Астанада мылқау жігіт қоқыстан тауып алған 2,5 миллион теңгенің әшекей бұйымын қайтарып берді

Астанада зергерлік дүкеннің күзетшісі байқамай қоқысқа тастаған 5 келі күміс бұйымдар табылып, кері қайтарылды. Бұл жайында дүкен күзетшісі Жандос Әмірханов телефон арқылы хабарлаған.

«Шынымды айтсам, бұл оқиғаның осылай аяқталғанына қуаныштымын. Оқиға былай болды: екі күн бұрын маған бір ер адам қоңырау шалып, осы аумақта (7 Континент) тұрған адам туралы хабарлады. Шамалап мекенжайын айтты. «Мәскеу» үй кешенінің маңында өз үйі бар деді.

Ауызша сипаттап берді: орта бойлы, сақалды ер адам. Бүгін жұмыста отырып жарты сағат бұрын далаға шықтым. Қарасам әлгі сипаттап берген адам келе жатыр. Екі күн бұрынғы қоңырау есіме түсті. Қасына барып сөйлестім», – дейді күзетші.

Оның айтуынша, құны 2,5 миллион теңгенің бұйымдарын тауып алған адам мылқау екен.

«Зергерлік бұйымдардың сонда екенін түсіндім. Ол ертең алып келемін деді. Мен бірден үйіне баруды ұсындым. Өзі мылқау, сөйлей алмайды. Қағазға мекен-жайын жазып берді. Біз үйіне барып, бұйымдарды алдық. Сыйақы ретінде 100 мың теңге бердік. Бұйымның барлығы орнында, біреуіне де тиіспепті», - дейді Жандос Әмірханов.

Бұған қоса ол екі күн бұрын телефон арқылы күміс бұйымдарды тауып алған азамат туралы ақпарат берген ер азаматқа сыйлық жасамақ ниеті барын айтты.

«Екі күн бұрын телефон шалып, ақпарат берген азаматтың аты - Бекзат. Менде оның нөмірі сақтаулы. Ақшалай сыйлық жасап, алғысымды білдіргім келеді», - дейді дүкен күзетшісі.

Сондай-ақ жігіт енді қоқыс шығармас бұрын тексеріп отыратынын айтты. «Қоқыс шығаруға қорқатын болдым», - дейді ол әзіл-шыны аралас.