رۋحاني جاڭعىرۋدى ىسپەن قولدايىق!

ۇستىمىزدەگى جىلدىڭ 12-ساۋىرىندە مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى كولەمدى ماقالاسى جاريالاندى. بارشا دەرلىك مەملەكەت، قوعام قايراتكەرلەرى جانە ت.ب. ازاماتتار ماقالانى قولداپ جانە وڭدى پىكىر ٴبىلدىرىپ جاتىر. ونىڭ ىشىندە رۋحانيات قىزمەتكەرلەرىنىڭ ٴبىرى بىزدەر ٴدىندارلار دا بارمىز.

راسىندا، ەكونوميكالىق دامۋ مەن ىشكى ساياسي تۇراقتىلىقتىڭ باياندىلىعى رۋحانياتتا. شەگىنىس جاساپ ايتار بولساق، تاۋەلسىزدىكتىڭ العاشقى ون جىلدىعىنداعى نارىقتىق ەكونوميكا سىندى باعدارلامالار ەلدىڭ الەۋمەتتىك ەڭسەسىن كوتەرۋگە باعىتتالدى. حالىقتىڭ ٴال-اۋقاتى كوتەرىلىپ، تۇرمىسى جاقساردى. ىشكى ساياسي تۇراقتىلىقتى بەرىك ەتۋ ٴۇشىن ەلباسى باستاماسىمەن قازاقستان حالقى اسسامبلەياسى سياقتى ٴبىرقاتار ينستيتۋتتار اشىلدى. اتالمىش ينستيتۋتتاردىڭ جۇمىسىمەن تانىسقان الىس-جاقىن شەت مەملەكەتتەر قىزىعۋشىلىق تانىتۋى، ٴوز ەلدەرىندە بۇل ينستيتۋتتى تاجىريبەدەن وتكىزۋگە ىقىلاس قويۋى اسسامبلەياعا بەرىلگەن جوعارى باعا. كەلەسى قادام – رۋحاني جاڭعىرۋ بولدى. بۇل دەر كەزىندە جاسالعان ۇندەۋ دەر ەدىم. ەلباسى ٴوز ماقالاسىندا: «ٴبىز جاڭعىرۋ جولىندا بابالاردان ميراس بولىپ، قانىمىزعا سىڭگەن، بۇگىندە تامىرىمىزدا بۇلكىلدەپ جاتقان ىزگى قاسيەتتەردى قايتا تۇلەتۋىمىز كەرەك»، دەپ ايتقانىنداي رۋحاني جاڭعىرۋ – حالقىمىزدىڭ رۋحاني باي مۇراسىن قايتا قالپىنا كەلتىرۋگە، جوعالتقان جادىگەر دۇنيەلەردى تۇگەندەۋگە ٴھام جاس ۇرپاق ساناسىنا ٴسىڭىرۋ ٴۇشىن ناسيحاتتاۋعا بەرىلگەن ۇلكەن مۇرسات دەپ بىلەمىن. رۋحانيات سالاسىنىڭ مامانى رەتىندە ايتارىم، قازاقستان مۇسىلماندارى ٴدىني باسقارماسىنىڭ «ٴدىن مەن ٴداستۇر» اتتى اۋقىمدى جۇمىسى ۇندەۋگە قوسقان تامشىداي ۇلەسى دەپ ويلايمىن. ۇلتتىڭ رۋحانياتى ونىڭ ٴتىلى، تاريحى، ادەبيەتى، ٴسالت-داستۇرى دەسەك، مەشىت – سول رۋحانياتتىڭ ٴبىر وشاعى. ٴتىل، ٴدىل جانە ٴدىن بۇعان ادەبيەتتى دە قوسۋىمىز كەرەك بىر-بىرىمەن تىعىز بايلانىستاعى قۇندىلىقتار. بىر-بىرىمەن ساباقتاسا وتىرىپ، ۇلتتىق كودىمىزدى ايقىنداۋشى بىرەگەي فاكتور.

ەلباسىنىڭ ماقالاسىندا پراگماتيزمگە ارنايى ٴبولىم بولىنگەن. سول بولىمدە: «پراگماتيزم – ٴوزىڭنىڭ ۇلتتىق جانە جەكە بايلىعىڭدى ناقتى ٴبىلۋ، ونى ۇنەمدى پايدالانىپ، سوعان سايكەس بولاشاعىڭدى جوسپارلاي الۋ، ىسىراپشىلدىق پەن استامشىلىققا، داڭعويلىق پەن كەردەڭدىككە جول بەرمەۋ دەگەن ٴسوز. قازىرگى قوعامدا شىنايى مادەنيەتتىڭ بەلگىسى – ورىنسىز ٴسان-سالتانات ەمەس. كەرىسىنشە، ۇستامدىلىق، قاناعاتشىلدىق پەن قاراپايىمدىلىق، ۇنەمشىلدىك پەن ورىندى پايدالانۋ كورگەندىلىكتى كورسەتەدى»، دەپ بۇگىنگى كۇننىڭ ەڭ وزەكتى ماسەلەسىن كوتەرەدى. راسىندا، شىنايى مادەنيەتتىڭ كوشباسشى وكىلى بولعان اتا-بابامىزدىڭ جولىنان جاڭىلىپ كەلەمىز. مادەنيەتتىڭ ولشەمىن شۇبارلانعان تىلمەن، ۇلتتىق قۇندىلىققا ۇركە قاراۋمەن قالا بەرسە بەيمادەنيەتكە بوي ۇرۋمەن بۇزۋدامىز. وسى تۇرعىدان، ماقالاعا ارقاۋ بولعان رۋحاني جاڭعىرۋدى سوزبەن ەمەس ناقتى ىسپەن، باتىل قاداممەن قولداۋ ٴارقايسىمىزدىڭ ازاماتتىق بورىشىمىز ەكەنىن ايتقىم كەلەدى. 

باعدات ابدۋكاريموۆ
date01.11.2017readCount1994printباسىپ شىعارۋ