ٴ ٴتىلىڭدى تىي! - muslim.kz
ٴتىلىڭدى تىي!

يمام تيرميزيدەن جەتكەن حاديستە بىلاي دەيدى:

«مۋاز يبن جابال ايتتى: «مەن راسۋلاللامەن (س.ع.س.) بىرگە ساپارعا شىققان ەدىم. كەتىپ بارا جاتقانىمىزدا راسۋلاللاعا (س.ع.س.) جاقىنداپ:

– يا، اللانىڭ ەلشىسى، مەنى ٴجانناتقا كىرگىزەتىن جانە توزاقتان الىستاتاتىن ٴىستىڭ حابارىن بەرشى، – دەدىم.

– شىن مانىندە ۇلى نارسەنى سۇرادىڭ. ول اللا لايىقتى قىلعان ادام ٴۇشىن وتە وڭاي: اللاعا عيبادات قىلۋىڭ، وعان ەش نارسەنى سەرىك قوسپاۋىڭ، نامازعا تۇرۋىڭ، زەكەت بەرۋىڭ، رامازان ايىندا ورازا ۇستاۋىڭ، قاجىلىق قىلۋىڭ، – دەدى راسۋلاللا (س.ع.س).

كەيىن ول (س.ع.س.): «ساعان جاقسىلىق ەسىكتەرىن كورسەتىپ قويايىن با؟ ورازا – ساقتاۋشى. ساداقا، سۋ وتتى وشىرگەندەي، قاتەلەرىڭدى وشىرەدى. ادامنىڭ تۇندە وقىعان نامازى – ساليحتاردىڭ ۇرانى»، – دەدى دە: «جامباستارى جاتار جايدان اجىرايدى»، – اياتىن وقىدى.

سوسىن مەنەن: «ساعان ٴىستىڭ باسى، ومىرتقاسى جانە وركەشىنىڭ شوقىسى جونىندە حابار بەرەيىن بە؟»، – دەپ سۇرادى.

– ارينە، اللانىڭ ەلشىسى، – دەدىم.

– ٴىستىڭ باسى – يسلام. ونىڭ ومىرتقاسى – ناماز. وركەشىنىڭ شوقىسى – جيھاد، – دەدى پايعامبار (س.ع.س.).

كەيىن: «ساعان وسىلاردىڭ بارلىعىنا قاتىستى نارسەنىڭ حابارىن بەرەيىن بە؟»، – دەدى. مەن: «ٴيا، اللانىڭ ەلشىسى»، – دەپ جاۋاپ قاتتىم. سوندا ول (س.ع.س.) ٴتىلىن نۇسقاپ: «مىنانى تىي»، – دەدى.

– يا، اللانىڭ پايعامبارى، ٴبىز سويلەگەن ٴسوزىمىز ٴۇشىن دە سۇراققا الىنامىز با؟

– ەي، مۋاز. ادامداردى تىلدەرىنىڭ جاماندىعى توزاققا جۇزىمەن نە تۇمسىعىمەن تۇسىرمەسە، باسقا نە تۇسىرەدى؟ – دەپ جاۋاپ بەردى پايعامبار (س.ع.س)».

date23.09.2017readCount2857printباسىپ شىعارۋ