كوز كۇتىمى

كوز كورۋىندەگى جايسىزدىق پەن كوزدىڭ شارشاۋى كوپشىلىگىمىزگە بەلگىلى. ول ەگدە جاستاعى ادامدارعا دا، جاستارعا دا قاتىستى. اسىرەسە، جۇمىسى كومپيۋتەرمەن بايلانىستى ادامدار مۇنى جاقسى تۇسىنەدى. كوز كورۋىن قالاي ساقتاۋعا بولادى؟

كوزىڭىزدى كۇتىمى مەن كوپتەگەن اۋرۋدىڭ دامۋىنا توسقاۋىل قويۋعا ارنالعان بىرنەشە ٴادىس بار.


كوزىڭىزدى تىنىقتىرىڭىز

ەڭبەك گيگەناناسىنىڭ ٴوز ماڭىزى بار. كوزىڭىز كوپ شارشاماۋى ٴۇشىن، كوز بەن ەكران اراسىنداعى اراقاشىقتىق 50-60 سم-دەن كەم بولماۋى ٴتيىس. جۇمىس بولمەسىندەگى شام تىم جارىق تا، كۇڭگىرت تە بولماۋى كەرەك. جۇمىس تەحنيكاسىن تازا ۇستاپ، تىم بولماعاندا، اپتاسىنا 1 رەت شاڭىن ٴسۇرتىپ وتىرىڭىز. تەك مونيتوردى ەمەس، پەرنەتاقتانى دا ٴسۇرتۋدى ەستەن شىعارماڭىز.

كومپيۋتەرمەن جۇمىس جاساعان كەزدە، ەڭ بولماسا، بىرنەشە مينۋت باسقا جاققا نازار اۋدارىڭىز. مىسالى، تەرەزەنىڭ ارعى جاعىنداعى كورىنىستى تاماشالاۋىڭىزعا بولادى. سونىمەن قاتار كوزگە ارنالعان 5 مينۋتتىق جاتتىعۋلاردى تۇراقتى تۇردە جاساپ جۇرگەيسىز. ارينە، مۇمكىندىگىنشە تازا اۋادا ٴجيى دەمالعانىڭىز دۇرىس. فيزيكالىق بەلسەندىلىك بۇكىل ورگانيزمىڭىزدەگى، ٴتىپتى كوزدەگى تامىرلارداعى قان اينالىمىنىڭ جاقسارۋىنا ىقپال ەتەدى. ال كولىكتە كىتاپ وقۋدى ادەتكە اينالدىرساڭىز، دوعارعانىڭىز ٴجون. ۇنەمى سەلكىلدەۋدىڭ سالدارىنان كورۋ بۇلشىقەتىنە شامادان تىس كۇش تۇسەدى. ال ودان كوزىڭىزدىڭ كورۋى جاقسارماسى انىق.


پايدالى تاعامدار

كوز كورۋ ٴۇشىن ەڭ ماڭىزدى زات – ا دارۋمەنى. ول سارى جانە اشىق قازعىلت سارى جەمىستەر مەن كوكونىستەردىڭ (اسقاباق، ٴسابىز، بۇرىش، اپەلسين، قۇرما) قۇرامىندا كەزدەسەدى. سونىمەن قاتار ٴتۇس اجىراتۋ قابىلەتىن جاقسارتاتىن بالدىڭ قۇرامىندا دا بار. كوزدەگى قان تامىرلارعا ورىك جاقسى اسەرىن تيگىزەدى. ال سۋسىنداردان قايماق قوسىلعان ٴسابىز شىرىنى – پايدالى.

قىزىلشانىڭ دا كوز كورۋىنە پايداسى مول. قىزىلشا شىرىنىنىڭ ەكى اس قاسىق مولشەرىن ٴسابىز شىرىنىنا قوسىپ، تۇراقتى تۇردە ىشكەنىڭىز دۇرىس. وعان قوسا انتيوكسيدانتتارعا باي قاراجيدەكتىڭ دە كوز ٴۇشىن پايداسى زور. اقۋزىدى ونىمدەرگە توقتالساق، سۇزبە، پىسىرىلگەن بالىق، سيىر، قويان، كۇركەتاۋىق ەتتەرى الماستىرعىسىز. ٴداندى داقىلدار، جارما (اسىرەسە، قاراقۇمىق)، ورامجاپىراق پەن بانان – جۇيكە ٴيمپۋلسىنىڭ تارالۋى مەن كوز ٴىشى قىسىمىن قالىپتى ۇستاۋ ٴۇشىن قاجەتتى ۆ توبى دارۋمەندەرىنە باي. سونىمەن قاتار س دارۋمەنىنىڭ كوزىدەرى دە كوز كورۋى ٴۇشىن وڭ ىقپال ەتەدى، سەبەبى اسكوربين قىشقىلى كوز قان تامىرلارى قابىرعالارىن نىعايتىپ، كوزدىڭ قانمەن قامتاماسىز ەتىلۋىن جاقسارتىپ، كوز بۇلشىقەتتەرىنە تۇسەر كۇشتى تومەندەتەدى.


كوز كۇتىمى

بۇگىندە كوز كورۋىن نىعايتۋعا ارنالعان ارنايى دارۋمەندى-مينەرالدى كەشەندەر مەن بيولوگيالىق بەلسەندى قوسپالاردىڭ كومەگىنسىز كوز كورۋىن كۇتۋ مۇمكىن ەمەس. ولاردى جىلىنا ەكى رەت قابىلداعان ٴجون: كوكتەمدە جانە كۇزدە. كوزدى قورعاۋعا ارنالعان تامشى تۇرىندەگى دارى-دىرمەكتەر دە بار.

ولار، اسىرەسە، كومپيۋتەر الدىندا كوپ جۇمىس جاسايتىن، شىلىم شەگەتىن، جاناسپالى لينزا قولداناتىن ادامدارعا جانە ايەلدەرگە ەتەككىر ٴۇزىلىسى كەزىندە كەرەك. قۇرامىنا دارۋمەندەر مەن مينەرالدار كىرەتىن، قان اينالىمى مەن زات الماسۋىن جاقسارتاتىن ىلعالداندىراتىن دارى-دارمەكتەر كوز كورۋىندەگى جايسىزدىقتان ارىلتىپ قويمايدى. وعان قوسا قۇرعاق كوز سيندرومى، بلەفاريت، كوز قارىعۋى، كوز ٴمولدىر قابىعىنىڭ قابىنۋى سىندى شىرىشتى قابىق قۇرعاۋىمەن بايلانىستى اۋرۋلاردان كوزدى قورعايدى. جانە شىرىشتى قابىقتىڭ قالپىنا كەلۋىنە كومەكتەسەدى. سوندىقتان كوز ٴمولدىر قابىعىنىڭ قابىنۋىنىڭ العاشقى كەزەڭىندە، ديستروفيادا ٴتيىمدى بولۋى مۇمكىن. قىزمەتى كوزگە كوپ كۇش تۇسۋمەن بايلانىستى ادامدارعا، ورتا جاسقا جەتپەگەن جاندارعا ولاردى تۇراقتى تۇردە قولدانۋ پايدالى.

stan.kz
date20.07.2017readCount3222printباسىپ شىعارۋ