كۇندەلىكتى زىمبىرمەن اۋقاتتانۋدىڭ 5 سەبەبى

ٴزىمبىر – عالامشارىمىزداعى ەڭ پايدالى ٴارى ٴدامدى دامدەۋىشتىڭ ٴبىرى. ول – قۇنارلى زاتتارعا، بيولوگيالىق بەلسەندى قوسىلىستارعا باي. ٴزىمبىر مەن ليمون شايىن ىشكىڭىز كەلە مە؟ مۇمكىن ٴزىمبىر قوسىلعان سالات قالايتىن بولارسىز؟ ارينە، ول اركىمنىڭ ٴوز تاڭداۋى. ال ٴبىز كۇندەلىكتى ٴزىمبىر تۇتىنۋدىڭ دەنساۋلىعىڭىز بەن اعزاڭىزعا تيگىزەر 5 ٴتۇرلى پايداسىن ٴسوز ەتپەكپىز.

ٴزىمبىر – كۇشتى انتيوكسيدانت

زىمبىرگە ەرەكشە ٴدام مەن ٴيىس بەرەتىن – قۇرامىنداعى تابيعي مايلار. ولاردىڭ ىشىندەگى ەڭ ماڭىزدىسى – گينگەرول. ول – ٴزىمبىردىڭ كوپتەگەن پايدالى قاسيەتىن قامتاماسىز ەتەتىن بيولوگيالىق بەلسەندى قوسىلىس. جالپى، گينگەرولدى قابىنۋعا قارسى جانە انتيوكسيدانتتىق اسەرى بار كۇشتى قۇرال رەتىندە بىلەمىز. بۇل تابيعي ماي اعزاڭىزعا جۇقپالى ىندەتكە، كۇيزەلىسكە توتەپ بەرىپ، كۇش-قۋاتىڭىزدى ۇزاق ۋاقىتقا ساقتاۋعا كومەكتەسەدى.

جۇرەك اينۋىن باسادى

جۇرگىزىلگەن زەرتتەۋ جۇمىستارى ٴزىمبىر تامىرىنىڭ جۇرەك اينۋىنا قارسى ٴتيىمدى قۇرال ەكەندىگىن كورسەتتى. بۇل دامدەۋىشتىڭ تەڭىز اۋرۋىنا شالدىققاندا كومەكتەسەندىگى جايلى اڭىزدار دا جوق ەمەس. ٴتىپتى، كەي عالىمداردىڭ ايتۋىنشا، ٴزىمبىردىڭ جۇرەك اينۋىنا قارسى اسەرى ايگىلى دارى-دارمەكتەردەن ارتىق. ول قان قىسىمىنىڭ وزگەرۋى، باس جازۋ سيندرومى، وتادان كەيىن قالپىنا كەلۋ كەزەڭىندە جۇرەك اينۋ بەلگىلەرىن باسادى.

بۇلشىق ەت اۋرۋىن جەڭىلدەتەدى

authoritynutrition.com كورسەتكەن زەرتتەۋ جۇمىسىنىڭ ناتيجەسى بويىنشا، قاتىسۋشىلارى 11 كۇن بويى 2 گرامم ٴزىمبىر تامىرىن تۇتىنعاننان كەيىن، دەنەگە ٴتۇش تۇسىرەتىن جاتتىعۋلارى سەبەپتى پايدا بولعان بۇلشىق ەت اۋرۋى بىرنەشە ەسە جەڭىلدەگەن. ٴزىمبىر بۇلشىق ەتكە تىكەلەي اسەر ەتپەگەنىمەن، ونىڭ قابىنۋعا قارسى اسەرى ٴتان اۋرۋىن باسادى. سونىمەن قاتار ەتەككىر مەرزىمىندە ۇنتاقتالعان ٴزىمبىردى تۇتىنۋ اۋىرسىنۋ سەزىمىنىڭ جەڭىلدەۋىنە سەبىن تيگىزەتىنى دالەلدەنگەن.

ٴزىمبىر سۋسامىر دەرتىنە شالدىعۋ ٴقاۋپىن تومەندەتەدى

بۇل زەرتتەۋ جۇمىستارىنداعى جاڭا باعىت سانالعانىمەن، عالىمدار ٴزىمبىردىڭ سۋسامىرعا قارسى قاسيەتى بار دەپ توپشىلايدى. 2015 جىلى سۋسامىردىڭ ٴىى تۇرىنە شالدىققان 40 ناۋقاستىڭ قاتىسۋىمەن جۇرزىزىلگەن تاجىريبە بارىسىندا، تۇراقتى تۇردە ۇنتاقتالعان ٴزىمبىر تۇتىنۋ (اش قارىنعا 2 گراممنان) ناۋقاستاردىڭ قانىنداعى قانت دەڭگەيىن 12%-عا دەيىن تۇسىرۋگە كومەكتەسكەن. الايدا مۇنداي ناتيجە تەك زەرتتەۋ جۇمىسى بارىسىندا عانا بايقالعان جانە قول جەتكىزگەن مالىمەتتەر اۋقامدى تاجىريبە جۇمىستارىمەن  دالەلدەنۋى ٴتيىس.

ٴزىمبىر مي قىزمەتىن جاقسارتادى

قىشقىلداندىراتىن كۇيزەلىس جانە سوزىلمالى قابىنۋ قارتايۋ پروسەسىن جالدامداتاتىنى بەلگىلى. جانە ٴدال وسى فاكتورلاردى السگەيمەر دەرتىمەن جانە جاسقا بايلانىستى كوگنيتيۆتى بۇزىلىستارمەن بايلانىستىرادى.  جانۋارلارعا جۇرگىزىلگەن زەرتتەۋ جۇمىستارىنىڭ ٴبىرقاتارى ٴزىمبىر قۇرامىنداعى انتيوكسيدانتتار مەن بەلسەندى قوسىلىستار ميدا ورىن الاتىن قابىنۋ رەاكسياسىن باۋلاتاتىنىن كورسەتكەن.

مۇنان بولەك، ٴزىمبىردىڭ مي قىزمەتىن جاقسارتاتىن اسەرگە يە ەكەندىگى جونىندە دەرەكتەر دە بار.ورتا جاستاعى 60 ايەل ادامنىڭ دەنساۋلىعىن باقىلاۋعا العان زەرتتەۋ جۇمىسىنىڭ ناتيجەسى بويىنشا، تۇراقتى تۇردە ٴزىمبىردى تۇتىنۋ رەاكسيا جىلدامدىعىن، ەستە ساقتاۋ مەن ەسەپتەۋ دالدىگىن جاقسارتادى.

date25.01.2018readCount1483printباسىپ شىعارۋ