«تاحنيك» جاساۋ نارەستەڭىزدى نەدەن قورعايتىنىن بىلەسىز بە؟

ارداقتى اللا ەلشىسىنەن (س.ع.س.) جەتكەن سۇننەت امالداردىڭ قاي-قايسىسىن الىپ قاراساق تا، سانسىز ساۋابىمەن قاتار كۇندەلىكتى ٴومىرىمىز بەن دەنساۋلىعىمىزعا تيگىزەر پايداسى شاش-ەتەكتەن ەكەنىنە تاعى دا تاڭعالا تۇسەمىز. سۇننەتكە سۇيەنگەن مۇسىلماندار كەيبىر اتقارعان امالدارى ارقىلى قانداي ٴقاۋىپتىڭ بەتىن قايتارعانىن وزدەرى بىلمەي جاتادى. سونداي سۇننەتتەردىڭ ٴبىرى رەتىندە «تاحنيك» جاساۋدى ايتساق بولادى.

«تاحنيك» ٴسوزى قۇرمانى شايناپ، سونىمەن نارەستەنىڭ تاڭدايىن ٴسۇرتۋ دەگەندى بىلدىرەدى. شاينالعان قۇرمانى ساۋساقتىڭ ۇستىنە قويىپ، نارەستەنىڭ اۋزىنا سالىپ، تاڭدايىنا جاعىپ، ىسقىلايدى. بۇحاريدىڭ «اقيقا» كىتابىندا ٴابۋ مۇسانىڭ (ر.ا.) ۇلى تۋىلعاندا اللا ەلشىسىنىڭ (س.ع.س.) وعان يبراھيم دەپ ات قويعاندىعى جانە نارەستەنىڭ تاڭدايىنا قۇرمامەن تاحنيك جاساپ، دۇعا جاساعاندىعى ايتىلادى.

تاحنيك جاساۋ داستۇرىندە ۇلكەن پايدا جاسىرىنعان. ويتكەنى، قۇرمانىڭ قۇرامىنداعى ٴنارلى زاتتار ٴسابي اعزاسىنىڭ قالىپتى جۇمىس ىستەۋىنە جانە يممۋنيتەتىنىڭ نىعايۋىنا كومەكتەسەتىنى دالەلدەنگەن. قۇرمامەن تاحنيك جاساۋ، بۇل – ەڭ پايدالى ەكپە (پريۆيۆكا) سەكىلدى. ياعني، ول پوليوميەليت (ج ۇلىن قابىنۋى)، ديفتەريا (جۇقپالى تاماق اۋرۋى)، قىزىلشا سەكىلدى ٴقاۋىپتى دەرتتەردىڭ الدىن الادى.

بۇعان قوسا، جاقىندا عانا جاڭا زەلانديا عالىمدارى «تاحنيك» جاساۋدىڭ تاعى ٴبىر قاتەرلى اۋرۋدىڭ الدىن الاتىنىن دالەلدەپ وتىر. زەرتتەۋشىلەر جاڭا تۋىلعان 242 ٴسابيدىڭ تاڭدايىن قۇرمامەن ٴسۇرتىپ، تاحنيك ٴراسىمىن جاساي وتىرىپ، تاڭعالارلىق قورىتىندىعا كەلگەن. نارەستەنىڭ تاڭدايىنا جاعىلعان گليۋكوزاعا مەيلىنشە باي قۇرما شىرىنى ەرتە تۋعان ٴسابيدى مي زاقىمدانۋىنان قورعايتىن بولىپ شىقتى.

كۇللى عالامعا راقىم نۇرى بولىپ تۇسكەن اللا ەلشىسىنىڭ (س.ع.س.) ٴاربىر ارەكەتى مەن ٴسوزى ادامزات بالاسىنا اقىرەت كۇنىنە دەيىن ونەگە مەن ۇلگىنىڭ اسىل جيىنتىعى بولىپ قالا بەرمەك! تەك سول تاعىلىمدى سۇننەتتەردىڭ سانسىز ساۋابى مەن پايداسىنان قۇر قالۋدان ساقتاسىن!

ايدوس يمانتاي
date01.10.2016readCount29891printباسىپ شىعارۋ