رامازان – جاقسىلىق جارشىسى

– قۇرمەتتى، ناۋرىزباي تاعان ۇلى! كۇللى مۇسىلمان حالقىنىڭ قاسيەتتى رامازان ايى قارساڭىندا تۇرمىز. وقىرماندارعا وسى ايدىڭ قادىر-قاسيەتى جايىندا ايتساڭىز...

– ٴبيسميللاحير راحمانير راحيم! اللا تاعالانىڭ قالاۋىمەن قاسيەتتى رامازان ايىنا دا كەلىپ جەتتىك. بۇل اي، راسىندا، وتە ٴقادىرلى دە ەرەكشە، مۇسىلمان قاۋىمى ٴۇشىن بەرەكەلى دە جولباسشى ۋاقىت. بۇل جايىندا قۇران كارىمنىڭ «باقارا» سۇرەسىنىڭ 185-اياتىندا: «رامازان – ادامدارعا تۋرا جول نۇسقاۋشى، اق پەن قارانى ايىرۋشى، بەكەم تۇتىناتىن جولباسشى رەتىندە قۇران تۇسىرىلە باستاعان اي. رامازان ايى تۋعانىن كورگەن ادام بىردەن ورازا ۇستاسىن. ەگەر بىرەۋلەر اۋرۋ بولىپ، ايتپەسە جول ساپاردا جۇرسە، وندا باسقا كۇندەردە وتەسىن. اللا سەندەرگە جەڭىلدىك بولۋىن قالايدى، اۋىرلىق تۇسىرگىسى كەلمەيدى» دەلىنەدى. دەمەك، وسى ايدا قازاق جۇرتى ٴقادىر تۇتاتىن قۇران اياتتارى ٴتۇسىرىلىپ، مۇسىلمان حالقىنا ورازا پارىز ەتىلدى. سونداي-اق، بۇل ايدا جولاۋشى جۇرگەن ازاماتتار مەن جۇكتى ايەلدەرگە، سىرقاتتى ادامدارعا جەڭىلدىك بار.

رامازان ايىندا ٴاربىر ٴىسىمىزدىڭ ساۋابى وزگە ۋاقىتتارعا قاراعاندا ەسەلەنەتىنى ٴيىسى مۇسىلمان قاۋىمىنا ٴمالىم. سەبەبى، اللا تاعالا  بۇل ايدى وزگە ايلاردان قۇرمەتتى قىلىپ، ساۋابىن ٴوزىم بەرەمىن دەپ ۋادە ەتەدى. ەندەشە، حاق جابباردىڭ راحىم-نۇرى جاۋىپ، مىسقالداي ىزگى امالىمىزعا تاۋداي ساۋاپتار جازىلاتىن ايدا قۇلشىلىق-عيباداتتارىمىزدى كوبەيتىپ، ٴسوزىمىز بەن ٴىسىمىزدى تۇزەپ، نيەتىمىزدى تازارتۋىمىز كەرەك دەپ ويلايمىن.

قۇران كارىمدە مومىن مۇسىلماندارعا بۇيىرىلعان اياتتار تەك بۇيىرۋ مانىندە كەلەدى، ونىڭ سىرى – اللاعا بوي ۇسىناتىندار مەن تەرىس بۇرىلاتىنداردى اجىراتۋ ەدى. «باقارا» سۇرەسىنىڭ 183-اياتىندا: «ٴاي، مۇمىندەر! كۇنالاردان ساقتانىپ، تاقۋالىققا جەتۋلەرىڭ ٴۇشىن سەندەرگە بۇرىنعىلارعا پارىز ەتىلگەندەي، ورازا پارىز ەتىلدى» دەلىنەدى. بۇل اياتتا ورازانىڭ نە سەبەپتى بۇيىرىلعانى ايتىلۋدا، ياعني، «تاقۋالىققا جەتۋلەرىڭ ٴۇشىن» دەيدى. اللانى جۇرەكپەن ەسكە الۋ، تىلمەن زىكىر قىلۋ، ىستەگەن ىزگى ىستەرىمەن، ومىرلىك ولشەمدەرىمەن دالەلدەۋ. ەسەپسىز جىبەرگەن قاتە-كەمشىلىكتەرى، كۇنالارى ٴۇشىن اللانىڭ قاھارىنان قورىققان كۇيدە ونىڭ راحىمى مەن مەيىرىمىنەن ٴۇمىت ەتە وتىرىپ، ورازانى وزىنە قالقان قىلۋ شىنايى تاقۋا، مومىن جاننىڭ بەينەسى بولماق.

– اسىل دىنىمىزدە رامازاننان دا باسقا ايلاردا ورازا ۇستاۋدىڭ ساۋابى بار دەيدى، جالپى ورازانىڭ ٴمانىسى، اۋىزى بەرىك جانعا جازىلار جاقسىلىق پەن بەرىلەر ساۋاپتار قانداي؟

– جالپى، مۇسىلمان بالاسى ٴۇشىن بارلىق ۋاقىت ٴقادىرلى. دەگەنمەن، شاريعاتىمىزدا دارەجەسى بيىك، قۇرمەتى جوعارى ايلار جايىندا، راسىندا، ايقىن ايتىلعان.

ٴاز ەلشى مۇحاممەد (س.ع.س.): «ەرەجەپ – اللانىڭ ايى، شاعبان – مەنىڭ ايىم، رامازان – ۇممەتىمنىڭ ايى» دەپ، مۇسىلمان ۇممەتى ٴۇشىن قاسيەتتى ايلاردى اتاپ كورسەتتى. وسى ماندەس كەلەسى ٴبىر حاديستە ارداقتى پايعامبارىمىز (س.ع.س.)«ٴيا، اللا! ەرەجەپ جانە شاعبان ايىن قايىرلى ٴارى مۇباراك ەتكەي، ٴبىزدى رامازان ايىنا امان-ەسەن قاۋىشتىر» دەپ راببىسىنان سۇراپ، دۇعا ەتەتىن. مىنە، رامازان ايىنىڭ الدىندا كەلەتىن ەرەجەپ، شاعبان ايلارى ەڭ ٴقادىرلى ۋاقىتتار. وسى ايلاردا پايعامبارىمىز تىلەگەن جاقسىلىققا، مەيىرىم مەن راحىم ايىنا، كەشىرىم مەن بەرەكە ايى – رامازانعا ونىڭ ۇممەتى، ٴسىز بەنەن ٴبىز امان-ەسەن جەتىپ وتىرمىز. قۇدايعا مىڭ دا ٴبىر شۇكىر دەيمىز. حاق ەلشى قۇرمەتتەگەن ايلارعا دەگەن قۇرمەتىمىز جوعارى بولسا، اللانىڭ الدىنداعى دارەجەمىز دە سوعان ساي بولار دەگەن ۇمىتتەمىن.

ال، ورازاشىنىڭ جاعدايى تۋرالى ايتار بولساق، جوعارىدا ايتىپ وتكەن ايلاردا ورازا ۇستاۋدىڭ ساۋابى ۇلكەن، البەتتە. اپتانىڭ ٴار دۇيسەنبى، بەيسەنبى كۇندەرىندە دە اۋىز بەكىتۋگە بولادى. جالپى ورازانىڭ مۇسىلماندارعا بەكىتىلۋىنىڭ حيكمەتى جايىندا بۇھاريدەن جەتكەن حاديستە «ەگەر، ادام وتىرىك ايتۋ مەن كۇنالى ىستەرىن تاستاماسا، اللا ول ادامنىڭ تاعام مەن سۋدان تىيىلعانىنا مۇقتاج ەمەس» دەپ، ٴمان-ماعىناسى تەرەڭدە ەكەنىن بايقاتادى.

ياعني، اللاعا شىن يمان كەلتىرىپ، مويىنسۇنعان مومىن جان ٴۇشىن ورازا دەگەنىمىز تەك قانا ٴتاننىڭ ورازاسى بولماسا كەرەك. بۇل – كۇناعا تۇسەر كوزدىڭ، قاڭقۋ ٴسوز بەن جالاعا جاقىن، عايباتقا يكەم ٴتىل مەن قۇلاقتىڭ، ياكي بۇكىل ون ەكى مۇشەمىزدىڭ ورازاسى. مۇمىنگە جات ارەكەتتەردەن تىيىلماعان ادامنىڭ ورازاسى جونىندە ارداقتى ەلشى «ونىڭ ورازاسىنان اشتىقتان وزگە ەشنارسە بۇيىرماۋى مۇمكىن» دەپ سيپاتتايدى.

بايقاعانىمىزداي، ورازانىڭ مۇسىلمان قاۋىمىنا پارىز بولۋىنىڭ ٴمانى تەك ىشىپ-جەۋدەن تىيىلۋ عانا ەمەس ەكەن. ٴتانىمىز بەن رۋحىمىزدىڭ تولىق ۇيلەسىم تاپقان ورازاسى عانا كامىل ورازا قاتارىنا جاتاتىنىن جەتە ۇعىنۋعا تىرىسقانىمىز ٴجون.

– سابىرى سىنعا تۇسەر ورازا كەزىندە مۇسىلمانعا قاجەت سيپاتتارعا توقتالساڭىز...

– رامازان، راسىندا، كوپتەگەن جاقسىلىقتارعا جەتەلەۋشى اي. سونىڭ ٴبىرى – وسى سابىرلىلىق. قاسيەتتى ايدا اللانىڭ سانسىز ساۋاپتارىنان ٴۇمىتتى ادام كەز كەلگەن كەدەرگى مەن قيىنشىلىقتارعا سابىرلىلىق تانىتىپ، توزىمدىلىك كورسەتە ٴبىلۋى كەرەك. تىپتەن، ورازا كەزىندە ايىپتاپ، سوگە سويلەگەن كىسىنىڭ وزىنە دە ۇستامدىلىقپەن، پايعامبار وسيەتىندە ايتىلعانداي، «مەن ورازامىن» دەپ جاۋاپ بەرۋى شارت. پايعامبارىمىزدىڭ وسى ٴسوزىنىڭ ٴوزى كوپ ادامعا ەسكەرتۋ دەسەك بولادى.

دانا حالقىمىز ايتقانداي، «مۇسىلمانشىلىق استە-استە» دامىپ، وركەندەيدى. يسلام تاريحىنان ٴمالىم، اللانىڭ حاق ٴدىنى دە جيىرما ٴۇش جىلدىق پايعامبار مويىنا جۇكتەلگەن امانات ارقىلى جەر جۇزىنە تارادى. سابىردىڭ ناق ٴوزىن كورسەتە بىلگەن العاشقى مۇسىلمانداردىڭ ومىرلەرى، حاق جولىندا كورگەن سىناقتارى كىمنىڭ دە بولسىن كوزىنە جاس ۇيىرمەي قويمايدى. نەبىر سىن ساعاتتارىن باستان كەشىرگەن ساحابالاردىڭ قيىن-قىستاۋ ساتتەرىنە بايلانىستى اللا تاعالا «سەندەر يمان كەلتىرگەندىكتەرىمىز ٴۇشىن سىنالمايمىز دەپ ويلايسىڭدار ما؟» («انكابۋت» سۇرەسى، 2-ايات) دەگەن اياتىن تۇسىرەدى. وسى ۋاقيعالاردى ەسكە العان بۇگىنگى كۇننىڭ مۇسىلماندارى اللانىڭ سانسىز نىعمەتتەرىنە شەكسىز شۇكىرلەر ايتىپ، بولماشى قيىندىققا كەزىككەندە تاريحتا وشپەس اتى قالعان ساحابالار ٴومىرىن ەسكە الا وتىرىپ، بۇل دۇنيەنىڭ سىناعىن سابىرمەن قارسى السا، ينشاللا، اقىرەتتەگى ەگىنى مول بولماق. جىل ون ەكى ايدىڭ بىرىندە عانا كەلەتىن، سانسىز ساۋاپ، مول نىعمەتتەر بەرىلەتىن رامازانعا دەگەن ىستىق ىقىلاسىمىز ٴبىزدى ەكى دۇنيە باقىتىنا جەتۋگە سەپ بولادى.

ىلگەرىدە وتكەن ىزگى مۇسىلماندار رامازان شۋاعىنا شومىلىپ، ورازادان كەيىنگى التى ايدا اللانىڭ نىعمەتىنە دەگەن قۋانىشتان ارىلا المايتىن، ەندىگى التى ايى قالعاندا «راببىم، ٴبىزدى رامازانمەن قاۋىشتىرا كور» دەپ اسىعا كۇتەتىن بولعان. سەبەبى، بۇل ايدا جاسالار قۇلشىلىقتار، عيباداتتار مەن ىزگى امالداردىڭ ساۋابى مىڭ ايعا تاتىرلىق قاسيەتتى ٴقادىر ٴتۇنى بار. سوندىقتان، ارداقتى اعايىن، سانسىز ساۋاپتىڭ ەسىگى ايقارا اشىلىپ، شايتاندار شىنجىرلانىپ بايلاناتىن مۇباراك ايدىڭ كۇندەرىن الاڭسىز، تۇندەرىن قاپەرسىز وتكىزۋدەن اباي بولايىق.

– كۇننىڭ ۇزاقتىعى مەن اپتاپتى ىستىعىنا قاراماستان اۋىز بەكىتۋشى جاننىڭ دارەجەسى قانداي بولماق؟

– ٴپاني دۇنيەدە وڭاي ولجا تابۋ جولدارىنىڭ جەڭىل بولىپ،  شىن ەڭبەكپەن تاپقان تابىستىڭ كوزى قيىنشىلىقپەن كەلەتىنى ٴارى ادالدىق ٴجىبىن اتتاماعاندا عانا بەرەكەلى بولاتىنى امبەگە ايان. ٴبىر اللانىڭ رازىلىعى، دۇنيە اقىرەتىمىزدىڭ جارىق بولۋى ٴۇشىن ۇستاعان ورازادا سەزىنەتىن ازدى-كوپتى قيىندىقتار دا مۇسىلمان بالاسىن جاقسىلىققا جەتەلەپ، سەنىمىن نىعايتىپ، شۇكىرىن ارتتىرادى، يمانىن شىڭدايدى.

شىن نيەت ەتىپ، ورازا ۇستاۋشىنىڭ دارەجەسى تۋرالى قۇدسي-حاديستەردىڭ بىرىندە اللا تاعالا: «اۋزى بەرىك ادام ىشىپ-جەۋىن مەن ٴۇشىن دوعاردى. ورازا – مەنى مەن ق ۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ، مەن عانا بەرەمىن. اۋزى بەرىك ق ۇلىمنىڭ اشتىق پەن شولدەگەندە شىعاتىن اۋزىنىڭ ٴيسى مەن ٴۇشىن ميسكتەن دە ارتىق» دەيدى. كۇنى ۇزاققا ورازا بولعان جاننىڭ اۋىز قۋىسىنان شىققان ٴيىستىڭ ٴوزىن الەمدەردىڭ راببىسى جۇپار ٴيىس ميسكتەن جوعارى باعالاپ، ق ۇلىنىڭ سىيىن ٴبىر ٴوزى ولشەپ، ٴبىر ٴوزى بەرەر بولسا، مومىن مۇسىلمان ٴۇشىن بۇدان اسقان نەندەي نىعمەت كەرەك بولار؟

مىنە، سوندىقتان، سابىر مەن تاقۋالىقتىڭ، شىنايى يماننىڭ ٴدامىن سەزىندىرەتىن جاز ماۋسىمىنا سايكەس كەلگەن رامازان ايىندا اللانىڭ مەيىرىم-راحىمى مەن سىي-سياپاتىنان قۇر قالماعانىمىز ابزال.

سالمان فارسي (ر.ا.) ايتادى: «راسۋلاللا (س.ع.س.) شاعبان ايىنىڭ سوڭىندا بىزگە: «وتە ۇلى ٴارى بەرەكەلى رامازان ايى كەلە جاتىر. بۇل ايدا مىڭ ايدان ارتىق ٴبىر ٴتۇن بار. حاق تاعالا رامازان ايىنىڭ ورازاسىن پارىز ەتىپ، تۇنگى نامازدى ساۋاپ العانعا سەبەپ ەتتى. بۇل ايدا ىزگى امال ىستەۋمەن اللا تاعالاعا جاقىنداعان ادام، رامازان ايىنان تىس ۋاقىتتا پارىز امالىن ىستەگەن بولادى. رامازان ايىندا پارىز امالىن ورىنداعان ادام باسقا ايدا ورىنداعان جەتپىس پارىز امالدىڭ ساۋابىن الادى. بۇل – سابىر ايى. ال سابىرلىقتىڭ سىيى – ٴجاننات. بۇل – قايىرىمدىلىق، ياعني، اشتىقتى سەزىنىپ، كەمباعالدارعا جاناشىرلىق ەتۋ ايى. بۇل ايدا ٴمۇمىننىڭ ريزىعى مولايادى. بىرەۋ ورازا ۇستاعاندى تاماقتاندىرسا، ونىڭ كۇنالارى كەشىرىلىپ، توزاق وتىنان ازات ەتىلۋىنە سەپتىگىن تيگىزەدى. ٴارى ول ورازا ۇستاعاننىڭ ساۋابىنداي ساۋاپ الىپ، ودان ورازا ۇستاۋشىنىڭ ساۋابى كەمىتىلمەيدى» دەدى. سوندا ساحابالار: «ۋا، راسۋلاللا! ٴبىزدىڭ ٴاربىرىمىزدىڭ ورازا ۇستاعاندى تاماقتاندىرعانعا شامامىز جەتە بەرمەيدى»، – دەگەندە، ول: «اللا تاعالا ٴتىپتى ٴبىر قۇرما، ٴبىر ۇرتتام سۋ نەمەسە ٴسۇتتىڭ سەبەبىمەن دە ساۋابىن بەرەدى. بۇل ايدىڭ ٴبىرىنشى بولىگى – حاق تاعالانىڭ راحمەتى، ەكىنشى بولىگى – كەشىرىمى، ٴۇشىنشى بولىگى – توزاقتان ازات بولۋ. حاق تاعالا رامازان ايىندا ق ۇلىنا كەڭشىلىك ەتكەن، ياعني، قىزمەتىن جەڭىلدەتكەن ادامنىڭ كۇناسىن كەشىرىپ، ونى توزاقتان ازات ەتەدى. رامازاندا ٴتورت ٴىستى كوبەيتىڭدەر. ونىڭ ەكەۋىمەن راببىلارىڭدى رازى ەتسەڭدەر، ەكەۋىن ىستەۋ مىندەتتى. راببىلارىڭدى رازى ەتەتىن ەكى ٴىس، ول: «حاق تاعالادان وزگە ٴتاڭىر جوق» دەپ كۋالىك ەتۋ جانە كوپ يستيعفار ايتۋ. ىستەلۋى مىندەتتى بولعان ەكى امال، ول: حاق تاعالادان ٴجانناتقا كىرگىزۋىن سۇراپ، توزاقتان پانا تىلەۋ. ورازا ۇستاۋعا سۋ بەرگەندى حاق تاعالا قيامەت كۇنى مەنىڭ حاۋزىمنان سۋسىنداتادى. كەيىن ول ٴجانناتقا كىرگەنگە دەيىن شولدەمەيدى»، – دەدى».

– ەلوردامىز استانا اي اسىپ، جىل اۋناعان سايىن وسىپ-وركەندەپ، كوركەيىپ كەلەدى. باس قالامىزدىڭ ۇلكەن مادەنيەت ورداسى، رۋحانيات شاڭىراعىنا اينالۋىنا مەشىتتەر دە ٴوز ۇلەسىن قوسىپ كەلە جاتقانىنا كۋامىز. بيىلعى رامازاندا قانداي يگى شارالار اتقارىلماق؟

– ٴيا، اۋەلى اللا تاعالانىڭ شەكسىز مەيىرىم-شاپاعاتىمەن ەلىمىز وركەندەپ، اياققا نىق تۇردى. الەمدىك قاۋىمداستىق الدىندا قازاقستاننىڭ اتى ابىرويمەن اتالا باستادى. وسىنداي بيىك بەلەستەرگە جەتۋىمىز ەلباسىمىز باستاعان ەل ەرتەڭىن ويلاپ، كەلەشەگى ٴۇشىن قامدانعان ازاماتتاردىڭ ارقاسى دەپ بىلەمىز.

اتا زاڭىمىزدا اتاپ كورسەتىلگەن، تاريحىمىزدا تاڭبالانعان اسىل ٴدىنىمىز يسلامنىڭ قۇندىلىقتارىن، ۇلتتىڭ ٴتول مادەنيەتى مەن ٴداستۇرىن ناسيحاتتاپ، ٴوز جولىن كورسەتۋ – ٴبىزدىڭ، يمامداردىڭ باستى مىندەتى. وسى ماقساتتا ٴدىن قىزمەتكەرلەرى جۇمىلا جۇدىرىق بولىپ، اۋقىمدى ٴىس-شارالاردى وتكىزىپ كەلەدى. بۇل، اسىرەسە، رامازان ايىندا، اتاۋلى مەرەكەلەردە كوپتەپ ۇيىمداستىرىلادى.

قازاقستان مۇسىلماندارى ٴدىني باسقارماسىنىڭ ٴتوراعاسى، باس ٴمۇفتيىمىز ەرجان قاجى مالعاجى ۇلى ەل رۋحانياتىن، ٴدىنىمىزدى دامىتۋ، حالىققا ٴداستۇرلى يسلام قۇندىلىقتارىن جەتكىزۋ ٴۇشىن وتە كوپتەگەن تىڭ باستامالارعا ۇيىتقى بولىپ، پارمەن بەردى.

رامازان ايى قارساڭىندا، ياعني 4 ماۋسىم كۇنى استانا قالاسى مەشىتتەرىنىڭ ۇيىمداستىرۋىمەن «بەرەكەلى رامازان» رۋحاني كەشى وتەدى. «بەيبىتشىلىك جانە كەلىسىم» سارايىندا ەلوردا حالقىنا كوپتەگەن رۋحاني-تاعىلىمدىق دۇنيەلەر، قاسيەتتى اي تۋرالى قويىلىمدار، بەينەباياندار ۇسىنباقپىز. سونداي-اق، وسى كەشتە «بەس پارىز جانە تاريح تاعىلىمى» رەسپۋبليكالىق جىر ٴمۇشايراسىنىڭ قورىتىندىسى جاريالانىپ، جەڭىمپازدار جۇرتشىلىق الدىندا ماراپاتتالادى. ٴمۇشايراعا جالپى سانى 434 اقىن قاتىسىپ وتىر.

رامازاندا، البەتتە، مۇقتاج كىسىلەرگە، كوپ بالالى وتباسىلارعا، قارتتار، بالالار ۇيلەرىندە ٴارتۇرلى قايىرىمدىلىق شارالارىن وتكىزىپ، كومەكتەسپەك نيەتتەمىز. بۇدان بولەك، وتىز كۇن بويىنا قالىپتاسقان ٴداستۇر بويىنشا قالا مەشىتتەرىندە اۋىزاشار داستارحاندارى جايىلادى. كۇن سايىن اۋىز بەكىتۋشى ٴار ادام وسى داستارحاندا اۋىز اشۋىنا بولادى. ال قالامىزداعى ٴۇش مەشىتتە – «نۇر استانا»، «ازىرەت سۇلتان» جانە «عىلماني» مەشىتتەرىندە ارنايى قاريلار كەلىپ، تاراۋيح نامازى وقىلىپ، قۇران حاتىم ەتىلەدى.

– ورازا قارساڭىندا وقىرماندارعا تىلەگىڭىز...

– ٴقادىرلى قازاق جۇرتتى، ارداقتى وقىرماندار! رامازان  – بەرەكە-بىرلىك ايى. تاۋەلسىز ەلىمىزدىڭ كوك بايراعىنىڭ، وتان دەگەن ۇلى شاڭىراعىمىزدىڭ استىندا بىرلىكتە تىرلىك قىلىپ، ىنتىماقتا عۇمىر كەشەيىك. ەلىمىزدىڭ ەرتەڭى مەن باياندى بولاشاعى ٴۇشىن ايانباي ەڭبەك ەتىپ، وسى جولدا قىزمەت قىلۋشى ەل ازاماتتارىنا كوپتەن كوپ دۇعا جاسايىق. دۇعالار كەرى قايتارىلمايتىن قاسيەتتى ۋاقىتتا ەلىمىز بەن جەرىمىزدىڭ تىنىشتىعىن تىلەيىك جاراتقاننان.

بارشالارىڭىزدىڭ مۇباراك ايداعى ىزگى امالدارىڭىزعا اللا سانسىز ساۋاپتار جازىپ، ەكى دۇنيە باقىتىنا بولەسىن. پايعامبارىمىز مۇحاممەدتىڭ (س.ع.س.) ۇممەتىنە لايىقتى جانداردىڭ قاتارىنان بولۋىمىزدى ٴناسىپ ەتسىن! اللا تاعالا بارشامىزدىڭ ۇستاعان ورازامىز بەن جاساعان قۇلشىلىق-عيباداتتارىمىزدى قابىل ەتكەي! دىنىمىزگە قۋات، حالقىمىزعا يمان بايلىعىن بەرگەي! حالقىمىزدىڭ ىنتىماق-بىرلىگى ارتىپ، ىرىس-نەسىبەسى مولىنان بولعاي! قاسيەتتى رامازان بارشامىزعا قۇتتى، بەرەكەلى، كۇللى مۇسىلمان جۇرتشىلىعىنا قايىرلى بولسىن!

– ٴاۋمين. اسەرلى اڭگىمەڭىزگە راحمەت!

سۇحباتتاسقان
جايىق ناعىماش

ناۋرىزباي تاعان ۇلى
date07.06.2016readCount4058printباسىپ شىعارۋ