پايعامبارىمىزدىڭ (س.ع.س.) سۇيىكتى اسى ٴتالبينانى دايىنداۋ ٴتاسىلى

ٴتالبينا  – اراب بوتقاسى. بۇل تاعام ٴلابان، ياعني سۇتتەن جاسالاتىن بولعاندىقتان «ٴتالبينا» دەپ اتالعان. بۇل وتە پايدالى تاماق، سونداي- اق مۇنى پايعامبارىمىز (وعان اللانىڭ يگىلىگى مەن سالەمى بولسىن) ٴوزى ٴسۇيىپ جەيتىن بولعان. 

ايشا انامىزدان (ول كىسىگە اللا رازى بولسىن) جەتكەن حاديستە ٴبىر تۋىستارى قايتىس بولعان كەزدە ايەلدەر جينالدى، كەيىن جاقىندارى مەن قۇربىلارىنان باسقاسى تاراسىپ كەتكەن كەزدە ايشا انامىزدىڭ بۇيرىعىمەن ٴبىر تاباق ٴتالبينا جاسادىق. ودان سوڭ وعان تۇزدىق رەتىندە ساريد جاسادىق. كەيىن ايشا انامىز بىزگە بىلاي دەدى: «جەڭدەر، مەن اللا ەلشىسىنىڭ (وعان اللانىڭ يگىلىگى مەن سالەمى بولسىن) بىلاي دەگەنىن ەستىدىم: «ٴتالبينا اۋرۋدىڭ جۇرەگىن تىنىشتاندىرادى جانە ۋايىم- قايعىنىڭ جارتىسىن الىپ كەتەدى».

ٴتالبينا – كۇيزەلىستىڭ شيپاسى

«ٴتالبينا اۋرۋدىڭ جۇرەگىن تىنىشتاندىرادى جانە ۋايىم- قايعىنىڭ جارتىسىن الىپ كەتەدى» - وسى جەرگە نازار اۋدارۋ قاجەت. پايعامبارىمىزدىڭ (وعان اللانىڭ يگىلىگى مەن سالەمى بولسىن) سوزىندە جالعان بولماسى حاق. كۇيزەلىس پەن تورىعۋعا تولى ٴبىزدىڭ ۋاقىتىمىزدا ٴتالبينا رۋحاني ۋايىمنان ارىلتىپ، قۇلشىلىققا دەن قويۋىمىزعا جاردەم بەرە الادى.

ٴتالبينا يممۋنيتەتتى كوتەرەدى. اۆيسەنا ٴوزىنىڭ xi عاسىرداعى «دارىگەرلىك عىلىمنىڭ كانونى» اتتى ەڭبەگىندە ارپا سۋىنىڭ، سورپانىڭ قىزۋ كوتەرىلگەنگە مىڭ دا ٴبىر ەم ەكەندىگىن جازىپ كەتكەن.

ٴتالبينا جاقىنىڭنان ايرىلعان قايعىنى جەڭۋگە جاردەم بەرەدى

جوعارىداعى كەلتىرىلگەن حاديستەن بەلگىلى بولعانىنداي، مۇمىندەردىڭ اناسى ايشا (ول كىسىگە اللا رازى بولسىن) وزگە ايەلدەرگە قازادان سوڭ جۇرەكتەرىن تىنىشتاندىرۋ ٴۇشىن ٴتالبينانى جەۋگە كەڭەس بەرگەن. ٴبىزدىڭ قوعامىمىزدا كوپتەگەن ايەل ادامدار جاقىنىنىڭ قازاسىن كوتەرە الماي جاتادى. وسىنداي جاعدايدا ايشا انامىزدىڭ (ول كىسىگە اللا رازى بولسىن) كەڭەسىنە امال ەتۋگە بولادى. سول كەزدە اللا قالاسا، ول قايعىنى جەڭىل قارسى الۋعا سەپتىگىن تيگىزەدى.

ٴتالبينا. ٴوزىمىز دايارلايىق.

قازىرگى تاڭدا دۇكەندەردەن كەز كەلگەن ازىق- تۇلىك ٴتۇرىن تابۋعا بولادى. سوندىقتان دا ٴتالبينانى سۇيىكتى پايعامبارىمىزعا (وعان اللانىڭ يگىلىگى ەن سالەمى بولسىن) دەگەن ۇلكەن سۇيىسپەنشىلىك بەلگىسى رەتىندە جانە دە سۇننەتىنە امال ەتۋ نيەتىمەن ٴوز ٴۇيىمىزدىڭ اس مازىرىنە ەنگىزىپ قويۋدىڭ ٴبىر مۇمكىنشىلىگى دەسەك قاتەلەسپەيمىز. ٴدامى جاعىنان ۇناماسا دا، ادامداردىڭ اسىلى – مۇحاممەد پايعامبارعا (وعان اللانىڭ يگىلىگى مەن سالەمى بولسىن) دەگەن ماحابباتىمىزدى ٴبىلدىرۋدىڭ ٴبىر ٴتۇرى دەپ ساناۋعا تۇرارلىق- اق.

دايىنداۋ ٴتاسىلى:

ٴتالبينا ۇساقتالعان ارپادان جاسالىنادى. قازانعا ٴبىر كەسە ٴسۇت جانە ەكى كەسە سۋ قۇيىلىپ، كىشكەنە شىنىاياقپەن ارپا سالىپ، ارالاستىرىلادى. ٴجىتى ارالاستىرىپ، دايىن بولعانشا وتقا قويامىز. بوتقا قويۋ دا، سۇيىق تا بولماۋى قاجەت. قايناپ بولعان سوڭ وتتان  تۇسىرۋگە بولادى. بوتقا دايىن! ونى بالمەن قوسىپ جەۋ قاجەت. بالدى بوتقاعا قوسىپ جىبەرسە دە بولادى.

اللا ەلشىسىنە (وعان اللانىڭ يگىلگى مەن سالەمى بولسىن) دەگەن ماحاببات

ساڭلاق ساحابا ابدۋللا يبن ماسعۋد (وعان اللا رازى بولسىن) ەگەر پايعامبارىمىز (وعان اللانىڭ يگىلىگى مەن سالەمى بولسىن) ٴبىر جەردەن ەكىنشى جەرگە ورىن اۋىستىرار بولسا، ول دا سونى قايتالايتىن ەدى.

جانە دە پايعامبارىمىز (وعان اللانىڭ يگىلىگى مەن سالەمى بولسىن) ٴبىر جەردە جوتەلەر بولسا، ول (ول كىسىگە اللا رازى بولسىن) دا سول جەرگە بارىپ جوتەلەتىن بولعان. بىردە ٴبىر ساحابا ۋاعىز ايتىپ وتىرعان پايعامبارىمىزعا (وعان اللانىڭ يگىلىگى مەن سالەمى بولسىن) كەلىپ قيامەت جايلى سۇرايدى. «سەن وعان نە دايىندادىڭ؟»-، دەپ سۇرادى پايعامبار (وعان اللانىڭ يگىلىگى مەن سالەمى بولسىن). ول بولسا: «مەن كوپ قۇلشىلىق، ورازا يا بولماسا ساداقا دايىنداعان جوقپىن. الايدا مەن اللا مەن ونىڭ ەلشىسىن (وعان اللانىڭ يگىلىگى مەن سالەمى بولسىن) جاقسى كورەمىن»،- دەپ جاۋاپ بەرەدى. سول كەزدە پايعامبارىمىز (وعان اللانىڭ يگىلىگى مەن سالەمى بولسىن): «كىمدى جاقسى كورسەڭ، سونىمەن بىرگە بولاسىڭ»،- دەدى. ارتىنشا ٴاناس (وعان اللا رازى بولسىن): «يسلامنان سوڭ ٴبىز بۇرىن- سوڭدى پايعامبار (وعان اللانىڭ يگىلىگى مەن سالەمى بولسىن): «كىمدى جاقسى كورسەڭ، سونىمەن بىرگە بولاسىڭ»،- دەپ ايتقان سوزىنەن باسقا سوزگە وسىنشالىقتى قاتتى قۋانعان ەمەسپىز»،- دەيدى. ارى قاراي ٴاناس يبن ماليك بىلاي دەپ جالعاستىردى: «مەن پايعامباردى (وعان اللانىڭ يگىلىگى مەن سالەمى بولسىن)، ٴابۋ باكىر مەن وماردى (دوس تۇتامىن) جاقسى كورەمىن جانە ولارعا دەگەن ماحابباتىمنىڭ سەبەبىمەن (قيامەتتە) ولارمەن بىرگە بولامىن دەپ ٴۇمىت ەتەمىن».  

قۇراندا اللا تاعالا بىلاي دەيدى: «(مۇحاممەد ع.س.) ولارعا: «ەگەر اللانى سۇيسەڭدەر، وندا ماعان ىلەسىڭدەر. اللا (ت.) سەندەردى جاقسى كورىپ، كۇنالارىڭدى جارىلقايدى. ويتكەنى، اللا اسا جارىلقاۋشى، ەرەكشە مەيىرىمدى» دە» (ٴالي يمران سۇرەسى، 31-ايات)

قۇرمەتتى وقىرماندار، كەلەسى ماقالامىزدا سۇيىكتى پايعامبارىمىزدىڭ (وعان اللانىڭ يگىلىگى مەن سالەمى بولسىن) داستارحانىنان ورىن العان باسقا تاعام ٴتۇرى جايلى اڭگىمەلەپ، دايىندالۋ ٴتاسىلىن دە ۇيرەتەتىن بولامىز.

استارىڭىز ٴدامدى بولسىن!

date10.05.2016readCount8034printباسىپ شىعارۋ