Боялған шаш ғұсылға кедергі бола ма?

Сәлеметсіз бе? Шашымды 3 жыл бұрын сары түске боятқанмын. Бірақ ол кезде ғұсылдың қабыл болмайтынын білген жоқпын. Ғұсыл мен дәреттің қабыл болмайтынын жақында естідім. Енді не істеуім керек? Одан бері шаштарымды талай қидырттым, дегенмен бояудан қалған шаштың ұштары алі бар. Негізі, енді қайта қидырмаймын деп жүрген едім. Юсупова М.

Жауап

Сәлеметсіз бе! Шариғатымызда шаш бояуға рұқсат бар. Оған Пайғамбарымыздың (с.ғ.с):

إِنَّ اليَهُودَ وَالنَّصَارَى لاَ يَصْبُغُونَ ، فَخَالِفُوهُمْ

«Расында яхудилер мен христиандар (шаштары мен сақалдарын) боямаған, ал сендер болса оларға ұқсамаңдар»[1] деп, сақал мен шашты бояуға рұқсат берген хадисы дәлел болады.

Бүгінгі қолданылып жүрген бояулар ертеректе қолданылған қына бояуына ұқсайды. Ол тырнаққа жағылатын бояу (лак) сынды қалың қабатты болмағаны үшін оған тыйым салынбайды, себебі оның астына су тиеді. Сонымен қатар, қолданыстағы бояу кейіннен өздігімен кететіні үшін ол адамның жаратылысын түбегейлі өзгерту болып табылмайды. Дегенмен де қазіргі бояулардың химиялық құрамы зиянсыз емес екенін де ескере кеткен жөн.

Тоқетері: боялған шаш ғұсылға кедергі жасамайды. Ол үшін шашты қиып қажеті жоқ.