاتتالۋىنا، تاريحي ٴدىنىمىزدى كەلەسى ۇرپاققا دۇرىس جەتكىزۋگە، ۇلتتىق مادەنيەتىمىز بەن ٴداستۇرىمىزدى جاڭعىرتۋعا بەلسەندى تۇردە ۇلەس قوسۋعا ۇندەيمىز.

كونفەرەنسياعا قازاقستاننىڭ باس ٴمۇفتيى، وڭتۇستىك قازاقستان وبلىسى اكىمشىلىگىنىڭ لاۋازىمدى باسشىلارى، قمدب عۇلامالار كەڭەسىنىڭ مۇشەلەرى، ٴدىن قىزمەتكەرلەرى قاتىستى

تۇركىستان قالاسى 24 قاڭتار 2018 جىل

date25.01.2018readCount1159printباسىپ شىعارۋ