بيىلعى توقتىلار قۇرباندىققا جارامايدى

قۇربان ايتقا ساناۋلى كۇندەر قالدى. اللانىڭ رازىلىعىنان ۇمىتتەنگەن جاندار قۇرباندىققا سوياتىن مالدى تاڭداۋدا وتە مۇقيات بولۋ قاجەت. قۇرباندىقتىڭ اللانىڭ قۇزىرىندا قابىل بولۋىنىڭ مۇسىلمان ٴۇشىن ماڭىزدىلىعىن ەسكەرسەك، ٴبىرىنشى ىقىلاس-نيەت دۇرىس بولۋى، ەكىنشى سويىلاتىن  مال جارامدى بولۋى كەرەك. 

ٴمۇفتياتتىڭ رەسمي سايتىندا: «ەشكىنىڭ جانە قويدىڭ جاسى ٴبىر جىلدان اسىپ ەكىنشى جىلعا كىرگەنى، سونداي-اق التى ايلىق مارقا قوزى (ۇلكەن قوي سەكىلدى) ٴىرى، قوڭدى بولسا قۇرباندىققا جارامدى. سيىردىڭ ەكى جاسقا تولىپ، ٴۇشىنشى جىلعا كىرگەنىن، ال تۇيەدەن جاسى بەس جىلدان اسىپ، التىنشى جىلعا كىرگەنىن قۇرباندىققا شالۋعا بولادى. سونىمەن قاتار سويىلاتىن مالدىڭ كەمشىلىك، كىناراتى بولماۋى كەرەك»، – دەلىنگەن (fatua.kz) 

قويدىڭ ٴبىر جاسى شامامەن 6 اي. سەبەبى، ساۋلىقتارىنىڭ بۋازدىق مەرزىمى 145 – 155 تاۋلىككە سوزىلادى، ياعني ورتاشا ەسەپپەن 5 اي 10 كۇن (kk.m.wikipedia.org). سول ٴۇشىن شاريعاتتا التى ايدان اسقان توقتى قۇرباندىققا جارامدى دەلىنگەن. 

وسى ورايدا ەسكەرتكىم كەلگەنى، بيىلعى توقتىلاردىڭ بارلىعى بىردەي قۇرباندىققا جارامايدى. ويتكەنى، توقتىنىڭ جاسى كەم دەگەندە التى ايدان اسقان جانە ٴىرى  بولۋى شارت. دالىرەك ايتقاندا، اعىمداعى جىلدىڭ ناۋرىز ايىنا دەيىن تۋىلعان ٴتول بولۋى ٴتيىس. ەلىمىزدىڭ ٴبىرقانشا وڭىرلەرىندە ساقمان ٴساۋىر ايىندا باستالاتىنى بەلگىلى. اسىرەسە، ورتالىق جانە سولتۇستىك ايماقتاردا.

سوندىقتان، قۇربان مالىن ساتۋشىلار مەن تۇتىنۋشىلار وسىنى ەسكەرسە ەكەن دەيمىن. 

كەلە جاتقان قۇربان ايت قۇتتى بولسىن! قۇرباندىقتارىڭىز قابىل بولسىن! «ەشبىر قۇل قۇربان كۇنى اللانىڭ قۇزىرىندا قۇرباندىق قانىن اعىزعاننان ارتىق جاقسى امال جاساي المايدى. ويتكەنى، شالىنعان مالدىڭ ٴمۇيىزى، قىلى جانە تۇياقتارى قيامەت كۇنى مول  ساۋاپ اكەلەدى. شالىنعان قۇرباندىقتىڭ قانى جەرگە اقپاستان بۇرىن اللانىڭ قۇزىرىندا جوعارى مارتەبەگە جەتەدى. ولاي بولسا، شىن كوڭىلمەن قۇربان شالىڭىز» (xاديس).

 

ەرشات وڭعاروۆ
قمدب عۇلامالار كەڭەسىنىڭ xاتشىسى،
تەولوگ، phd

ەرشات وڭعاروۆ
date30.08.2017readCount1869printباسىپ شىعارۋ