قمدب-عا قاتىستى 6 دەرەك

بۇگىن، 12 قاڭتار – قازاق ەلىنىڭ دەربەس ٴمۇفتياتى قۇرىلعان كۇن. وسى كۇنى قازاقستان مۇسىلماندارىنىڭ تۇڭعىش قۇرىلتايىندا راتبەك قاجى نىسانباي ۇلى باس ٴمۇفتي لاۋازىمىنا سايلاندى. ٴمۇفتياتتىڭ تىنىس-تىرشىلىگىن ىشتەن كورىپ، ٴدىني سالاعا قاتىستى اقپاراتتىڭ ورتاسىندا جۇرگەننەن كەيىن ايتىلۋى ٴتيىس التى ماسەلەمەن وي ٴبولىسىپ وتىرمىن.

1. ەلدەگى 4 400 ٴدىن قىزمەتكەرى باس مۇفتيگە ۇيىپ، ۇيىسىپ-ۇيىمداسىپ قىزمەت ەتۋدە. الىستى ايتپايىق، كورشى ەلدىڭ وزىندە ٴار ايماققا جاۋاپتى يمام باس-باسىنا ٴمۇفتي. بۇل جاعدايدا ۇيلەسىمدى قىزمەتتەن بەرەكە كەتپەي مە؟ ٴبىر جۇيەگە باعىنعان بىزدەگى جاعدايعا تاۋبە دەيسىڭ.

2. قمدب قۇقىقتىق مارتەبە تۇرعىسىنان ٴدىني بىرلەستىك بولعانىمەن، قوعامدىق قىزمەتى اۋقىمدى، وزىنە جۇكتەلگەن ميسسياسى ۇلكەن. سوندىقتان بولار، ٴمۇفتياتتىڭ ەلىمىزدەگى كۇللى مۇسىلمان قاۋىمنىڭ قاراشاڭىراعىنا اينالۋى زاڭدىلىق. ەلباسىنىڭ قازاقستان مۇسىلماندارىنىڭ كەزەكتى قۇرىلتايىنان كەيىن باس ٴمۇفتيدى ٴداستۇرلى رەسمي قابىلداۋى – ٴمۇفتيات قىزمەتىنىڭ ماڭىزدىلىعىن ارتتىرا تۇسەدى.

3. ٴدىني باسقارما مەملەكەتتىڭ ۇلتارالىق ٴھام كونفەسسياارالىق تاتۋلىقتى نىعايتۋعا باعىتتالعان باستامالارىنا ٴاردايىم قولداۋ بىلدىرەدى. بۇل جاعدايعا وبەكتيۆتى كوزقاراس قالىپتاستىرۋ – ٴسىز بەن ٴبىزدىڭ ادامدىق ٴھام ازاماتتىق بورىشىمىز.

4. ٴمۇفتيات ٴوزىنىڭ قوعامدىق قىزمەتىن ەلىمىزدەگى زاڭ اكتىلەرى اياسىندا قمدب جارعىسىنا سايكەس جۇرگىزەدى. كەيدە بەلسەندى ازاماتتار (ولاردى دا تۇسىنۋگە بولادى...) ٴمۇفتياتتىڭ مۇمكىندىگىنەن تىس مەملەكەتتىك ماسەلەلەر توڭىرەگىندە قمدب-دان مالىمدەمە ياكي شەشىم كۇتەدى. بۇل – زاڭدى قۇبىلىس. ويتكەنى، رۋحاني سالادا ٴدىني باسقارمانىڭ وزىندىك ورنى مەن ٴرولى بار. الايدا، زاڭ الدىندا بارلىق ٴدىني بىرلەستىكتىڭ مارتەبەسى بىردەي، قۇقىعى تەڭ. وسى تۇرعىدان كەلگەندە ٴمۇفتياتتىڭ ۇستانىمىنا قۇرمەتپەن قاراۋ ٴلازىم. ٴادىلى – وسى.

5. ٴوزىن-وزى قاراجاتپەن قامتاماسىز ەتىپ، قوعامداعى ميسسياسىن اتقارىپ كەلە جاتقان ٴدىني باسقارماعا قولداۋ كورسەتۋ – ەل يگىلىگى ٴۇشىن جۇمىلىپ جۇمىس ىستەۋگە نيەتتى جاننىڭ اسىل مىندەتى. بۇل قولدان كەلمەسە، تىلەكتەستىك پەيىل تانىتۋ – جانعا دەمەۋ. سىندارلى كەزەڭدە بىرلىگىمىزدى كورسەتپەسەك – وزىمىزگە سىن.

6. قمدب 2018 جىلى باس ٴمۇفتي سەرىكباي قاجى ورازدىڭ تاپسىرماسىمەن، ۇزدىك يمامدار توبىن قالىپتاستىرۋ، جاستارعا دۇرىس ٴدىني اقپارات جەتكىزۋ، وتباسى قۇندىلىعىن دارىپتەۋ، مەملەكەتتىك «رۋحاني جاڭعىرۋ» باعدارلاماسىن ناسيحاتتاۋ، حالىق اراسىندا ٴپاتريوتيزمدى ناسيحاتتاۋ، دەسترۋكتيۆتى اعىمداعى ادامدارعا تۇسىندىرمە جۇمىستارىن جۇرگىزۋ، ٴداستۇرلى حانافي ٴمازھابىنىڭ قاعيدالارىن ۋاعىزداۋ، ت.ب. جۇمىستارعا باسىمدىق بەرەدى. ورتاق ىستە جۇمىلايىق!

اعابەك قونارباي ۇلى
date12.01.2018readCount1292printباسىپ شىعارۋ