«كافيرۋن» سۇرەسى

ٴجابير (ر.ا.): «اللا ەلشىسى وسى سۇرەنى جانە «قۇل ھۋا اللاھۋ احادتى» تاۋافتىڭ ەكى راكاعاتىندا وقىدى»، [1] – دەپ ريۋايات ەتەدى.

ٴابۋ حۇرايرا (ر.ا.): «اللا ەلشىسى (س.ع.س.)وسى سۇرەنى تاڭ نامازىندا وقىدى»، – دەيدى.

بسم الله الرحمن الرحيم

قُلْ يَا أَيُّهَا الْكَافِرُونَ

1. ايت: «ٴاي، كاپىرلەر!

ەي، مۇحاممەد! تاس پەن پۇتقا تابىنۋشى مىنا كاپىرلەرگە ايت! تاپسىرشىلەر: «قۇرايىش اللا ەلشىسىنە (س.ع.س.)ٴبىر جىل ولاردىڭ قۇدايلارىنا تابىنۋدى، ٴبىر جىل ونىڭ قۇدايىنا قۇلشىلىق ەتۋدى ۇسىندى. پايعامبار (س.ع.س.): «اللا تاعالاعا ٴبىر نارسەنى ورتاق قوسۋدان، اللانىڭ ٴوزى ساقتاسىن»، - دەدى. قۇرايىش: «ٴبىزدىڭ قۇدايلارىمىزدىڭ بىرىنە قول تيگىزسەڭ بولعانى، سەنى پايعامبار دەپ مويىنداپ قۇدايىڭا قۇلشىلىق ەتەمىز»، - دەدى. سوندا وسى سۇرە ۋاحي ەتىلدى. اللا ەلشىسى (س.ع.س.) ٴال-حارام مەشىتىنە بارىپ قۇرايىشتىڭ قاق ورتاسىنا تۇرىپ، وسى سۇرەنى وقىپ بەردى. وسى ساتتە، ولاردىڭ پايعامباردى كوندىرۋدەن تولىقتاي ۇمىتتەرى ٴۇزىلدى»، - دەيدى. بۇدان كەيىن قۇرايىش پايعامبارعا (س.ع.س.) جانە ونىڭ سەرىكتەرىنە ٴزابىر كورسەتە باستادى.

اياتتاعى «ايت!» دەگەن ٴسوز پايعامبار (ñ.ع.ñ.)اللا تاعالا قۇزىرىنان ايتۋعا ٴامىر ەتىلگەندىگىن بىلدىرەدى. ال، قۇرايىشتىڭ وزىنە اشۋلاناتىنىن بىلە تۇرا، ولارعا «ٴاي، كاپىرلەر!» دەپ ٴۇن قاتۋى، پايعامباردىڭ (س.ع.س.)اللا تاعالا تاراپىنان قورعاۋلى ەكەنىن اڭعارتادى.

لَا أَعْبُدُ مَا تَعْبُدُونَ

2. سەندەردىڭ تابىنعاندارىڭا مەن قۇلشىلىق ەتپەيمىن.

مەن سەندەر قۇلشىلىق ەتىپ جۇرگەن ەشبىر پايدا بەرمەيتىن، زيان دا تيگىزە المايتىن پۇت قۇدايلارىڭا ەشۋاقىتتا سيىنبايمىن.

وَلَا أَنْتُمْ عَابِدُونَ مَا أَعْبُدُ

3. ٴارى سەندەر دە مەنىڭ قۇلشىلىق ەتكەنىمە قۇلشىلىق جاسامايسىڭدار.

ەي، مۇشرىكتەر! سەندەر دە مەن قۇلشىلىق ەتەتىن حاق قۇدايعا قۇلشىلىق ەتپەيسىڭدەر. مەن الەمدەر راببىسى حاق اللاعا قۇلشىلىق ەتەمىن. ال، سەندەر بولسا تاستار مەن پۇتتارعا تابىناسىڭدار. راحمان اللاعا قۇلشىلىق ەتۋ مەن پۇتتارعا تابىنۋ ەكەۋى ەكى بولەك نارسە.

وَلَا أَنَا عَابِدٌ مَا عَبَدْتُمْ

4. ٴسىرا، مەن سەندەردىڭ تابىنعان نارسەلەرىڭە قۇلشىلىق جاساۋشى ەمەسپىن.

جانە دە مەن سەندەر شوقىنعان پۇتتارعا اۋەلدە جانە ٴقازىر دە سيىنبايمىن. مەن سەندەردىڭ جالعان قۇلشىلىقتارىڭدى جاسامايمىن.

وَلَا أَنْتُمْ عَابِدُونَ مَا أَعْبُدُ

5. سونداي-اق، سەندەر دە مەنىڭ قۇلشىلىق ەتكەنىمە قۇلشىلىق قىلۋشى ەمەسسىڭدەر.

سەندەر دە مەن قۇلشىلىق ەتىپ تۇرعان جاراتۋشىعا عيبادات ەتپەيسىڭدەر. سەندەر مەنىڭ دۇرىس قۇلشىلىعىمدى جاسامايسىڭدار.

لَكُمْ دِينُكُمْ وَلِيَ دِينِ

6. سەندەرگە – ٴوز دىندەرىڭ، ماعان – مەنىڭ ٴدىنىم»، – دە.

سەندەردىڭ وزدەرىڭە ٴتان اللاعا سەرىك قوسۋ دىندەرىڭ بار. ال، مەنىڭ يسلام جانە اللا تاعالانى جالعىز دەيتىن ٴدىنىم بار. بۇدان باس تارتپايمىن.

سەندەر مەن ٴبىزدىڭ قۇدايىمىز ٴبىر ەمەس. جانە قۇلشىلىقتارىمىز دا باسقا-باسقا. سەندەردىڭ وزدەرىڭ جاۋاپ بەرەتىن دىندەرىڭ بار. مەنىڭ دە ٴوزىم جاۋاپتى ٴدىنىم بار.



[1]    ٴمۇسليم

 

سەرىكباي قاجى وراز
date28.08.2017readCount4688printباسىپ شىعارۋ