ەسىرتكىنىڭ اعزاعا كەرى اسەرى

جالپى ەسىرتكى جانە ۋىتقۇمارلىق زاتتاردىڭ كەسەلدى كەسىرى مۇنى تىكەلەي قولداناتىندارمەن شەكتەلمەيدى. بۇل ىندەتتەن ناشاقورلاردىڭ جانۇياسى، جاقىندارى، دوستارى جانە تۇتاس قوعام زارداپ شەگەدى. ەسىرتكىگە تاۋەلدىلىكتىڭ وراسان زارداپتارى ەڭ الدىمەن مورالدىق-رۋحاني ومىردە كورىنىس تاۋىپ، قوعامدىق تىنىشتىقتى ويراندايتىندىقتان، ونى قولدانۋشىنىڭ اعزاسىنا كەلتىرەتىن زيانى كوپ رەتتە ەكىنشى كەزەككە ىعىسىپ قالىپ جاتادى. دەگەنمەن ەسىرتكى جانە ۋىتقۇمارلىق زاتتاردىڭ ادام اعزاسىنا كەلتىرەتىن زياندارى شاش-ەتەكتەن. ەندى ەسىرتكىنىڭ اعزاعا كەلتىرەتىن زياندارىنا قىسقاشا جەكە-جەكە توقتالىپ وتەلىك.

مي جانە ورتالىق جۇيكە جۇيەسى. بارلىق ەسىرتكى تۇرلەرى مي مەن ورتالىق جۇيكە جۇيەسىنە وتە زياندى. باسقاشا ايتقاندا اقىل-ەستىڭ ەڭ ازۋلى دۇشپانى – ەسىرتكى. ەسىرتكىگە تاۋەلدى ادامدار، ەڭ الدىمەن، جۇيكە جانە پسيحيكالىق اۋرۋلارعا شالدىعادى. ۇيقىسىزدىق، جىندانۋ، ەرتە الجىپ، ەسىنەن اداسۋ، ۇستامالار (ساندىراقتاۋ، قيسىنسىز ارەكەتتەر جاساۋ)، گالليۋسيناسيالار (بوس قورقىنىش، ەلەس كورۋ، دىبىس ەستۋ، شوشىنۋ)، ۇمىتشاقتىق، سەكىلدى دەرتتەردەن كوز اشپايدى جانە شارا قولدانباسا ٴولىپ تىنادى.

باۋىر جانە بۇيرەك. ەسىرتكىنىڭ ۋلى اسەرىنەن ارىلۋدا ەڭ اۋىر جۇك باۋىر مەن بۇيرەككە تۇسەدى. باۋىر مەن بۇيرەك جۇمىسىنىڭ بۇزىلۋى سالدارىنان باۋىردىڭ مايلانۋى، قابىنۋى، جانە باۋىر سيرروزى، گەپاتيت جانە وتە اۋىر بۇيرەك اۋرۋلارى پايدا بولادى.

كوز. ەسىرتكى زاتتار قولدانۋ كوزگە وتە زياندى. ناتيجەدە كوزدىڭ جارىقتى كورۋدە تەپە-تەڭىگى بۇزىلىپ، الىستى كورە المايدى. قىليلىق، قاراڭعىدا تۇك كورمەۋ، كوز قاراشىعىنىڭ ۇلكەيۋى نەمەسە كىشىرەيۋى سەكىلدى كوز اۋرۋلارى اسقىنادى.

تىنىس الۋ جۇيەسى. ەسىرتكى زاتتار تىنىستى تارىلتىپ، جوتەل، دەم جەتىسپەي قىسىلۋ، تىنىس الۋ اعزالارىنىڭ سال بولۋى جانە وسىلاردىڭ سالدارىنان وقىستان ولۋگە ۇرىندىرادى.

قان-تامىرلارى. ەسىرتكى سالدارىنان قان ازدىق، قاننىڭ ۋلانۋى، قاننىڭ ٴتۇرى مەن قۇرامىنىڭ وزگەرۋى، قاننىڭ ۇيۋى، گانگرەنا، قان تامىرلارىنىڭ بىتەلۋى سەكىلدى اۋرۋلار تۋىندايدى. اسىرەسە، ەسىرتكىنى ينەمەن قان تامىرعا سالۋ وتە ٴقاۋىپتى.

ۋلانۋ. ەسىرتكىنىڭ اعزاعا توندىرەتىن قاتەرلەرىنىڭ ٴبىرى – كوپ رەتتە ولىممەن اياقتالاتىن ۋلانۋ وقيعالارى.

نۇربەك قايىرمۇحاممەد
date07.07.2017readCount2582printباسىپ شىعارۋ