old.muslim.kz Сал ауруына шалдыққан Назерке «Балапан» телеарнасында хабар жүргізетін болды - Muslim.kz

Сал ауруына шалдыққан Назерке «Балапан» телеарнасында хабар жүргізетін болды

Сал ауруына шалдыққан 12 жасар Назерке Аймұратова “Балапан” телеарнасының жүргізушісі атанды. Назерке бұған дейін «Қарекет» бағдарламасында өз хикаясын баяндап, өлең оқып, бүкіл елді жылатқан еді. Бұл туралы Stan.kz хабарлайды.

Назеркенің тағдыры барша қазақстандықтарды алаңдатқан болатын. 5 жасында кенеттен сал ауруына шалдыққан оның оқиғасы ешкімді бей-жай қалдырмады. Осы орайда «Балапан» телеарнасының басшысы Мақпал Жұмабай оны тележүргізушілікке шақырған. Оған бұл ұсынысты журналист Әлия Құдайбергенова айтқан көрінеді.

Бұл қуанышты хабарды ол өзінің әлеуметтік желідегі парақшасында былай бөліскен екен:

«Бұл Назерке! «Қарекеттің» «Назеркенің арманы» деген хабарына қатысқан кішкентай кейіпкер. Арбаға таңылған аққудай қыздың оқыған өлеңі тыңдағанды жылатып, жүректерді елжіретті. Асан Пердешов ағасы, тіпті, əн жазып жіберіпті. Қанша адам тілектес болды. «Назека, инста парақшаңда 300 адам екен әзірге. Біздің хабардан соң он мыңға жетеді», – дегенмін. Сөйтсем 45 000 адамға толыпты! Барлығы Назеркенің аяғынан жүріп кетуіне шын жүрегімен тілектес!

Ойланып отырып, Мақпал Жұмабай атты талантты сіңіліме хат жаздым. Мақпал белгілі ақын. Қазір «Балапан» арнасының басшысы. «Назеркеден жүргізуші шығаруға болатын сияқты. Өміріне титтей болса да оң өзгеріс болсын, осындай қуаныш сыйлай аласың ба, Мақпал?» деген мазмұндағы хатыма: «Жақсы, Əлия апай. Нөмірін беріңіз», – деді. 

Айналып кетейін, Мақпал! Бірауыз сөзімді жерде қалдырмай, Назеркенің бойындағы талантты, көзіндегі отты байқап жүргізушілікке шақырғаныңа мың алғыс! Сен деген қатарынан оза туған сұңғыла қызсың ғой.

Алла қаласа Назерке «Балапанның» жүргізушісі. Тележұлдыз болады! Сосын журналист болады! Назеркемен бүгін сөйлестім. Қуанып отыр. Жаным, жарқырап жүрсең екен».

date11.04.2018readCount988printБасып шығаруsourceLinkMuslim.kz





comments powered by HyperComments