انا مەن ايەل – تارازىنىڭ ەكى باسى

انا مەن ايەل تارازىنىڭ ەكى جاعى. بىرەۋىنىڭ ەسەسىنەن ەكىنشىسى ٴجابىر-جاپا شەگەدى. تالاي اقجاۋلىقتى انا، وزەگىن جارىپ شىققان پەرزەنتىنىڭ سول تارازىنى دۇرىس ۇستاي الماعانىنان، قورلىق كورىپ، بالاعات ٴسوز ەستىپ ٴتىپتى تاياق جەگەنى بار. كەيبىرى ٴومىرىنىڭ مەيىرىمدىلىك پەن قامقورلىققا ەڭ قاجەتتى شاعىندا قارتتار ۇيىنەن ٴبىر-اق شىققان. مۇنداي قورلىقتى باۋىر ەتى بالاسىنان كورۋى قاسىرەتىن ەكى ەسە اششى ەتە تۇسەدى. ٴسىرا، باسقا ەشكىم ونداي ز ۇلىمدىق جاساماسا كەرەك. جاۋىنا ەمەس مەيىربان اناسىنا جاسايدى، بيزنەستەگى قارسىلاسىنا ەمەس بەسىكتە جاتقاندا اق ٴسۇتىن بەرىپ، ٴتۇن ۇيقىسىن ٴتورت بولگەن اناسىنا جاسايدى. ال، انا بالاسى ۇيىقتاسا عانا دەمالادى. بالاسى تاماقتانىپ قارنى تويعان سوڭ عانا اۋزىنا ٴبىر ٴتۇيىن نان سالادى ەمەس پە؟ جالعان دۇنيەدەگى ەڭ ابزال جانعا مۇنشاما قاتتىلىق پەن دورەكىلىك قانداي شىعۋدا؟! ايەلىنىڭ كوڭىلىنەن شىعۋ ٴۇشىن بە؟ الدە، ايەلىنە دەگەن ماحابباتىن كورسەتۋ ٴۇشىن بە؟ مۇنداي ز ۇلىمدىقتى ەستىگەن تاسجۇرەك ادامنىڭ ٴوزى تىتىركەنىپ شوشيتىن بولار. بۇل ادامنىڭ ويىنا كەلمەيتىن جاۋىزدىق. اقىل-پاراسات قابىل ەتە المايتىن ز ۇلىمدىق ەمەس پە؟

اناسىنىڭ قوس بىلەگىنە التىن-كۇمىس بىلەزىك تاقسا، ەڭ ادەمى كويلەك كيگىزسە جاراسپاي ما؟ اناسىنىڭ ٴار كۇنىن شۋاقتى، ٴار ٴساتىن باقىتتى ەتسە كوپ پە؟ ٴار كۇنىن اناسىنا جاقسىلىق ەتۋدەن باستاسا قۇبا-قۇپ بولار ەدى. ٴارى بۇل ٴومىر سىيلاعان اناسىنا پەرزەنتتىڭ جاساعان بولماشى عانا جاقسىلىعى بوپ ەسەپتەلەر ەدى. ويتكەنى، اناسىن ارقالاپ كاعبانى تاۋاپ ەتىپ جۇرگەن ادامعا ساحابا ابدۋللا بين ومار: «سەنى جارىق دۇنيەگە الىپ كەلەر ساتتەگى اناڭدى شىداتپاي قىسقان تولعاقتارىنىڭ ٴبىرىن دە وتەي المادىڭ، ٴبىراق بۇل جاساعان ٴىسىڭ ىزگىلىك، جاقسىلىعىڭدى توقتاۋسىز جاساي بەر»، - دەپ ايتۋى سونىڭ ٴبىر ايعاعى. ٴوزىنىڭ بار جاعدايىن جاساپ، ال اناسىن قاراۋسىز قالدىرعان بەيباقتاردىڭ جۇرەگىنەن مەيىرىمدىلىك اتاۋى جوعالعان زامان تۋدى. ٴبىراق، سول مەيىرىمسىزدىگى ٴۇشىن ەڭ مەيىرىمدى حاق تاعالا قۇزىرىندا جاۋاپ بەرەتىنى ٴسوزسىز. مۇنداي بەزبۇيرەك پەرزەنت اۋىر جازاعا ابدەن لايىقتى.

ارينە، اناعا جاسالاتىن قامقورلىق پەن جاقسىلىق ايەلىڭىزگە تيەسىلى اقىسىنان الىنبايدى. ومىرلىك جارىڭىزدى قاراۋسىز قالدىرىڭىز دەگەن ٴسوز ەمەس. اناڭىزدى كوڭىلىنەن شىعۋ ٴۇشىن ايەلىڭىزدى بالاعاتتاپ، تاياقتىڭ استىنا الىڭىز دەگەن دە ٴسوز ەمەس. ايەل – امانات. نەكەلەسۋ ارقىلى اللا تاعالا قۇزىرىندا ايەلدى توسەكتە ادال جار، ومىردە سەرىك ەتەمىز. سوندىقتان دا ايەلگە جاقسى قارىم-قاتىناستا بولۋ مۇسىلماننىڭ جاقسى سيپاتتارىنىڭ ٴبىرى.

ٴبىراق، ايەلىڭىزگە جاسالعان جاقسىلىق اناڭىزدىڭ ەسەبىنەن بولماۋى قاجەت. جاراتقان اللادان جانە ەلشىسىنەن كەيىنگى ەڭ ٴقادىرلى دە ارداقتى جان بولعان اناڭىزعا ارنالعان مەيىرىمدىلىك پەن قامقورلىق ەسەبىنەن بولماۋى كەرەك. قۇرساعىندا توعىز اي كوتەرىپ، ٴولىم مەن ٴومىر اراسىندا دۇنيەگە الىپ كەلگەن، اق سۇتىمەن بىرگە بار جاقسىلىقتى بالاسىنىڭ بويىنا سىڭىرگەن ەڭ ابزال جانعا جاقسىلىق ٴبىرىنشى كەزەكتە ٴارى ەسەلەپ جاسالۋى كەرەك.

اناڭىزدىڭ ٴسىزدىڭ جۇرەگىڭىزدەگى ورنى ايەلىڭىزگە جانە ۇل-قىزىڭىزعا دەگەن سۇيىسپەنشىلىكتەن الدە قايدا بيىك تۇرۋى كەرەك. اناڭىزدى ورنىنا ەشبىرىن قويۋعا بولمايدى. سىزدەگى بار جاقسىلىق پەن ىزگىلىكتىڭ قاينار بۇلاعى – اقجاۋلىقتى اناڭىز. ومىردەگى بارلىق جەتىستىكتىڭ سەبەبى اناڭىزدىڭ اق تىلەگىنىڭ ارقاسىندا. سونداي-اق، ساتسىزدىك پەن ٴسۇرىنۋىڭىزدىڭ باستى سەبەبى دە اناڭىز قوس جانارىنان تامشىلاعان جاستارى. الاقانىن جايىپ، قارعىس ايتپاسا دا كوڭىلى اۋىرىپ، كوزىنە جاس تولسا بولعانى، ٴسىزدىڭ ومىرىڭىزدە ساتسىزدىكتەر باستالادى. ٴبىزدىڭ قوعامدا دىلىمىزگە دە، ۇلتتىق سانامىزعا دا جات ٴبىر زاڭ قالىپتاسقان، ول اناڭنىڭ كوڭىلىن تاپساڭ، ايەلىڭ رەنجيدى نەمەسە اناما الىپ بەرەتىن بولسام، ايەلىمەن بەرمەۋىن كەرەك دەگەن «زاڭ». تارازىنىڭ باسىن تەڭ ۇستاۋ قيىن دەگەن سياقتى ەشبىر جەردە جازىلماعان، ويدان شىعارىپ العان قيسىنسىز ۇعىم. ارينە، مۇنداي تۇسىنىك قاتە. انانىڭ ورنى ەرەكشە، ايەلدىڭ دە ٴجونى بولەك. ٴارقايسىسىنىڭ وزىنە تيەسىلى اقىسى بار. ٴبىرىنىڭ اقىسىن جاساۋمەن ەكىنشىسى ەشبىر ٴجابىر كورمەۋى ٴتيىس.

ٴسوزدىڭ توقەتەرى ايەلىڭىزدى اناڭىزبەن سالىستىرماڭىز. ەكەۋىن تارازىنىڭ باسىنا قويماڭىز. قۇران كارىمنىڭ وزىندە ٴبىر اياتتا اتا-انانى قاتار ايتسا، باسقا اياتتاردا اقجاۋلىقتى انانى قايتا-قايتا جانە تەك جالعىز ٴوزىن عانا بايانداۋى تەكتەن-تەك ەمەس.

date31.05.2017readCount3156printباسىپ شىعارۋ